Read Mizo Lushai Jeremia 7 Bible Online

Jeremia 7 - Mizo Lushai bible

Jeremia 7

¹Jeremia hnêna LALPA thu lo thleng chuan heti hian a ti:

²“LALPA in kawngkaah ding la, hetiang hian thu sawi rawh: ‘Nangni LALPA be tûra hêng kawngkaa lo lût, Juda mi zawng zawngte u, LALPA, thu hi ngaithla rawh u.

³Engkim LALPA, Israel-te Pathian chuan heti hian a ti: in thiltih te, in awm dân te siam ṭha ula; tichuan, he hmunah hian ka awmtîr ang che u.

⁴Hei hi LALPA in, LALPA in, LALPA in ngei a ni’ tih ringawt hi innghahna tlâk a ni lo ve.

⁵In awm dân te, in thil tihte in siam ṭha takmeuh a nih chuan dik takin mi dangte thu pawh rêlsak rawh u.

⁶Ram dang mi te, fahrah te, hmeithai te hnehchhiah suh u; thil sual ti lote thisen he hmunah hian chhuah suh ula, in chhiatna tûrin pathian dangte be hek suh u.

⁷Tichuan, he ram, hmasâng ata in thlahtute ka pêk ramah hian, kumkhuain ka awmtîr ang che u.

⁸Mahse, dâwt thu, eng mah ni lo chu in ring zâwk si a le!

⁹Rûk in ru a, tual in that a, in uire a, dâwtin chhia in chham a, Baal hnênah rimtui in hâl a, in hriat ngai loh pathiante in be ta si a.

¹⁰In lo kal a, he in, ka hming lam ṭhinna hmunah, ka hmaa dingin, ‘kan him ta,’ ti chungin hêng thil bawlhhlawh hi in ti zêl ang maw?

¹¹He in, ka hming lamna hmun hi, suamhmangte pûk emaw in ti elo? Mahse, keimah ngeiin ka hmu reng che u asin,’ ” tih hi LALPA thuchhuak a ni.

¹²“A tîra ka hming lamna hmun atâna ka thlan Silo khuaah kal ula; ka mi, Israel-te sualna avânga ka thiltihte en rawh u.

¹³Hêng thil sual hi in tih avângin zîng tak takah in hnênah thu ka sawi a, ka ko che u a, in chhâng si lo,” tih hi LALPA thuchhuak a ni.

¹⁴“Chuvângin, Silo khua ka sawisak ang khân ka hming lamna in, in muanpui ṭhin, nangni leh in thlahtute ka pêk hmunte hi ka sawisa dâwn a ni.

¹⁵Efraim thlah, in unaute ka hnawt chhuak vek ang khân nangni pawh ka hnên ata ka hnawt chhuak dâwn che u a ni.”

¹⁶ LALPA chuan heti hian a ti: “Chuvângin, hêng mite hi ṭawngṭaisak suh, an tân dîl suh la, ngensak hek suh; i dîlsak pawhin ka ngaithla lo vang che.

¹⁷Judai ram khawpuia an thiltihte, Jerusalem kawtthlêra an thiltih te hi i hmu lo vem ni?

¹⁸Naupangin thing an fawm a, paten mei an chhêm a, nuten vân lalnu hnêna hlan tûr chhang an hmet a, pathian dangte tân in tûr thilhlan an thli chhuak a; chûng avâng chuan ka thinur takzet a ni.

¹⁹“Mi tithinur mai em ni an nih?” tih hi LALPA thuchhuak a ni. An zahna tûr an insiam zâwk a ni lâwm ni?

²⁰Chuvângin, Engkim LALPA chuan heti hian a ti: “Ka thinurna nasa tak chu he hmunah hian ka leihbua ang a, mihring te, ramsa te, ramhnuai thing te, huana theirahte a kâng ang a, a mit tawh lo vang.”

²¹Engkim LALPA, Israel-te Pathian chuan heti hian a ti: “Hâlral thilhlante chu inthawina pangngaiah belh ula, a sate pawh ei law law rawh u.

²²In thlahtute Aigupta ram ata ka hruai chhuah lai khân hâlral thilhlan te, inthawina te eng mah ka phût lo va.

²³Ka thupêk chu hei hi a ni zâwk, ‘Ka thu zâwm ula, in Pathian ka ni ang a, ka mite in ni ang. In hnêna ka thupêk zawng zawng hi in zawm chuan in hmuingîl zêl ang,’ tih hi.

²⁴Mahse, an ngaithla lo va, an pawisa hek lo, luhlul chhuahin sual lam an âwn tlat a, hma lam pan lovin an hnungtawlh ta zâwk a.

²⁵In thlahtuten Aigupta an chhuahsan ni aṭanga vawiin thlengin in hnênah ka chhiahhlawh te, zâwlnei te, ni tin zîng tak takah ka tîr ṭhîn a.

²⁶Mahse, min ngaihsak lo va, min pawisa hek lo. Luhlul an chhuah a, an thlahtute aiin an sual ta zâwk a.

²⁷“Hêng thu zawng zawng hi i hrilh ang a; mahse, an ngaithla duh lo vang. Anni chu i ko vang a, an chhâng lo vang che.

²⁸An hmaah heti hian sawi rawh: ‘He hnam hian LALPA, an Pathian aw an ngaithla lo va, a kaihhruaina an zâwm hek lo. Thu dik a bo va, sawi pawh an sawi ngai tawh lo,’ tiin.

²⁹“I lu ziat kawlh la, i sam paih rawh, tlâng kawlh vulahte chuan lusûn angin awm rawh. He chhuan chungah hian kei LALPA hi ka thinur a, ka paihthla ta a ni.

³⁰Juda mite chuan ka mite hmuhah thil sual an ti ta,” tih hi LALPA thuchhuak a ni. “Ka hming lam ṭhinna inah an milem tenawm tak chu an hûng a, an tibawlhhlawh ta.

³¹An fanute, an fapate hâl nân Ben-Hinom ruamah Tofet in sâng an sa a; chu chu ka thupêk a ni lo va, ka ngaihtuah ngai loh a ni.

³²Chuvângin, fîmkhur la, nite a lo thleng dâwn e,” tih hi LALPA thuchhuak a ni. “Miten chu hmun chu Tofet an vuah tawh lo vang a, Ben-Hinom ruam an ti tawh hek lo vang. ‘Inthahna ruam’ an ti tawh zâwk ang. Inphûmna tûr hmun dang a awm loh avângin mitthite chu Tofet-ah chuan an phûm tawh ang.

³³He mite ruang hi chunglêng savate leh ramsate chaw a ni ang a, tu man an hnawt darh lo vang.

³⁴Judai ram khawpuiah te, Jerusalem kawtthlêrah te chuan hlim thâwm te, lâm ri te, mo leh moneitu hlim ri te a reh ang a, ram chu a ṭiau vek dâwn a ni.