Read Mizo Lushai Jeremia 8 Bible Online

Jeremia 8 - Mizo Lushai bible

Jeremia 8

¹“Chutih hunah chuan Judai ram lal ruh te, Jerusalem-a chêng ruh te chu an thlân aṭangin an phawrh chhuak ang,” tih hi LALPA thuchhuak a ni.

²“Thlahlel taka a rawng an bâwl, an zawna an zuia chibai an bûk ṭhin ni te, thla te leh vâna arsi zawng zawngte hmaah chuan an pho chhuak ang. An senghawi lo vang a, an phûm hek lo vang; leia bawlhhlawh tling khâwm ang an ni ang.

³He hnam sual tak zînga la dam chhunte chuan ka hnawhdarhna hmunahte chuan dam aiin thih an thlang tawh zâwk ang,” tih hi Engkim LALPA thuchhuak a ni.

⁴“ ‘LALPA chuan heti hian a ti’ tiin an hnênah sawi rawh: Mi an tlûkin an tho leh lo vang em ni? Kawng bo pawh an kîr leh lo vang maw?

⁵Engati nge Jerusalem mite hi an vah bova, An bo hlen dâwn? Kawng dik lo an zawh tlat a, kîr zai rêng an rêl lo.

⁶Ngun takin an thu ka ngaithla a, kîr zai rêng an rêl lo. ‘Eng nge ka tih tâk?’ tiin Tu man an sual an sim duh lo; Indona hmun pana sakawr lîm angin, Mahni kawng ṭheuh zawhin an tlân.

⁷Vân sânga vacha pawhin pêm hun bi a hria a, Ṭhuro te, vamûr te, kanghlai te pawh A hun takah an lo lang ṭhîn a, Ka mite erawh hi chuan LALPA remruat an hre si lo.

⁸‘Kan fing a, LALPA Dân pawh kan hria,’ Engtin nge in tih theih le? In hriat chu lehkhaziaktuten phuahchawpa an ziak mai a ni.

⁹Mi fingte chu an zak ang a, Mangannain a nangchîng ang, LALPA thu an hnâwl a, eng finna nge an neih tâk le?

¹⁰An nupuite mi dang ka pe ang a, An lote pawh mi dangin an nei ang. A tê ber aṭangin a lian ber thlengin duhâmnain an khat a, Zâwlneite leh puithiamte pawhin Mi bum an chîng hle.

¹¹Ka mite hliam chu duhdah takin an tuam a, ‘A ṭha e, a ṭha e,’ an ti a; mahse, a ṭha hauh si lo.

¹²Thil tenawm in tih pawhin in zak lo va, Zah nachâng rêng rêng in hre hek lo. Chuvângin, tlute zîngah chuan in tlu ve ang a, Ka hrem hun che u chuan in tlu dêr ang,” Tih hi LALPA thuchhuak a ni.

¹³ LALPA thuchhuak chuan, “Anni chu seng khâwm ka duh êm êm a ni, Mahse, grep rah lo leh theipui rah lo ang an ni, An hnahte pawh a vuai vek a, An hnêna ka pêk chu ka chhuhsak leh ang,” a ti a.

¹⁴Pathian mite chuan, ‘Engati nge kan ṭhut reng le? Kal khâwm ila, kulh nei khawpuiahte lût ila, Tah chuan i thi dial ang u. LALPA laka kan sual avângin LALPA, kan Pathian chuan, Thi tûrin min ti a, tûr in tûr min pe ta a ni.

¹⁵Muanna kan zawng a; mahse, thil ṭha eng mah a thleng lo, Tihdam hun kan thlîr a, ngai teh, thlaphânna mai a lo ni.

¹⁶Dan aṭangin an sakawr hnâr tum ri a hriat a, An sakawr hrâm ri chuan ram pum pui a tizâm ta, Ram leh a chhûnga awm tinrêng, Khawpui leh a chhûnga chêng zawng zawng tichhe tûra lo kal an ni,’ an ti a.

¹⁷Ngai teh u, in zîngah rûl tûr nei ka rawn tîr ang, Rûl khawi ngam theih loh chu, Chûng chuan a chuk ang che u,” LALPA thuchhuak chuan a ti.

¹⁸Ka lungngaihzia hi hnem rual ka ni lo, Ka rilru a va na tak êm!

¹⁹Ram dung leh vânga ka mite ṭap thâwm chu ngaithla teh u, ‘Zion-ah LALPA a awm lâwm ni, A chhûngah a lal a awm na nge?’ ‘Engati nge an milim chher, ram dang pathiante chuan nasa taka min tihthinur tâk le?’

²⁰Mipuite mangang chuan, ‘Buh an seng zo va, nipui pawh a tâwp ta a, Chhandam kan la ni si lo,’ an ti.

²¹Ka mite lungngaihna ka ṭâwmpui a, Ka ṭap a, mangang takin ka awm ta.

²²Gilead-ah thinghnai damdawi a awm lâwm ni? Tah chuan tidamtu a awm na nge? Engati nge ka mite an dam theih loh?