Read Mizo Lushai Jeremia 9 Bible Online

Jeremia 9 - Mizo Lushai bible

Jeremia 9

¹Ka lu hi tuiin khat se, ka mit hi mittui hnâr ni se, Ka mi, an thahte sûnin a chhûn a zânin ka ṭap tûr.

²Khualzinte tân thlalêrah thlenna khualbûk awm sela, Ka mite ka kalsan ang a, ka inthiarfihlîm daih tûr. An vaiin an uire a, bumhmang awm khâwm an ni.

³An lei chu dâwt sawi tûrin Thal ngul kawih kûl angin a inpeih reng a, “Ram chhûngah dikna aiin dâwt a lal ta. Thil sual an ti zui zêl a, kei mi hre si lo,” Tih hi LALPA thuchhuak a ni.

⁴Ṭhiante lakah fîmkhur ṭheuh ula, In unaute tu mah ring suh u. Unaute chu bumhmang an ni, Ṭhian pawh chu hêkhmang a ni.

⁵“Ṭhian leh ṭhian an inbum a, thu dik sawi rêng an awm lo, Dâwt sawi an inzirtîr a, suahsual bâwlin an hmanhlel a.

⁶Inbum a hluar, bumna hlîr bumna hlîr, Kei mi hre duh si lo.” Tih hi LALPA thuchhuak a ni.

⁷Chuvângin, Engkim LALPA chuan heti hian a ti: “Ngai teh, anni chu rangkachak rawh thianghlim angin ka fiah ang, Ka mite chungah hian eng dang nge ka tih tâk ang le?

⁸An lei chu thihna thal ang hi a ni, Mi bumhlum an hnial lo. Ṭhenawmte thlum takin an bia a, Mahse, an chhiatna tûr an zawng ru rân si a.

⁹Hêng thil avâng hian ka hrem lo vang em ni? Hetiang hnam lakah hian phuba ka la lo vang maw?” Tih hi LALPA thuchhuak a ni.

¹⁰Lusûn angin tlângte ka ṭah ang a, Hnimhring hmunte a ro zawh tâk avângin Ka ṭap vawng vawng ang. Tu mah an kal tawh lo vang a, Ranrual thâwmte pawh hriat a ni tawh lo vang. Chunglêng savate leh ramsate pawhin an rauhsan dâwn si a.

¹¹“Jerusalem chu thil chhe vawm khâwm, Sihalte tualchaina hmun a ni ang, Judai ram khawpuite ka tichhe vek ang a, Tu man an luah tawh lo vang,” Tih hi LALPA thuchhuak a ni.

¹²Hei hi hrethiam khawpa fing tu nge awm? LALPA chuan tu nge puang tûra a hrilh le? Eng vângin nge ram chu a chhiata, Tu ma tlawh loh thlalêr ram ro ang mai a nih tâk?

¹³ LALPA chuan heti hian a ti: “An hnêna ka pêk, ka dân chu an hnâwl a, ka aw an ngaithla lo va, an zâwm duh hek lo;

¹⁴luhlul an chhuah a, an paten an lo zirtîr tawh angin Baal pathian an be ta zâwk a.”

¹⁵Engkim LALPA, Israel-te Pathian chuan heti hian a ti: “Ngai teh, he mite hi hnim kha ka eitîr ang a, an in atân tui kha ka pe ang.

¹⁶Anmahni leh an thlahtute pawhin an hriat ngai loh hnam dang zîngah ka hnawt darh ang a, ka tihboral vek hma loh chu khandaihin ka ûm ang.”

¹⁷Engkim LALPA chuan heti hian a ti: “Ngaihtuah teh u, mitthi sûn mi hmeichhiate ko ula, Ṭap thiamte pawh lo kal teh se.”

¹⁸Mipuite chuan, “Lo kal thuai sela, min rawn ṭahpui teh se, Kan mittui a tlâka, a sûr zung zung theih nân,” an ti a.

¹⁹Zion-a ṭap thâwm an hria: “Kan chhe zo va, kan mualpho ta dêr mai; Kan ram kan rauhsan dâwn ta, Kan inte a chhe zo ta si a.”

²⁰Hmeichhiate u, LALPA thu hi ngaithla ula, A sawi hi hre teh u. In fanute ṭah zirtîr ula, Anni chuan an ṭhiante khawhar zai zirtîr ṭheuh rawh se.

²¹Kan tukverhahte thihna a lo lâwn a, Kan lal inahte pawh a lût ta a, Kawtthlêra naupangte a la bo va, Tualzâwla tlangvâlte pawh a man ta.

²² LALPA thuchhuak chuan heti hian sawi rawh a ti: “Bawlhhlawh angin tualah mi ruang a thal pheng phung ang, Buh seng hmaih angin tu man an khâwm lo vang.”

²³ LALPA chuan heti hian a ti: “Mi fingin a finna chhuang suh se, mi chakin a chakna chhuang hek suh se. Mi hausa pawhin a sum leh pai chhuang suh se.

²⁴Kei LALPA hi, leia mite khawngaiha, an chunga dik tak leh fel taka rorêl ṭhîntu ka ni tih hriat chianna chu a chhuang duh chuan chhuang zâwk rawh se chu chu ka lawmzâwng tak a ni si a,” tih hi LALPA thuchhuak a ni.

²⁵“Ngai teh u, nite a lo thleng e,” tih hi LALPA thuchhuak a ni. “Tisa maia serh tanho zawng zawng ka hrem dâwn.

²⁶Aigupta mi te, Juda mi te, Edom mi te, Amon mi te, Moab mi te leh thlalêra chêng bak ziat kâwnghote chu ka hrem dâwn; chûngho chu serh tan tak an ni lo va, Israel-te ngei pawh thinlung lama serh tan loh an ni.”