Read Mizo Lushai ṬAH HLA 4 Bible Online

ṬAH HLA 4 - Mizo Lushai bible

ṬAH HLA 4

¹E Khai, rangkachak chu a thîm ta tlul mai a! Rangkachak ṭha chi chu a va danglam ta êm! Hmun Thianghlim sakna lungte chu Kawtthlêr pêng ṭhuamahte an paih darh ta.

²Zion tlangvâlte chu Rangkachak ṭha chi ang an ni ṭhîn a, Bêlvawtu hlumbêl ang lek an nih tâk hi!

³Chinghnia pawhin a no hnute a pe ṭhîn a, Ka mite erawh chu thlalêr vanghâwngsei Nun râwng tak ang hi an ni ta e.

⁴An pawm laite tuihâl dangchârin an awm a, An faten ei tûr an ngên a, an pe duh lo.

⁵Thil tui tui ei ṭhînte chu tualah an ṭâmchhâwl a, Puan senduk sin ṭhînten bawlhhlawh paih khâwm an hai.

⁶Tu ma khawih lohvin Sodom khua a chhe thut a, A mite tuar aiin ka mite tuar a nasa daih a ni.

⁷Kan hotute chu vûr aia vâr, Hnutetui anga pâwl phêt, An taksa chu Rubi anga sâr, Safir lung nawh mâm ang ni ṭhîn kha,

⁸An hmêlte chu meihawl aiin a dum ta a, Tuala an awm hriat hran rual an ni ta lo, An chêr ṭhiak a, an ro rem a, Thing ro ang mai an ni.

⁹Ei tûr hmu lo, châk ngawih ngawih si, Rilṭâma thi tate ai chuan khandaiha thahte chan a ṭha zâwk e.

¹⁰Ka miten chhiatpui an tawh meuh chuan, Nu ngilnei tak takte pawhin An fate hial an chhûm a, an ei ta mai!

¹¹ LALPAN a thinur chu a hrithla ta a ni, Zion-ah chuan a thinur mei a chhuah a, A lungphûm lamin a tichhe zo ta.

¹²Lei lalte leh khawvêla mi zawng zawngten Beitu hmêlma Jerusalem khuaah An luh theih rêng an ring ngai lo.

¹³Zâwlneite sual vâng leh puithiamte khawloh vâng a ni, Khaw chhûngah chuan mi dik thisen an chhuah si ṭhîn.

¹⁴Mitdel angin tualah an vâk dun dun a, An kawrahte thisen a kai hnuang a, Tu man an khawih thiang lo.

¹⁵Miten, ‘In bawlhhlawh e, kal daih rawh u, Kal bo daih rawh u, min khawih ang e,’ an ti. Hnam tin zîngah an vâkvai a, ‘Hetah an awm kan phal hlei nêm,’ an lo ti zêl.

¹⁶ LALPA a thinur a, a tidarh ta a ni, A ngaihsak tawh hauh lo, Puithiam a duhsak chuang lo va, Kan upate a khawngaih bawk hek lo.

¹⁷Min pui thei lo puih beiseiin Mit tla dâwnin kan thlîr. Min chhan thei lo hnam chu Kan nghâk thlâwn mai a ni.

¹⁸Hmêlmate chuan kan hnu an chhui zêl a, Kawtthlêrah pawh kan lêng ngam lo, Kan ral dâwn ta a ni, Kan ni a liam ta a, kan thi mai dâwn.

¹⁹Vânsâng ata mupui lo bir aiin min ûmtute an chak zâwk a, Tlângahte pawh min ûmzui a, Thlalêrahte min lo tlân khalh.

²⁰ LALPA hriakthih, kan belh ber chu, An thangah chuan a âwk ta si. ‘Ama hovin hnam dang kârahte pawh, Kan awm ang chu,’ kan lo ti ṭhîn.

²¹Uz rama chêngte leh Edom mi leh sate u, In theih lai hian hlim ula, lâwm rawh u, In chungah pawh chhiatna no chu a lo thleng dâwn, In rui ang a, saruakin in awm ang.

²²Zion fanaute chuan in tuar tûr chu in tlâk ta a, Salah in tâng tawh lo vang. Nangni Edom mite erawh chuan in tuar dâwn e, In sualzia hi a thai lang dâwn.