Read Mizo Lushai ṬAH HLA 5 Bible Online

ṬAH HLA 5 - Mizo Lushai bible

ṬAH HLA 5

¹ LALPA, kan chunga thil thleng hi hre reng ta che, Min rawn thlîr la, kan mualpho tâkzia hi en teh.

²Kan rochan ramte chu hnam dangin an nei a, Kan inte pawh ram dang miten an luah.

³Pa nei lovin kan fahrah a, Kan nute pawh an hmeithai ta.

⁴Kan tui ngei chu kan in dâwnin lei a ngai ta a, Kan thing ngei pawh a man kan pe.

⁵Bâwng nghâwngkawl min bahtîr a, min khalh nek a, Kan rim hle a, chawlh pawh kan châwl thei lo.

⁶Ei tûr kan neih hrâm nân Aigupta leh Asuria kan be tlawn ruai.

⁷Kan pate chuan thil sual an ti, an thi tawh a, An sual mawh chu keinin kan phur.

⁸Bawihten kan chungah ro an rêl a, An kut ata min chhan chhuak tûr tu mah rêng an awm lo.

⁹Thlalêra suamhmang rualin ram an dâp a, Thih huam hiala ei tûr kan dap a ngai.

¹⁰Thuk ang maiin kan pangte a sa a, Ṭâm chu a nat êm vâng a ni.

¹¹Zion-ah chuan kan nupuite an pâwngsual a, Judai rama nulate pawh an tlâwm.

¹²Kan hotute banah an khai a, Upa hmêl lah an zah chuang lo.

¹³Tlangvâlte chu buhherkhâwlah an chhawr, Naupangte lah thing têl puin an pai chawn chawn.

¹⁴Upate chu kulhkawngkaah an ṭhu ta lo, Ṭhalaite chuan ṭingṭang an thlah.

¹⁵Kan hlimna kha a reh ta a, Kan lâm ṭhîn kha, lusûn ang kan ni ta.

¹⁶Kan pârṭhi khim a ṭîl zo ta, Kan sual a ni, kan va khawngaihthlâk êm!

¹⁷Hemi avâng hian kan lung a chhia a, Hêng avâng hian khua pawh kan hmu thei lo.

¹⁸Zion tlâng chu a ram ta a, Sihal rualte an tualchai e.

¹⁹ LALPA, nang zawng, kumkhuaa lal i ni, I lalna chuan tâwpintai a nei lo.

²⁰Engtizia nge min theihnghilh tâk reng le? Min kalsan kumkhua dâwn em ni?

²¹ LALPA, i lamah min hruai la, Min hruai kîrin hmânlai ang khân min tithar leh ta che,

²²Nge, min paih thla hlenin Kan chungah hian i thin a ur reng dâwn?