Read Mizo Lushai Ezekiela 1 Bible Online

Ezekiela 1 - Mizo Lushai bible

Ezekiela 1

¹Kum sawmthum kum thla lina, tahrik ni nga niin Kebar lui kama Juda-ho saltâng zînga ka awm ve laiin vân a inhawng a, Pathian inlârna ka hmu a.

²Chumi thla tahrik ni nga ni, Lal Jehoiakina an man kum nga kum chuan,

³kei, puithiam Ezekiela, Buzia fapa hnênah Babulon rama Kebar lui kamah chuan LALPA thu chu a lo thleng ta a, LALPA kut chu ka chungah a fu ta a.

⁴Ka han en a, hmâr lam aṭangin thlipui a lo thawk chûk chûk a; chhûm dum kuihah chuan kâwl a phe zawr zawr a, a vêl chu a êng uau va, a phêtnaah chuan dar tle ang êng a awm a.

⁵Chu êng lo chhuak aṭang chuan thilnung ang, mihring ang hi, pali an lo chhuak a.

⁶Hmai pali leh thla pali an nei ṭheuh va,

⁷an ke chu an thluang ngîl a, an ke bâwr chu bâwng ke ang hi a ni a, dâr nawh tlêt ang a ni.

⁸Hmai pali leh thla pali bâkah an panga thla pali hnuaiah chuan kut, mihring kut ang hi, an nei ṭheuh va.

⁹An thla chu inkhawih pha chiaha zârin kil li neiin an ding kual a, an kal pawhin inher ngai lovin mahni hma zâwnah an kal thei.

¹⁰An hmêl lan dân chu hetiang hi a ni: Hma lamah mihring hmêl an pu a, ding lamah sakeibaknei hmêl, vei lamah bâwngpa hmêl, hnung lamah mupui hmêl.

¹¹An hmêl chu chutiang chu a ni: an thla pahnih chu inkhawih pha ṭheuhvin an zâr kual a, an thla pahnih chuan an taksa an khuh a.

¹²An duhna lam lamah inher lovin an kal thei a ni.

¹³Thilnungte chu meivâm, meialh êng tak ang hi an ni. Thilnung pali kârah chuan kâwl a phe zawr zawr a, mei angin a êng pup a. Mei aṭang chuan kâwlphe chu a lo de chhuak a ni.

¹⁴Thilnung palite chu kâwlphe anga chakin an tlân tawn zawk zawk a.

¹⁵Thilnung palite chu ka en reng lai chuan, an bul ṭheuhvah tawlailîr ke pali, leia innghat ka hmu a.

¹⁶Tawlailîr kete chu berul lung anga tle, inang ṭheuh a ni; a ke kual chhûnga ke kual dang awm ang hi a ni.

¹⁷An lirh sawn chuan inher lovin khawi lam zâwng pawhin an lîr thei.

¹⁸Tawlailîr ke bial tlâng chu a kual kung mai a, chhun kalhna a awm fur bawk a, a kual chu a de sût vek a ni.

¹⁹Thilnungte kal duhna apiangah, an bulah chuan an lîr ve zêl a.

²⁰Thilnungte an thlawh chhoh leh an chho ve a, thilnungte thu thuin an awm a.

²¹An kalna lam apiangah an lîr ve zêl ṭhîn, an din leh an ding ve a, lei ata an chhoh leh tawlailîr kete pawh chu an chho ve a, thilnungte thu thu-a awm an ni.

²²Thilnungte lu chungah chuan thil kûmkulh hi a awm a, vûr anga vâr sût a ni, an lu chungah chuan a inzâr a.

²³Chu thil kûmkulh hnuaiah chuan an thla pahnih chu inkhawih phain an zâr duai a, an thla pahnih dang chuan an taksa an khuh a,

²⁴An han thlawh chuan tuifinriat thâwm anga nasa, Engkimtitheia aw ang, bûka mipui ri mur mur ang hian a ri hum hum a, an din chuan an thla chu an khup a.

²⁵An dina an thla an khup pawh chuan kumkulh aṭang chuan a la ri ta hum hum tho va.

²⁶An lu chunga kûmkulhah chuan lalṭhutthlêng ang, safir lunga siam ni âwm hi a awm a, mihring ang hi a ṭhu a.

²⁷A kâwng chung lam chu dâr rawh lin anga tle a ni a, a hnuai lam pawh chu mei anga êng a ni, a vêl chu a êng pum a.

²⁸A vêlin êng chu ruah sûr nia chhimbâl zâm ang pup hi a ni. Hei hi a ni LALPA ropuina êng lan dân chu. Chu chu ka han hmuh chuan ka tlu bawkkhup a, min betu aw chu ka hre ta a.