Read Mizo Lushai Ezekiela 10 Bible Online

Ezekiela 10 - Mizo Lushai bible

Ezekiela 10

¹Tin, ka han en a, cherub-ho chunga kûmkulhah chuan safir lunga siam ni âwm tak, lalṭhutthlêng ang hi ka hmu a.

²Puan vâr sin kha a bia a, “Cherub hnuaia tawlailîr ke kârah sâwn kal la, cherub zînga meiling saw va ṭhûm la, khaw chhûngah theh darh rawh,” a ti a. A kal ta chu ka enzui a.

³Chu mi chu a va kal chuan, cherub-ho chu Tempul chhûng chhim lamah an lo ding a, in chhûng chu meikhuin a khat a.

⁴LALPA ropuina chu cherub chung aṭang chuan sumhmunah a chhuak a, in chhûng chu chhûmin a khat a, a tualah chuan LALPA ropuina chu a êng phût a.

⁵Cherub-ho thla zâp thâwm chu tual hung pâwn aṭang pawhin hriat theih a ni a. El Sadaia thu sawi thâwm ang a ni.

⁶“Cherub hnuaia tawlailîr ke zînga mei saw va la rawh” a han tih chuan puan vâr sin chu a kal a, tawlailîr ke bulah chuan a va ding ta a.

⁷Cherub pakhat chuan cherub-ho hnuaia mei chu a la a, puan vâr sin chu a pe a; ani chuan a la a, a chhuahpui ta a.

⁸Cherub-ho chuan an thla hnuaiah mihring kut ang hi an nei ṭheuh va.

⁹Ka han en chuan cherub bul ṭheuhvah chuan tawlailîr ke pakhat a lo awm thliah a; tawlailîr kete chu berul lung ang hi a ni.

¹⁰Tawlailîr ke pali chu a inang ṭheuh va, a ke kual chhûnga ke kual dang awm ang mai hi a ni.

¹¹An han lirh chuan inher lovin khawi lamah pawh an lîr thei, cherub hawina lam lamah, inher lovin an lîr thei a ni.

¹²An pumin, an taksaah te, an hnungzângah te, an kutah te, an thlaah te leh tawlailîr ke kualah te pawh mit a khat vek a.

¹³Tawlailîr kete chu ‘vir vut vut’ an tiin ka hria.

¹⁴An vaiin hmêl pali an nei ṭheuh va, cherub hmêl te, mihring hmêl te, sakeibaknei hmêl te leh mupui hmêl te a ni.

¹⁵Cherub-ho, Kebar lui kama ka hmuh, thilnung palite kha, an thlâwk chho a.

¹⁶Cherub-ho kalna apiangah tawlailîr kête pawh chu a lîr ve zêl a, cherub-ho an thlawh chhoh leh an rualin an chho ve zêl a ni.

¹⁷Cherub-ho an din chuan an ding ve a, an thlawh chhoh leh an chho ve a, cherub-ho thu thuin an awm a ni.

¹⁸LALPA ropuina chu Tempul pindan hmasa aṭang chuan a chhuak a,

¹⁹cherub-ho thla zâp chu ka hmu a, an thlâwk chho va, tawlailîr kête pawh chu a tel zêl a; LALPA in, khawchhak lam kawngkhâr chungah chuan an ding ta a, an chungah chuan Israel-te PATHIAN ropuina chu a awm a.

²⁰Chu chu Kebar lui kama Israel-te Pathian hnuaia thilnung ka hmuhte chiah kha an ni.

²¹Hmai pali leh thla pali an nei ṭheuh va, an thla hnuaiah mihring kut ang an nei bawk a.

²²An hmêl pawh chu Kebar lui kama ka hmuh ang chiah kha a ni, an kalna lam apiang chu an hma zâwn a ni ṭheuh thei.