Read Mizo Lushai Ezekiela 11 Bible Online

Ezekiela 11 - Mizo Lushai bible

Ezekiela 11

¹Thlarau chuan mi chawi kâng a, khawchhak lam panga LALPA in kawngkhârah chuan min hruai a, kawngkhâr bulah chuan mi sawmhnih leh panga an lo awm a, an zîngah chuan mipui hotu Azura fapa Jaazania te, Benaia fapa Pelatia te an awm bawk a.

²Ka hnênah chuan, “Mihring fapa, hêng mite hi an ni, thil sual ngaihtuah chhuaka, khuaa mite fuih khawlo zotute chu.

³In sak a la hun lo, ‘khawpui hi sa bêl ang a ni a, keini hi sa ang kan ni, kan him a nih hi,’ an ti a; chuvângin, aw nang, Mihring fapa, an chungchâng tûr thu hi sawi rawh,” a ti a.

⁴LALPA Thlarau chu ka chungah a lo thleng a, ka hnênah chuan,

⁵“Sawi rawh, LALPA chuan heti hian a ti: ‘In thu sawite chu ka hria a, in thil tih tumte pawh ka hria.

⁶Khaw chhûngah mi in thah belh zêl a, tual laite chu mitthi ruangin a khah tâk hi.’

⁷Lalpa PATHIAN chuan heti hian a ti: ‘Tuallaia in mi thah dah khâwmte chu sa bêl chhûnga sa awmte chu an ni; khua chu sa bêl a ni a; mahse, nangni chu ka la chhuak ang che u.

⁸In hlauh tak khandaih chu, in chungah ka rawn thlen dawn,’ Lalpa PATHIAN thuchhuak chuan a ti.

⁹Khua ata ka la chhuak ang che u a, ram dang mite hnênah ka pe ang che u, ka hrem dâwn che u a ni, khandaiha sah hlum in ni ang.

¹⁰In ramri chhûng ngeiah in chungah ka ṭuan ang; tichuan, LALPA ka ni tih in hria ang.

¹¹Sa bêl chhûnga sa a him ang hian khua chuan a humhim lo vang che u.

¹²Ka thupêkte chu in awih duh lo va, ka dânte pawh in zâwm duh hek lo. In chhehvêla awm hnam dangte dân chu in la ta zâwk si a,” a ti a.

¹³Chûng thu ka sawi lai chuan Benaia fapa Pelatia chu a tlu a, a thi ta mai a. Ka bawkkhup a, ring takin, “Aw Lalpa PATHIAN, Israel-ho la awm chhunte hi i tiboral vek dâwn em ni?” ka ti a.

¹⁴LALPA thu chu ka hnênah a lo thleng a,

¹⁵“Mihring fapa, Jerusalem mite chuan, i unau, i laichîn, i chipui Israel saltângte chu, ‘LALPA in an pawh pha ta lo, ram chu kan chan atân min pe vek tawh,’ an ti vei a.

¹⁶Chuvângin, an hnênah sawi rawh: ‘Lalpa PATHIAN chuan heti hian a ti: Hnam dang zîngah ka awmtîr daih a, ram tinah ka tidarh nâ a, an hnênah, an darhna ramah chuan, ka awm zêl a ni.

¹⁷Tichuan, hetiang hian hrilh rawh: Lalpa PATHIAN chuan heti hian a ti: Mi zîng ata ka hruai chhuak che u ang a, in darhna ram ata ka khâwm ang che u, Israel ram chu ka pe leh ang che u.’

¹⁸Tichuan, an lo haw ang a, thil ngeiawm leh tenawm zawng zawng hi an rawn tibo vek ang.

¹⁹Lungrual takin ka awmtîr ang a, thinlung thar ka pe ang. An thinlung, lung anga sak chu, ka lak bosak ang a, thinlung nêm tak ka siamsak ang.

²⁰Ka thupêkte an awih ang a, ka Dânte chu an zâwm ang a, an ti zêl ang; ka mite an ni ang a, an Pathian ka ni bawk ang.

²¹Hêngho, thil ngeiawm leh tenawm tak tak tih ngainatuho hi an thiltih ang zêlin ka rûl ang,” LALPA Pathian chuan a ti.

²²Cherub-ho chu an thlâwk a, tawlailîrte pawh chuan an zui a, an chungah chuan Israel-te Pathian ropuina chu a awm a.

²³LALPA ropuina chu Jerusalem khua aṭang chuan a chhuak a, khawpui chhak lam tlângah chuan a ding ta a.

²⁴Kei pawh inlârnaah chuan Thlarauvin min chawi a, Kaldai ram saltângte hnênah min hruai a, inlârna ka hmuh chu a kiang ta a.

²⁵LALPA thil min hmuhtîr zawng zawng chu saltângte ka hrilh ta a.