Read Mizo Lushai Ezekiela 12 Bible Online

Ezekiela 12 - Mizo Lushai bible

Ezekiela 12

¹ LALPA chuan ka hnênah,

²“Mihring fapa, hel hmang zînga awm i nih hi; mit an nei a, an hmu thei si lo; beng an neia an hre thei hek lo; an hel lui zêl a ni.

³Chuvângin, nang, Mihring fapa, saltâng thawmhnaw ang têl la, khaw ên laiin an hmuh ngeiah saltâng tûr angin thawk chhuak rawh, hmun dangah kal la, hel hmang tak ni mah se an hmu mahna che.

⁴An hmuh ngei tûrin chhûnah saltâng thawmhnaw têl la, tlaiah saltâng tûr anga i chhuak chu hmu ngei che rawh se.

⁵An hmuh ngei tûrah bang chu ṭhiat la; tah chuan la chhuak ang che.

⁶An hmuh ngeiah pu la, thimah chhuahpui rawh, kawng i hmuh theih loh nân i mit khuh ang che; Israel-te tân chhinchhiahnaah ka siam dâwn che a ni,” a ti a.

⁷Thu min pêk ang chuan ka ti a, chhûnah saltâng thawmhnaw ang ka têl a, tlaiah, thim dâwnah, bang ka ṭhiat a, ka la chhuak ta a. Min en huai huai a, thawmhnaw têl chu ka pu ta a.

⁸A tûk zîngah chuan LALPA chuan ka hnênah,

⁹“Mihring fapa, hel hmang Israel chhûngte chuan, ‘Eng nge i tih?’ an tih che chuan,

¹⁰an hnênah heti hian ti ang che: ‘Lalpa PATHIAN chuan heti hian a ti: He thu hi Jerusalem rorêltu leh khuaa awm zawng zawng tân a ni.

¹¹In tân chhinchhiahna ka nih hi: ka tih ang tak hian in chungah an ti ang; sala tâng tûrin an man ang che u.’

¹²“In hotu chu thawmhnaw têl puin thimah a tlân chhuak ang, an chhuahna tûr bang an rek pawp ang a; tah chuan a chhuak ang, kawng a hmuh theih loh nân a mit a khuh ang.

¹³A tân lên ka zâr ang a, a âwk ang a, Kaldai ramah, Babulon khuaah ka hruai ang; chu khua chu a mit chuan a hmu lo vang; mahse, tah chuan a thi ang.

¹⁴Amah puitu, a ṭhuihruai zawng zawng, a vêngtu sipaite nên thli ka lentîr ang a, khandaihin ka ûmzui ang.

¹⁵Hnam dang zînga ka thawn darha, ram tina ka tihdarh hnu chuan LALPA chu ka lo ni ngei tih an hria ang.

¹⁶Khandaih te, hripui te, ṭâm avâng tea thi bâng mi tlêm tê ka zuah ang; an kalna hnam tin zîngah thil tenawm tak an tih ṭhinte chu an hre chhuak ang a, LALPA chu ka ni tih an hria ang,” a ti a.

¹⁷ LALPA chuan ka hnênah,

¹⁸“Mihring fapa, khûr chungin chaw ei la, mangang taka sai dawt dawtin tui in rawh.

¹⁹He rama mite hi hrilh rawh: Israel rama Jerusalem khaw chungthu Lalpa PATHIAN chuan heti hian a sawi: ‘Mangang takin chaw an ei ang a, thlabâr chungin tui an in ang, a mi chêngte nun a râwng êm a,’ ram chu a ṭiau vek dâwn.

²⁰An chênna khawpuite chu a chim chhe vek ang a, ram pum chu a ram der ang. Tichuan, LALPA ka ni tih an hria ang,” a ti leh a.

²¹ LALPA chuan ka hnênah,

²²“Mihring fapa, Israel ramah, ‘Nikhua a lo rei a, hrilhlâwkna a thlâwn leh mai ṭhîn,’ in ti ṭhîn hi engtizia nge?

²³He thu hi hrilh rawh: Lalpa PATHIAN chuan heti hian a ti: ‘ṭawng tuallêng lâr tak in neih hi ka tibâng dâwn, Israel ramah an hmang tawh lo vang.’ Hrilh rawh, hun a lo thleng ṭêp a ni, inlârnaa thil hmuh chu a thleng thuai ang.

²⁴Israel-te zîngah inlârna lem leh hrilhlâwkna dik lo a awm tawh lo vang;

²⁵‘LALPA chu ka ni a, ka sawi apiang chu hlen a ni ang; a muangchâng lo vang. Aw Israel helhmangte u, ka sawi hi in dam chhûng ngeiin hlen a ni ang, Lalpa PATHIAN thuchhuak chuan a ti,’ ti rawh,” mi ti leh a.

²⁶ LALPA chuan ka hnênah:

²⁷“Mihring fapa, ngai teh, Israel chhûngte chuan, ‘Hun rei tak hnua mi tûr inlârna a hmu a, rei tak hnua thleng tûr chauh a hrilh lâwk ṭhîn,’ an ti a.

²⁸Chuvângin, an hnênah sawi rawh: Lalpa PATHIAN chuan heti hian a ti: “Ka thu sawi rêng rêng a muangchâng lo vang: ka sawi chu tih nghâl a ni ang, Lalpa PATHIAN thuchhuak chuan a ti, ti rawh,” min ti a.