Read Mizo Lushai Ezekiela 13 Bible Online

Ezekiela 13 - Mizo Lushai bible

Ezekiela 13

¹ LALPA chuan ka hnênah,

²“Mihring fapa, Israel rama zâwlnei, mahni phuahchawp sawi ṭhînte hnênah, ‘LALPA thu ngaithla rawh u,’ ti rawh.

³Lalpa PATHIAN chuan heti hian a ti: “Mahni duhzâwng chauh leh an hmuh si loh thu sawi ṭhîn zâwlneite chu an chung a pik e.

⁴Israel-te u, in zâwlneite chu khaw ram sihal ang chauh an ni.

⁵Israel-te kulh bang chhe lai an vêng lo va, LALPAN indona a rawn tihthlen tûr laka him nân thawm an tum hek lo.

⁶An thil hmuh chu dâwt mai mai a ni a, phuahchawp inlârna an hmu a. LALPA sawi loh pui chu ‘LALPA thuchhuak a ni’ an ti a. An sawi chu a dikin an ring lehnghâl a:

⁷Ka sawi loh pui, ‘LALPA thuchhuak a ni,’ in tih hian inlârna lem in hmu a, phuah chawp in sawi mai mai tihna a ni lâwm ni?.

⁸“Chuvângin, Lalpa PATHIAN chuan heti hian a ti: ‘Dâwtin thu in sawi a, inlârna lem in hmu a; chuvângin, ka hua che u a ni,’ LALPA thuchhuak chuan a ti.

⁹‘Zâwlnei, inlârna lem hmua, dâwt phuahchawp sawi chîngte chungah ka kut ka lek dâwn; ka mite ṭhu khâwm zîngah an tel ve lo vang a, Israel mite hming ziakna bu-ah an hming a chuang lo vang a, Israel ram an luah ve hek lo vang; tichuan, Lalpa PATHIAN chu ka ni tih in hria ang.’

¹⁰Ka mite chu, ‘A muanawm e,’ tiin in hruai sual a, a muanawm tawp si lo va, kulh bang chhetê an han rem a, rinawm âwm takin chinai nên an zût mâm a;

¹¹chutianga zût mâmsaktute hnênah chuan, ‘A chim mai ang’ ti rawh. Ruah bawhawk a lo sûr ang a, rial lian pui puiin a rawn dêng ang a, thlipui a lo tleh ang a, a chim ngei ang.

¹²Bang chu a chim hnuah, ‘In zût mâmna kha khaw nge a nih tâk?’ an la ti dâwn lâwm che u ni?

¹³Chuvângin, LALPA chuan heti hian a ti: ‘Ka thinur avângin thlipui ka tlehtîr ang a, ka thinrim avângin ruah bawhawk ka sûrtîr ang a, min run êm avângin rial ka chhuttîr ang.

¹⁴Tichuan, chinai nêna in zût mawi chu a chim ang a, a lungphûm lam a lang rel rul ang a, a chim vek ang; nangni pawh in thi ang; tichuan, LALPA ka ni tih tu pawhin an la hria ang.’

¹⁵“Tichuan, bang chungah leh chinaia zût mâmtute chungah ka thinur ka hrithla ang a,

¹⁶‘A zût mâmtu, Jerusalem chungchâng, muanawm si lo muanawma hmutu Israel zâwlneite chu an thi a, bang pawh a awm tawh lo,’ tiin ka hrilh ang che u,” Lalpa PATHIAN chuan a ti.

¹⁷“Nang, Mihring fapa, i mi, hmeichhehote hi hmachhawn rawh: an duhzâwng ang ang an sawi lâwk a, an chungthu heti hian sawi rawh:

¹⁸Lalpa PATHIAN chuan heti hian a ti: ‘Nangni, hmeichheho, in chung a pik e. In bânah dawi hrui in bun a, mi hîp nân lu khuhna in siam a, in sa him nân ka mite hi in veh in veh dâwn em ni?

¹⁹Ka mite dâwta bumin barli vei khat lek leh chhang ah khat lek avângin thi lo tûr tûr in tithi a, thi âwm tak tak in zuah thung a, min tihmingchhe nasa a ni.’

²⁰Lalpa PATHIAN chuan heti hian a ti: ‘in bânbun, sava tawktarh anga mi in hîpna chu ka huatzâwng tak a ni. In bân aṭangin ka pawt thla ang a, sava anga in awhte chu ka chhuah ang.

²¹In inkhuhnate pawh ka pawtthlêr ang a, in kuta awm, ka mite chu, ka chhuah ang, in duh duha tih theih an ni tawh lo vang.

²²Tihmangan ka duh loh mi ṭhate chu dâwtin in tihṭhaih a, a nun theih nân mi sual chu a hawi kîr tûr kîr lo tûrin in fuihpawrh a.

²³Chuvângin, inlârna lem in hmuhte leh in hrilhlâwkna dik lote chu ka tihtâwpsak ang che u a, ka mite chu in kut ata ka chhan chhuak ang,’ ” a ti.