Read Mizo Lushai Ezekiela 14 Bible Online

Ezekiela 14 - Mizo Lushai bible

Ezekiela 14

¹Israel upa ṭhenkhat an lo kal a, ka hmaah an ṭhu a,

²LALPA chuan ka hnênah,

³“Mihring fapa, hêng mite hian milem an vuan tlat a, an bawhchhiatna chu an tân dâltu a ni a, min râwn tûr em an nih?

⁴Chuvângin, heti hian hrilh rawh: ‘Lalpa PATHIAN chuan heti hian a ti: Israel mi tu pawh, milem vuan tlata, an bawhchhiatna chu anmahni dâltu ni ṭhîn mah se, zâwlnei râwn tûra an lo kal chuan, milem an ngah êm avângin kei Lalpa hian na takin ka lo chhâng ang.

⁵Israel chhûngte hian an milem avângin min hawisan nâ a, an thinlung ka hmin theih nân ka lo chhâng dâwn a ni.’

⁶“Chuvângin, Israel chhûngte chu hrilh rawh: ‘Lalpa PATHIAN chuan heti hian a ti: Lo kîr ula, in milemte hawisan ula, in thiltih tenawmte chu bânsan rawh u.

⁷Israel chhûng zînga mi emaw, an zînga chêng vête emaw, milem vuan tlata, an bawhchhiatna dâltua hmanga, ka laka intihrangte, an chungchâng thu-a zâwlnei hmanga mi râwn tûra lo kal chu; Kei LALPA, kei ngei hian ka chhâng ang.

⁸Ka lo sawisa ang a, ka mite zîng ata ka theh chhuak ang. Miin an enbîk leh an sawi huai huai an ni ang a, LALPA ka nih hi an hria ang.’

⁹“Tin, zâwlnei chu buma awmin thu a sawi chuan, chu zâwlnei bumtu chu keimah ka ni a, ka kut a chungah ka lek ang a, ka mi Israel-te zîng ata ka tiboral ang.

¹⁰Zâwlnei sualna leh a râwntu sualna chu a inang reng a ni, an sual mawh chu anmahni ngeiin an phur ang.

¹¹Tichuan, Israel chhûngte chu ka hnên ata an kal bo tawh lo vang a, milem avângin an bawrhbâng hek lo vang a, an bawh chhiatna avângin an bawlhhlawh hek lo vang a, ka mite an ni tawh zâwk ang a, an Pathian ka ni ang,” Lalpa PATHIAN thuchhuak chuan a ti.

¹² LALPA chuan a sawi zêl a:

¹³“Mihring fapa, ram chuan ka chungah nasa takin thil sual ti sela, ka kut ka lek ang a, an chaw hmuhna hnâr ka chhut chahsak ang a, rilṭâmin mihring leh sa an thi ang.

¹⁴“Hêng mi ṭha pathum, Nova te, Danela te, Joba te hi awm ve mah se, an ṭhat avângin an nunna chauh an hum thei ang,” Lalpa PATHIAN thuchhuak chuan a ti.

¹⁵“Ram chhûngah ram sakawlh ka tirha, mi an seh hlum pheng phunga, rama mi an darh zawha, sa hlauh avânga kal ngam lohna hiala ka siamin,

¹⁶hêng mi pathumte hi awm ve mah se, an fanu fapate pawh an chhan thei lo vang; anmahni an inhum thei hrâm chauh ang a, ram chu a chhe zo vang. PATHIAN ka nih hi,” Mi nung Lalpa PATHIAN thuchhuak chuan a ti.

¹⁷“Ram chhûngah khandaih ka tirha, ‘Khandaihin ram hi fang chhuak sela, mi leh sa zawng zawng that rawh se,’ ka tih chuan,

¹⁸hêng mi pathumte hi awm ve mah se, an fanu fapate pawh an chhan thei lo vang, anmahni erawh chu an inhum thei hrâm ang. Pathian nung ka nih hi,” Lalpa PATHIAN thuchhuak chuan a ti.

¹⁹“Mi leh sa tiboral tûra hripui ka lêntîra, ka thinurna ka leih buak chuan,

²⁰Nova te, Danela te, Joba te awm ve mah se, an fanu fapate pawh an chhan thei lo vang. Kei LALPA, Pathian nung ka nih hi,” Lalpa PATHIAN thuchhuak chuan a ti: ‘An ṭhat avângin anmahni chu an inhum thei hrâm ang.’

²¹Lalpa PATHIAN chuan heti hian a ti: “Ka hremna na tak tak pali - khandaih te, ṭâm te, hripui te, sakawlh te, mihring leh sa tiboral tûra Jerusalem-a ka tirh hun chuan a va râpthlâk dâwn êm!

²²An fanu fapate zînga thi bâng an awma, in hnêna an lo kal chuan, an khawsak dân leh an thil tihte chu in hmu ang a, Jerusalem chunga thil ṭha lo ka tih zawng zawng chu tih âwm rêng in ti ve ang.

²³An khawsak dân leh an thil tihte in hmuh hunah chuan ka thil tihte chu chhan ṭha tak awm lo chuan ka ti lo tih in hria ang a, a âwm in ti ang,” Lalpa PATHIAN thuchhuak chuan a ti.