Read Mizo Lushai Ezekiela 16 Bible Online

Ezekiela 16 - Mizo Lushai bible

Ezekiela 16

²“Mihring fapa, Jerusalem chu a thil tenawm tihte hi hrilh rawh.

³Jerusalem hnênah heti hian a ti: ‘I pian leh mûrna chu Kanan mite ram a ni a; i pa chu Amor mi, i nu chu Hit mi a ni.

⁴I pian lai khân i laihrui âttu i nei lo va, bual fai i ni hek lo, chi an hnawih lo che a, puanin an tuam hek lo che.

⁵Tu mah en ṭha duh che an awm lo va, lainat chein tu man an bawihsâwm lo che. I pian hlim bawlhhlawh ang angin tâmlakah an hnutchhiah che a.

⁶Ka kal pahin thisen zînga i leng i leng chu ka hmu che a, chutia thisen zînga i awm chu i dam ka duh a, ‘I dam chhuak tûr a ni,’ ka ti che a.

⁷Hnim ang maiin ka tiṭhang che a, i ṭhangduang ta hle a, i lian tulh tulh a, i hmêl pawh a ṭha deuh deuh va. I hnute te a lo um a, i sam te pawh a ṭha ta hle a; mahse, saruak mai i la ni.

⁸Ka lo kal leh chuan ka han hmu che a, ngaihzâwng nei rual i lo ni ta a; tichuan, ka puan ka zâwn che a, i saruak chu ka khuhsak che a, ka ta i ni ta,” Lalpa PATHIAN thuchhuak chuan a ti.

⁹“Tin, tuiin ka bual che a, i thisen kaite chu ka sil fai a, hriak ka hnawih che a.

¹⁰Puan cheimawi ka sintîr che a, savun ṭha mi pheikhawk ka buntîr bawk che a.

¹¹Thawmhnaw ṭha ṭha ka bel che a, ngûn i bun a, khaidiat mawi ka awrhtîr bawk che kha.

¹²Hnâr vuah ka vuahsak che a, bengbeh ka behtîr bawk che a, lukhum mawi tak ka pêk bawk che kha.

¹³Tichuan, tangka leh rangkachakin i inthuam a, puan vâr pan chi leh maimaw puan i sin a, puan cheimawi i bih bawk a. Chhangphut ṭha chi i ei a, khawizu te, hriak te duhtâwkin i tlân a; i hmêl pawh a ṭha ta hle a ni, lalnu ni âwm tak i lo ni ta a.

¹⁴I hmêlṭhatzia chu a thang huai huai a, ka mawina ka bel che avângin i ṭha famkim a ni,” Lalpa PATHIAN thuchhuak chuan a ti.

¹⁵“Mahse, i hmêlṭhat chu i chhuang a, i hmingthan chu i hur phah ta a, lo kal apiang hnênah i inphalrai a, an tlâwm ta che a.

¹⁶I inthuamnate chu i hlîp a, hmunsâng i siam a, puan rawng chi hrang hrang nên i inchei a, tah chuan i inzuar ta a. Chutiang chu a la thleng ngai lo va, a awm leh ngai hek lo vang.

¹⁷Tangka leh rangkachak ka pêk che khân mipa lem i siam a, mi hur angin i khawsakpui a.

¹⁸Thawmhnaw cheimawi ka pêk che chuan milem chu i thuam a, hriak leh rimtui ka pêk che chu an hmaah i hlân a.

¹⁹Chhangphut ṭha chi te, hriak te, khawizu tein ka châwm che a, chûng chu milem tlawn nân an hnênah i hlân a, chutiang chuan i ti ṭhîn,” Lalpa PATHIAN thuchhuak chuan a ti.

²⁰“Chulovah pawh, ka tâna i hrin, i fanu fapate hâlral atân an hnênah i hlân a.

²¹Hur theuleu tâwk ti lova, ka fate leh zêl milem hmaa hâl ral tûra i hlan hi thil namên em ni?

²²Hêng thil tenawm hi tia i hur tak êm avângin, i naupan lai, saruak mai i nih lai, thisen zînga i leng i leng laite kha i hre ta lo a nih hi le!”

²³Lalpa PATHIAN chuan heti hian a ti: “I chung a pik e, i chung a pik e, hêng thil sual i tih bâkah

²⁴kawng sîrah milem biakna leh inzawrhna tûr i siam thliah thluah a.

²⁵Kawng langsâr laiah chûng hmunsâng chu i sa a, i hmêlṭhat chu i titenawm a; lo kal apiang i mal i hlîmsak zêl a, nawhchizuar satliah pawh i nih loh hi.

²⁶I ṭhenawm, Aigupta, taksa lian pui pui hnênah i inhralh a, mi tithinur tûrin i hur a zual a.

²⁷Ngai teh, i chungah kut ka lek ta. I chanpual ṭhîn chu ka hnûk kîr ta; nangmah hawtu, i khawloh zahpuitu Filistia mite hnênah ka pe ta che.

²⁸Chu chu duh tâwk lovin Asuria-ho hnênah pawh i inzuar a, i inphalrai a; mahse, i kham chuang lo.

²⁹Babulon mi, sumdâwngho hnênah pawh i inphalrai a, i kham chuang hek lo.

³⁰Zah bosal tawh nawhchizuar ang maiin i chêt hi, i va hur teh hiam êm!” Lalpa PATHIAN thuchhuak chuan a ti.

³¹Kawng aṭanga langsâr laiah milem biaknate i siam a, kawtthlêr tinah inzawrhna hmun i nei a; mahse, nawhchizuar pawisa mamawh ang hi i ni ve lo.

³²Mahni pasal hmangaih lova uiresana, mi dang daih pawm ta ang hi i ni.

³³Nawhchizuarte hi chuan hlawh an nei ṭhîn, nang erawh chuan mutpuitu che hlawh i pe thung a, ram hla tak taka mi i ṭhâm khâwm hlawm hi.

³⁴Nawhchizuar danglam tak i ni, miin an sâwm lo che a, nangin i sâwm thung a; hlawh an pe lo che a, nangin i pêk thung hi.”

³⁵Nang mi hurnu, LALPA thu hi ngaithla teh,

³⁶Lalpa PATHIAN chuan heti hian a ti: “I bawlhhlawh êm mai, i ngaihzâwngte i hurpuina lamah i saruakna a lang zo ta: thil tenawm milemte i bia a, i fate thatin an hnênah i hlân a.

³⁷Chuvângin, i ngaihzâwng rual, i tlawn hawm hawmte leh i huatzâwngte pawh ka ko khâwm ang a, kil tina din hual tûr chein ka hruai khâwm ang. An hmaah ka hlîm ang chia, an hmu fai leuh ang che.

³⁸Pasal uiresantu leh tualthattu chungthu an rêl ang hian i chungthu ka rêl ang. Min run êm avângin thinur takin i chungthu ka rêl dâwn.

³⁹An kutah ka pe ang chia, hmunsâng leh inzawrhna hmun i siamte chu an tichhe vek ang; i silhfênte an hlihsak ang chia, i thil mawite chu an la ang a, saruakin an dah ang che.

⁴⁰Tlâng an pun ang a, lungin an dêng ang chia, ngûnhnâmin an chhun ang che.

⁴¹I inte chu an hâl ang a, hmeichhe dang hmuhah an hrem ang che; i hurna ka titâwp ang a, i ngaihzâwngte chu thilpêk i pe leh tawh hek lo vang.

⁴²Tichuan, ka thinur chu a dai ang a, min run êmna chu a reh ang a, ka ngawi tawh ang, ka thinrim tawh lo vang.

⁴³I têt lai kha i hriat reng tawh loh avâng leh hêng thil i tih ṭhinte hian min tihnat êm avângin ka thungrûl ang che,” Lalpa PATHIAN thuchhuak chuan a ti. “Thil tenawm tinrêng tih belhchhahin i hur mualpho zêl a ni lâwm ni?

⁴⁴Ngai teh, he ṭawng tuallêng tak hi hmangin, ‘nu siar, nu siar’ an ti lut lut dâwn che a ni.

⁴⁵I nu, mahni pasal leh fate ngeitu fanu ngei zawng i lo nih tak hi; mahni pasal leh fate ngeitu laizâwn i lo ni a. I nu chu Hit mi a ni, i pa chu Amor mi.

⁴⁶I u Samaria chu a fanute nên, i ram hmâr lamah a awm a. I nau Sodom chu a fanute nên, chhim lamah a awm.

⁴⁷An awm dân anga awm ve lovin an thiltih tenawmte chu i ti ve ngai lo va; mahse, tûn maiah khân an aia hluar zâwkin i khawsa ta.

⁴⁸Lalpa PATHIAN thuchhuak chuan heti hian a ti: “PATHIAN nung ka nih hi, i nau Sodom tih ngai loh, a fate pawhin an tih ngai loh, nang chuan i fate nên in tih tâk hi.

⁴⁹Ngai teh, i nau Sodom sualna chu hei hi a ni: a chapo va, ei tûr a ngahin a fanute nên nuam an chên der der a, retheite leh mangangte an chhawmdâwl ngai lo.

⁵⁰An inchhuang êm êm a, ka hmaa thil tenawm an tih avângin ka nuai bo va ni.

⁵¹Samaria pawhin i thil sual tih chanve pawh a ti lo, an aia nasa zâwkin thil tenawm i ti a; i thil tih a tenawm êm avângin i u thil tenawm tih chu a lan nêp tâk zâwk hi.

⁵²I laizâwnte aia thil tenawm i tih nasat zâwk avângin an tuar âwma i ngaih aia nasa zahna i tuar ang; an aia i sualna a tenawm zâwk avângin anni chu ṭha viau âwmin an lang a ni; zakin sen awp awp rawh, i laizâwnte zawng mi ṭha tak ni âwm in an lan tâk hial hi.”

⁵³“Sodom leh a fate chu ka din chhuahtîr leh ang; Samaria leh a fate pawh ka din chhuahtîr leh ang; an rual chuan nang pawh ka din chhuahtîr ang che.

⁵⁴I la inzahpui ang a, i thiltihte avângin i la zak hle ang, anni pawh an ngaih a ṭha sawt ang.

⁵⁵I nau Sodom leh i u Samaria chu an fate nên an ngai an awh leh ang; nang pawhin i fate nên ngai in awh leh ang.

⁵⁶I ṭhat lai khân i nau Sodom chu kamchhe tleuhna takah i hmang ṭhîn a ni lâwm ni?

⁵⁷I sualzia a lang ta a, anni ang bawk i ni, i vêla awm, Edom leh Filistia leh an faten, nangmah hawtute chuan, an hmuhsit ve tâk che hi.

⁵⁸I thiltih tenawm leh i hurna hi a mawh chu i phur dâwn a ni,” LALPA thuchhuak chuan a ti.

⁵⁹Lalpa PATHIAN chuan heti hian a ti: “I tih angin ka thungrûl ve ang che; i thutiam ngainêpin thuthlung chu i bawhchhia a.

⁶⁰Mahse, kei chuan i naupan laia i hnêna ka thuthlung kha ka hre reng ang a, kumkhaw thuthlung ka siamsak ang che.

⁶¹I awm dân kha i hre chhuak ang a, i laizâwn, i u leh i naute chu i pawm leh hunah i la zak hle ang; ka thuthlungah tel lo mah se anni chu i fa atân ka pe dâwn che a ni.

⁶²Nang nêna ka thuthlung chu ka tinghet ang a, LALPA chu ka ni tih i hria ang.

⁶³I thil sual tihte ka ngaihdam hunah chuan i sual ṭhinzia kha i hre chhuak ang a, i inzahpui êm êm avângin eng mah i sawi ngam lo vang,” Lalpa PATHIAN thuchhuak chuan a ti.