Read Mizo Lushai Ezekiela 17 Bible Online

Ezekiela 17 - Mizo Lushai bible

Ezekiela 17

¹ LALPA chuan heti hian mi rawn hrilh a:

²“Mihring fapa, Israel-te hnênah thu khirh leh tehkhin thu sawi rawh,

³‘Lalpa PATHIAN chuan heti hian a ti: Mupui lian tak, thla hlai pui nei, Fêp buk mawi tak nei chu Lebanon tlângah a lo thlâwk a, Sidar lêrah a fu a.

⁴A lêr zîkno chu a thliak a, Sumdâwng mi ramah a thlawhpui a, Sumdâwnna khawpuiah a phun ta a.

⁵Israel rama grep ṭang a la bawk a, Lei ṭha hmunah a phun a, Tui tamna hmunah chuan a tlar a, Tuipuisuthlah ang hian.

⁶A lo ṭhang a, grep buk hniam ṭawi tak a lo ni a, A zârte chuan mupui lam chu a pan a, A zung chu lei thûk takah a zâm lût a. Tichuan, grep chu a lo chawr buk ta luai a.

⁷Mupui lian tak dang a awm a, Thla hlai tak leh fêp buk tak a nei bawk a, A ṭo hmun ata grep zung leh zâr chuan, Tui a hmuh tam zâwk theih nân a lamah a zâm ta a.

⁸Ram ṭha tak, tui tamnaah Grep kûng lian tak, duah hluah Rah tup tûra phun sawn a ni.

⁹Lalpa PATHIAN chuan heti hian a ti: A puitling thei dâwn em ni? A phuntu chuan a zung chu pawt phawiin A rahte chu paihin A chawrnote chu a tivuai mai lâwng maw? Pawt phawi tûrin mi tam tak emaw, Mi chak tehchiam emaw a ngai si lo va?

¹⁰Ngun taka phun zawng a ni ngei mai a, Mahse, a nung thei dâwn em ni? Khawchhak thliin a rawn chhêm ang a, A uai-in a ṭona hmunah chuan A vuai mai dâwn lâwm ni?’ Ti rawh,” min ti a.

¹¹ LALPA chuan heti hian mi hrilh a.

¹²“Hel hmang chhûngte chu hrilh rawh. He thil awmzia hi an hre lo vem ni? Ngai teh, Babulon lal chu Jerusalem-ah a lo kal a, lal leh miliante a man a, Babulon-ah a kawi ta a.

¹³Lal fa zînga pakhat chu thu a thlunpui a, chhia a chhamtîr a; milian dangte chu a hruai bo va.

¹⁴Ram chu a tlâwm a, an inlek leh loh nân leh thuthlung an bawhchhiat loh nân chûng miliante chu a hrêng a.

¹⁵Mahse, a hel ta a, Aigupta ramah sakawr leh sipai tam tak dîl tûrin palai a tîr a; a hlawhtling ang em? Chutiang titu chu a him dâwn em ni? Thuthlung bawhchhetu chu a inhum thei dâwn em ni?

¹⁶‘Mi nung ka nih hi,’ ” Lalpa PATHIAN thuchhuak chuan a ti. Lala dahtu Babulon lal hnêna a chhechham leh thuthlung a bawhchhiat avângin chu lal chu Babulon-ah a thi ngei ang.

¹⁷Mi tam tak tihlum tûra lei an chhûn pâwna, hual bang an siam hnan hnuah chuan Farawa sipai huaisente leh a ṭhuihruaite chuan an chhan thei lo vang.

¹⁸A chhechham chu a ngaihthah a, thuthlung chu a bawhchhia a, bân phar meuhva a nemngheh tawh si chu bawhchhiaa hêng thil hi a tih tak avângin a him lo vang.

¹⁹Chuvângin, Lalpa PATHIAN chuan heti hian a ti: ‘Mi nung ka nih hi; ka thutiam a hmusit a, ka thuthlung a bawhchhe vei a, ama chungah ngei ka ṭuan dâwn a ni.

²⁰Lênin ka khuh ang a, ka thangah ka awhtîr ang a, Babulon-ah ka hruai ang. Tichuan, mi phatsan avângin a chungthu ka rêl ang.

²¹A sipai tlân darhte chu khandaiha sah hlum an ni ang a, a thi bangte chu kil tin kil tangah an darh ang. Chûng sawitu chu kei, LALPA hi ka ni tih in hria ang.”

²²Lalpa PATHIAN chuan heti hian a ti: “Kei hian sidar thing sâng ziding Zîkno chu ka thliak ang a, Keimah ngeiin tlâng sâng zo takah ka phun ang.

²³Israel tlâng sângah chuan ka phun ang a, A duahin a rah tup ang. Sidar thing lian tak a ni ang a, a buk hlimah chuan Sava tinrêng an chêng ang a, bu an chhep ang.

²⁴Rama thing zawng zawngin, kei Lalpa PATHIAN hian thing sângte chu ka tihniam a, a hniamte chu ka tisâng a, Thing hring chu ka tiro va, a ro chu ka tihring a, Tih an hria ang. Kei LALPA hian ka sawi tawh chu ka ti bawk ṭhîn.”