Read Mizo Lushai Ezekiela 18 Bible Online

Ezekiela 18 - Mizo Lushai bible

Ezekiela 18

¹ LALPA chuan heti hian min hrilh leh a:

²“ ‘Paten grep thûr an ei a, an fate hâ a ṭim,’ tih upate thu hi Israel ramah engtiziaa ti chhên nge an nih?

³‘Mi nung ka nih hi,’ ” Lalpa PATHIAN thuchhuak chuan a ti. “Israel-te zîngah he upate thu hi an sawi leh tawh lo vang.

⁴Mi zawng zawng nunna hi ka ta a ni a, Pa nunna leh a fapa nunna pawh ka ta a ni. Ngai teh, thil sual titu chu a thi ngei ang.

⁵Miin thil ṭha a tih a, dik taka ro a rel ṭhina,

⁶bâwlhmun ruai ṭhehnaa a tel ve lohva, Israel chhûngte milem a biak ve lohva, a ṭhenawmte nupui a tihbawrhbân lohva, hmeichhe fel loh lai a khawih lohva,

⁷tu mah tiduhdah lovin an thil pûk dahkhamte a pêk kîr zêla, tu mah a rûksak lohva, rilṭâmte chaw a pêk a, saruakte silhfên a sintîr ṭhina,

⁸a pung ûma a pûktîr lohva, thil ṭha lo laka a insûm tlat a, hleih nei lova mi chungthu a rêlsak ṭhin a,

⁹Ka thupêkte a zawma, ka Dânte a vawn chuan chu mi chu mi dik tak a ni a, a nung ngei ang,” LALPA PATHIAN thuchhuak chuan a ti.

¹⁰“Chutiang mi chuan rûkhmang leh tual thah chîng fapa nei sela,

¹¹chu a fapa chuan a pa tih ang ti ve duh lovin bâwlhmun ruai ṭhehnaah te a tela, a ṭhenawmte nupui a tihbawrhbâna,

¹²rethei leh mangangte a tihduhdah a, mi rawk a chîna, thil pûk dahkham a pêk kîr duh lohva, milem biain thil tenawm a tih a,

¹³a pung ûma a pûktîra, hêng thil tenawm hi a tih ṭhin avângin a thi mawlh ang, a nung lo vang.

¹⁴“Chu mi chuan fapa hring ve se, chu a fapa chuan a pa thil sual tih zawng zawng chu hmuin a rilru a siam a, a ti ve duh lo va.

¹⁵Bâwlhmun ruai ṭhehnaah a tel duh lo va, Israel chhûngte milem chu a be ve duh lo va, a ṭhenawmte nupui a tibawrhbâng duh hek lo.

¹⁶Tu mah a tiduhdah lo va, pûk dahkham a la duh lo va, tu mah a rûksak lo va, rilṭâm hnênah chaw a pe a, saruak silhfên a sintîr a,

¹⁷retheite lakah a kawm lo va, a pung a ûm hek lo. Dik takin thil a ti a, ka thupêk a zâwm a, chu mi chu a pa bawhchhiatna avâng chuan a thi tawp lo vang.

¹⁸A pa chuan mi a tiduhdah ṭhîn a, mahni unau ngeite pawh a rawk a, a mite chungah thil ṭha lo a ti ṭhîn a; chu a pa chu a bawhchhiatna avâng chuan a thi ngei tûr a ni.

¹⁹‘Engah nge fapa chuan a pa sual mawh chu a phurh loh vang?’ in ti ṭhîn a; nimahsela, fapa chuan dik taka thil a tih a, ka thupêkte a pawm vek a, a zawm chuan a nung ngei ang.

²⁰Thil sual titu chu a thi ang; fate chuan an pa sual mawh an phur lo vang. Mi dik chuan a dik man a têl ang a, mi sual chuan a sual man a hmu ang.

²¹“Mi sual chu a bawhchhiatna ata a lamlêta, ka thupêk te vawnga thil dik leh ṭha a tih chuan a nung ang a, a thi lo vang.

²²A thil sual tihte chu hriat reng a ni lo vang a, thil ṭha a tih avâng chuan a nung ang.

²³Mi sual an thih hi ka lâwmzâwng em ni?” Lalpa PATHIAN thuchhuak chuan a ti; “An lo lamlêt a, an nun hi ka lâwmzâwng a ni zâwk lâwm ni?”

²⁴“Mi ṭha pawhin thil ṭha hawisanin thil sual a tih a, mi sualte tih anga thil tenawm tinrêng a tih ve chuan a nung dâwn em ni? A thil ṭha tihte chu hriat reng a ni tawh lo vang a, a thil sual tih leh a bawhchhiatnate avâng chuan a thi mawlh ang.

²⁵“ ‘LALPA hian mumal neiin thil a ti lo ve a’ in ti ṭhîn.Israel chhûngte u, ngaithla teh u, mumal nei lovin thil ka ti lo va, in awm dân hi a mumal lo a ni zâwk.

²⁶Mi ṭhain thil ṭha tih a bânsan a, thil sual a tih chuan a thi ang, thil sual a tih avâng ngei chuan a thi ang.

²⁷Mi sual pawhin a thil sual tih ṭhin a sima, thil dik leh ṭha a tih chuan a nun a humhim ang.

²⁸A rilru a siam a, a sualte a bânsan vek chuan a nung ang a, a thi hauh lo vang.

²⁹Israel chhûngte chuan ‘LALPA hian mumal neiin thil a ti lo,’ an ti a. Israel chhûngte u, mumal nei lovin thil ka ti lo va, nangni awm dân hi a mumal lo a ni zâwk lâwm ni?

³⁰Chuvângin, Israel chhûngte u, mi tin an awm dân zêlin an chungah ro ka rêl ang, LALPA PATHIAN thuchhuak chuan a ti. Lo hawi kîr ula, in thil sual tih zawng zawng ata lo lamlêt rawh u; tichuan, in tân dâltu sual a ni tawh dâwn lo nia.

³¹In bawhchhiatnate chu paih bo ula, thinlung thar leh rilru thar pu rawh u. Israel chhûngte u, engah nge in thih mai ang?

³²Mi an thi hi ka lâwmzâwng a ni nêm,” LALPA PATHIAN thuchhuak chuan a ti. “Lam lêt ula, nung rawh u.”