Read Mizo Lushai Ezekiela 19 Bible Online

Ezekiela 19 - Mizo Lushai bible

Ezekiela 19

¹“Israel miliante sûnna hla phuah la, heti hian ti ang che:

²‘I nu chu sakeibakneipui a ni a, Sakeibaknei vânglai zînga bawkin no a châwm a,

³Kawlh tak pakhat a châwm lian a, A puitlin chuan sa a seh thei hle a, Mihring pawh a seh ta a.

⁴Hnam dangte chuan an hriatin, Hum an lai a, a tla ta a; Thîr kawl an buntîr a, Aigupta ramah an hruai a.

⁵A nghahfâk, a beisei ber chu A bo ta tih a hriat chuan, No dang a châwm lian leh a,

⁶A puitlin chuan sakeibaknei zîngah a tla ve a, Sa a seh thei ta hle a, Mihring pawh a seh ta a.

⁷An kulhte a tichhia a, An khuate a tiram a, A rûm hlauvin chhuakvâk ngam rêng an awm lo.

⁸Hnam dangte chuan an rawn bei a, Kil tin aṭangin an lo kal, Lênin an han khuh a, An hum laihah a tla ta a.

⁹Thîr kawl an buntîr a, bâwmah an khung, Israel tlângramah te A rûm an hriat tawh loh nân Ripa khungin Babulon lal an pe.

¹⁰I nu chu grep hrui lui kam huana hi a ni. Tui a ṭhat avângin a duah hluah hluah a, A rah duh êm êm.

¹¹Lal tianga hman tlâk, ṭang khauh pui pui a nei a, A kûng chu a sâng hle a, a buk luai a, An en huai huai mai a ni.

¹²Thinurna avângin pawh phawn a ni a, Leiah an paih ta a, Khawchhak thliin a chhêm ro va, A rah a ṭîl zo ta. A ṭang khauh pui puite a ro zo va, A kâng ta a.

¹³Tui vânna ramro thlalêrah chuan An phun sawn a.

¹⁴A zâr aṭang chuan mei a lo chhuak a, A rahte chu a kâng zo ta, Lal tiang tlâk ṭang lian a nei ta lo.’ Hei hi sûnna hla a ni a, sak fo tûr a ni.”