Read Mizo Lushai Ezekiela 20 Bible Online

Ezekiela 20 - Mizo Lushai bible

Ezekiela 20

¹Kum sarih kum, thla ngana, tahrik ni sâwm ni chuan Israel upate chu LALPA râwn tûrin an lo kal a, ka hmaah an ṭhu a.

³“Mihring fapa, Israel upate hnênah thu sawi la, heti hian ti ang che: Lalpa PATHIAN chuan heti hian a ti: mi râwn tûrin in lo kal a ni maw? Mi nunga chu ka nih hi, nangni râwn tûr em ka nih?” Lalpa PATHIAN thuchhuak chuan a ti.

⁴“Mihring fapa, anniho hi i chachhuah dâwn lâwm ni? An pate thil tenawm tih chu hrilh la, Lalpa PATHIAN chuan heti hian a ti:

⁵Israel, ka mi thlan, Jakoba thlahte chungah ka bân ka phar a, kut phar meuhvin, ‘Kei hi in Pathian, LALPA chu ka ni,’ tiin Aigupta ramah khân ka inhriattîr a.

⁶Chumi ni chuan Aigupta ram ata, ka ram zawn chhuah, hnutetui leh khawizu luanna ram, ram azawnga ram ṭha bera hruai lût tûr che uin thu ka tiam a.

⁷An hnênah, ‘In duhzâwng, thil tenawmte chu paih ula, Aigupta ram milemte chuan intibawrhbâng suh u, kei hi in Pathian, LALPA chu ka nih hi,’ ka ti a.

⁸Mahse, ka chungah an hel a, ka thu tu man an ngaithla duh lo va, an duhzâwng thil tenawmte chu an paih duh lo va, Aigupta ram milemte lah an thlah duh hek lo; tichuan, Aigupta ramah ngei an chungah ka thinrim ka hrithla ang a, ka thinur ka leihbua ang ka ti hial a.

⁹Mahse, an awmna hnamte hmuhah ka hming a chhiat loh nân ka ti ta êm lo va, Aigupta ram aṭangin ka hruai chhuak dâwn tih ka lo puang tawh si a.

¹⁰Chutichuan, Aigupta ram aṭangin thlalêr ka hruai thleng a.

¹¹Miin an zawma an nun theihna tûr, ka thupêkte chu, ka hrilh a, ka Dân chu ka zirtîr a.

¹²“Anni nêna kan inkâr chhinchhiahna atân sabat ni pawh ka ruatsak a, anmahni la hrangtu ka nih an hriat theih nân.

¹³Mahse, Israel chhûngte chuan thlalêrah khân min helsan a, miin an zawma an nun theih nâna ka thupêkte chu an zâwm duh lo va, ka Dânte an hawisan a, ka sabat nite lah an bawhchhe zêl a; tichuan, thlalêrah, anmahni timang tûrin ka thinur chu an chungah ka leih nâng emaw ka ti hial a.

¹⁴Mahse, ka hruai chhuah lai hmutu hnam dangte mit hmuhah ka hming a hliau loh nân ka ti ta lo va.

¹⁵Thlalêrah chuan ka pêk tûr ram, hnutetui leh khawizu-a luang, ram azawnga ram ṭha berah chuan ka hruai lût lo vang tiin ka tiam ta hial a.

¹⁶An milemte ngaina zâwkin ka Dânte an hnâwl a, ka thupêkte an zâwm duh lo va, ka sabat nite an bawhchhe ta a ni.

¹⁷Mahse, thlalêra tihhlum êm atân chuan ka khawngaih a, ka tiboral vek ta lo va ni.

¹⁸Thlalêrah khân an fate hnênah, ‘In pate thupêk zâwm suh u, an dânte pawisa hek suh ula, an milemte chuan intibawrhbâng hek suh u.

¹⁹kei hi in Pathian, LALPA chu ka ni, ka thupêkte zâwm ula, ka Dânte pawisain zâwm rawh u.

²⁰Ka sabat nite serh ula; tichuan, kei leh nangni inkâra chhinchhiahna a ni ang a, in Pathian, LALPA chu ka ni tih in hre ṭhîn dâwn nia’ ka ti a.

²¹“Mahse, an fate pawh chuan, min helsan a, miin an zawma an nun theihna tûr, ka thupêkte chu, an awih duh lo va, ka dânte chu an zâwm hek lo; ka sabat nite chu an bawhchhia a, thlalêrah khân ka thinrim ka hrîkthlâk nân an chungah ka thinur ka leih nâng emaw ka ti hial a.

²²Mahse, ka hruai chhuah lai hmutu hnam dangte hmuhah ka hming a chhiat loh nân ka insûm a.

²³Thlalêrah ngei khân, ‘Hnam dang zîngah ka thawn darh ang a, ram tinah ka tidarh ang,’ tiin ka tiam ta a.

²⁴Ka dânte an zâwm duh lo va, ka thupêkte an awih lo va, ka sabat nite bawhchhiain an pate milemte chuan an mit a la ta zâwk si a.

²⁵Chuvângin, an ṭhatna tûr ni lo dân ka siam a, an nun theih lohna tûr thu ka pe bawk a;

²⁶an thilhlante chuan anmahni ka intihbawrhbântîr a, an fa tîrte pawh inthawi nân an hmang ta a ni; thiam loh an chana, kei hi LALPA chu ka ni tih an hriat theih nân.

²⁷“Chuvângin, Mihring fapa, Israel chhûngte hnênah heti hian sawi rawh, Lalpa PATHIAN chuan heti hian a ti: In paten min phatsan avângin min tihmingchhe hle a ni.

²⁸Pêk ka tum ram ka hruai thlen khân tlâng sângte leh thing hringte an han hmu a; tah chuan an inthawinate an hlân ta mai a; min elsênin thilpêkte an hlân a, rimtuite an hâl a, an thil hlan uainte an bun chhuak a.

²⁹‘Hêng hmunsângahte hian engtizia nge in kal?’ ka ti a: chûng chu tûn thlengin ‘hmunsâng’ tih a la ni.

³⁰Chuvângin, Israel chhûngte hrilh rawh, Lalpa PATHIAN chuan heti hian a ti: In pate hnung zuiin in intibawlhhlawh a, an thil tenawm tih in ti zui zêl a.

³¹Milem hnêna thil hlan leh inthawi nân in fate hâl ralin vawiin thleng hian in intibawrhbâng si a, Israel chhûngte u, min râwn tûra lo kal tûr em in nih? Mi nung ka nih hi, Lalpa PATHIAN thuchhuak chuan a ti. Nangni râwn tûr ka ni lo ve.

³²Hnam dang, he rama chi hrang hrang awmte tih dân angin thing leh lung biak in tum ta tlat si a; mahse, in be hlek lo vang.”

³³“Mi nung ka nih hi,” Lalpa PATHIAN thuchhuak chuan a ti; “Ka hrilh lâwk a che u; in chungah dîm lo tawpin ka kut ka lek ang a, in chungah lal ka hrawt ang.

³⁴Hnam dang zîng, in darhna ram aṭanga ka hruai kîr hunah che u ka thiltihtheihzia leh ka thinurzia ka entîr ang che u.

³⁵Hnam dang ramah, thlalêrah chuan ka hruai ang che u a, inhmachhawnin in chungthu ka rêl ang.

³⁶“Aigupta ram thlalêra in pate chungthu ka rêl ang khân in chungthu ka rêl ang,” Lalpa PATHIAN thuchhuak chuan a ti.

³⁷“Talhfiak nên ka vil ang che u a, ka thuthlungah ka luhtîr tlat ang che u.

³⁸In zînga hel leh ka chunga thil sual titute chu ka thian ang a, an awmna ram ata ka hruai chhuak ang a; mahse, Israel ram an thleng ve lo vang; tichuan, kei hi LALPA chu ka ni tih in hria ang.

³⁹“Nangni Israel chhûngte u, Lalpa PATHIAN chuan heti hian a ti: Mahni milem chu pan ṭheuh ula, chibai bûk mai teh u. Ka thu in ngaithla duh si lo! Ka hming thianghlim hi in thilhlan leh milemte chuan tibawrhbâng tawh suh u.

⁴⁰“Israel ram, ka tlâng thianghlimah chuan, Israel chhûng tin, in zavaiin, chu ramah chuan ka rawng in bâwl ang a, tah chuan ka lo lâwm ang che u a, in thên thilhlan te, rah hmasa in hlan te, in thil thianghlim hlan te ka lo dawng ang.

⁴¹“Hnam dang zîng ata ka hruai chhuah che u a, in darhna ram ata ka hruai khâwm hunah che u chuan in thil rimtui hlan nên ka lo lâwm ang che u a, hnam dangte chuan ka thianghlimzia an hmu ang.

⁴²“Kut phar meuhva in pate hnêna pêk ka tiam ram ka thlen hunah che u kei hi LALPA chu ka ni tih in hria ang.

⁴³In khawsak dân leh in thiltih a in intihbawrhbân ṭhin te kha in hre chhuak ang a, thil sual in tih avângin nangmahni in inngei hle ang.

⁴⁴Aw Israel chhûngte u, ka hming avângin, in awm dân sual leh chimawm taka thil in ti ṭhin ang lova in chunga thil ka tih hunah chuan LALPA chu ka ni tih in hria ang,” Lalpa, PATHIAN thuchhuak chuan a ti.

⁴⁵ LALPA chuan ka hnênah:

⁴⁶“Mihring fapa, chhim lam hawi la, chhim lam ram demin thu sawi la, chhim lam ngaw chungthu puang rawh.

⁴⁷Chhim lam ngaw chu ngaithla tûrin hrilh la: Lalpa PATHIAN chuan heti hian a ti: Ngai teh, i chungah mei ka tichhuak ang a, thing hring leh ro, a vaiin a kâng vek ang. A alh chu tu man an ṭhelh thei lo vang a, chhim leh hmârah a darh ang a, mi tin hmêl a em ût vek ang.

⁴⁸Kei LALPA hian ka tihkan a ni tih tu pawhin an hria ang a, tu man an ṭhelh thei lo vang,” a ti a.

⁴⁹Kei chuan, “Khai a! Lalpa PATHIAN, ‘thu khirh hlîr a sawi ṭhîn,’ min ti dêr tawh asin,” ka ti a.