Read Mizo Lushai Ezekiela 21 Bible Online

Ezekiela 21 - Mizo Lushai bible

Ezekiela 21

¹ LALPA chuan heti hian a sawi a:

²“Mihring fapa, Jerusalem lam hawi la, hmun thianghlim demin thu sawi la, Israel ram chungchâng thu puang rawh;

³Israel ram hnênah heti hian ti rawh: LALPA chuan heti hian a ti: Ngai teh, i chungah ka ṭuan dâwn, ka khandaih chu a pai ata ka phawi ang a, in zînga mi ṭha pawh, mi sual pawh ka râwt vek dâwn.

⁴Mi ṭha leh mi sual ka râwt dâwn avângin chhim leh hmâra mi zawng zawng chungah khandaih ka lek dâwn a ni.

⁵Tichuan, tu pawhin kei LALPA hian khandaih chu ka phawi a, ka khung leh dâwn lo tih an hria ang.

⁶“Nang mihring fapa, rîl pawh thlâk ang chûlin chiau la, an hmuh ngeiah lungchhe takin ṭap rawh.

⁷‘Engati nge i chiau tak chûl?’ an tih che chuan, ‘A sawi chu a lo thlen mai dâwn avângin ka chiau a ni. Mi zawng zawng an zâm ang a, an bân tha a zâwi ang a, an thlabâr ang, an khûpte pawh a sâwi hlawk hlawk ang,’ ti ang che. Ngai teh, a lo thleng ṭêp a ni,” Lalpa PATHIAN thuchhuak chuan a ti.

⁸ LALPA chuan heti hian mi hrilh a:

⁹“Mihring fapa, hetiang hian puang rawh, LALPA chuan heti hian a ti: Khandaih chu tah hriam a ni a, Khandaih chu nawh tlêt a ni ta.

¹⁰Insah nân tah hriam a ni a, Kâwlphe anga de zawr zawr tûra nawh tlêt a ni. Hlim rual a ni nêm! Ka mite hian zilhna an pawisak hauh loh hi.

¹¹Hman theih maiin khandaih tah a ni tawh; A ni, thîr hriama nawh tlêt a ni, Thattu kenah peih a ni ta.

¹²Mihring fapa, ṭap la, chiau vawng vawng rawh, Ka mite tuar tûr a ni si, Ka mite chu Israel miliante nên khandaiha sah an ni dâwn. Mangangin i khêl bêng rawh.

¹³Ka mite hi fiah an ni a, An sim loh chuan an boral ang,” Lalpa PATHIAN thuchhuak chuan a ti.

¹⁴“Nang mihring fapa, thu puang rawh, I kutphah chûm la, Khandaih chuan vawi hnih vawi thum sât sela, Sât sât rawh se; Khandaih hrâng a ni a, Khandaih lian pui, hlauhawm tak a ni, An vêla mite thahna tûr chu.

¹⁵Ka mite chu a tizâm a, an tlu zo ta, Inthahna khandaih, kâwlphe anga de zawr zawr tûr, Kulh kawngka tinah ka dah ta, Mi thah nân khêk tlat a ni.

¹⁶Khai le, ding lam leh vei lam I hawi lam apiang sâm zêl mai teh.

¹⁷Kei pawhin ka kut ka lo chûm ang a, Tichuan, ka thinur a dai tawh ang. Kei LALPA hian ka sawi tawh hi.”

¹⁸ LALPA chuan heti hian mi hrilh a:

¹⁹“Nang mihring fapa, ram pakhat aṭanga kawng lo chhuak pêng ta, khandaih nêna Babulon-ho kal zêlna tûr kâwk chu chhinchhiah rawh.

²⁰A pêng laiah chuan kutkâwk târ la, pakhat chuan Amon khua Raba kawng kâwk sela, pakhat chuan Jerusalem kulh kawng kâwk rawh se.

²¹Babulon lal chu pêngah chuan, a kalna tûr zâwk hriat nân aienin thal a thing a, milem a râwn a, an inthawina sa thin chu a en vung vung mai.

²²Jerusalem hawi zâwnga tla, aienna thal chu a kut ding lamin a chhar a, kulh bang chhut chhiatna va bun tûr te, lei chhûng pâwnga hual bang siam tûrte niin a ngai ta a.

²³“Jerusalem mite chuan Babulon nêna thu an lo thlun tawh avângin aienna dik lovah an ngai a; mahse, an sualzia hriat chhuahtîr tûr a ni a, man an ni ngei dâwn.

²⁴Chuvângin, Lalpa PATHIAN chuan heti hian a ti: In bawhchhiatna chu hriat reng a ni a, in sualte chu puanzâr a ni a, in thiltih apiangah in bawlhhlawhzia a lan hi: hrem in ni dâwn, hmêlmain an man dâwn a che u.

²⁵“Nang, Israel-te hotu, mi sual, thah tûr i ni. I thih ni chu a lo thleng ta, bawhchhe tûr i awm tawh lo vang.

²⁶Lalpa PATHIAN chuan heti hian a ti: I lallukhum leh i diar chu phawng rawh, a ngaiin thil a awm dâwn lo; mi tlâwmte chu chawisân an ni ang a, mi liante chu tihtlâwm an ni ang.

²⁷A chhe dâwn, a chhe dâwn, ka tichhe dâwn; mahse, a neitu dik tak tûr a lo kal hma chu ka ti lo vang, a hnênah ka pe dâwn a ni.”

²⁸“Nang Mihring fapa, thu puang la, mi dem hrât Amon mite hnênah chuan heti hian ti rawh: Insah hlum nân khandaih chu an phawi ta, Khandaih hriam nawh tlêt, Kâwlphe anga de zawr zawr tûr chu.

²⁹“Dâwt ni si inlârna an hmu a, aienna dik lovin ai an ensak che a ni, i nghâwngah khandaih a bûr dâwn, i sualna tenawm avângin i hun a thleng ta, hrem i nih hun chu.

³⁰Khandaih chu a paiah khung mai rawh, i pian i mûrna ramah i chungthu ka rêl dâwn.

³¹Ka thinurna chu i chungah ka leih ang a, ka thinrimna mei chu i chungah ka chhêm alh ang. Mi that ṭhang pa nunrâwng pui pui kutah ka hlân ang che.

³²Mei chuan a kâng ang chia, nangma ram ngeiah i thisen a chhuak ang; tu man an hre reng lo vang che, kei Lalpa PATHIAN hian ka sawi tawh hi.”