Read Mizo Lushai Ezekiela 22 Bible Online

Ezekiela 22 - Mizo Lushai bible

Ezekiela 22

¹ LALPA chuan ka hnênah,

²“Nang, Mihring fapa, tualthahna khawpui chachhuah tûrin i inpeih em? An thil tenawm tih zawng zawng chu hrilh vek ta che.

³Lalpa PATHIAN chuan heti hian a ti ti rawh: Tual thah chîng leh milema intibawlhhlawh khawpui tâwpna chu a lo thleng.

⁴Thisen in chhuahte avângin ka thiam lo che u a ni; in milem siamte chuan in intibawrhbâng a, in tâwpna hun chu in tihnai a, a lo thleng ṭêp a ni. Hnam tin hmuhsit leh ram tina nuihzatbûrah ka siam ta che u a ni.

⁵Innghirngho chîng, khaw hmingchhe tak i nih avângin i bul hnaia awmte leh ram hla taka awmte pawhin an nuihzat che a ni.

⁶“Ngai teh, khuaa Israel hotute chu an theih ang anga, tualthah inpeih rengin an khawsa a.

⁷Tu mahin nu leh pa an zah lo va, hnam dang mite an hnehchhiah a, fahrah leh hmeithaite dik lo takin an sawisa a.

⁸Ka Hmun Thianghlim an zah lo va, ka sabat ni an bawhchhia a,

⁹tihhlum tûrin mi dang an hêk a, bâwlhmuna inthawina ruai an kîl a, khuaah chuan an hur kual a.

¹⁰Ṭhenkhat chuan an pate nupui an mutpui a, hmeichhe fel lo lai an pâwl lui a.

¹¹Ṭhenkhatin mahni ṭhenawm nupui an tibawrhbâng a, an mote pawh an khawih a, an pate fanu, an farnu ngeite pawh an tibawlhhlawh a.

¹²Tual that tûra thamna late an awm a, a pung an ûm a, ṭhenawm khawvêngte hrêkin an hlêp ṭeuh ṭeuh va, kei ngei pawh min theihnghilh ta,” Lalpa PATHIAN thuchhuak chuan a ti.

¹³“Ngai teh, in zîngah mawi leh mawi lo thlu lêk lova hlêp leh tual thah in chîn avângin ka kut ka ben khum dâwn a che u.

¹⁴In chunga ka ṭuan hunah in tuar ngamin in lo ṭang zo dâwn em ni? Kei LALPA hian ka sawi hi, ka ti ngei ang.

¹⁵Hnam dang zîngah ka tidarh ang che u a, chutiang chuan in bawlhhlawhna chu ka tibo vang.

¹⁶Hnam dangte chuan an lungten ang che u a; tichuan, kei hi LALPA chu ka ni tih in hria ang.”

¹⁷ LALPA chuan heti hian mi hrilh a:

¹⁸“Mihring fapa, Israel chhûngte hi an zavaiin a êkchhia vek an ni, rawhtuina meia tangka rawh fai hnua a êkchhia, dâr te, ṭin te, suan te ang lek hi an ni.

¹⁹Chuvângin, Lalpa PATHIAN chuan heti hian a ti: A êkchhia ang lek in nih tâk avângin

²⁰Jerusalem khaw chhûngah ka khung khâwm ang che u; tangkarua te, dâr te, suan te rawhtuina bêla an dah khâwma an rawh tui ang hian ka thinura ka lungnih loh êm êm avângin ka dah khâwm ang che u a, ka rawhtui ang che u.

²¹A ni, ka dah khâwm ang che u a, ka thinurna mei chu ka chhêm hnan ang che u a, Jerusalem khaw chhûngah chuan ka rawh ang che u.

²²Tangkarua, rawhtuina bêla an rawhtui ang hian in tui zo vang; tichuan, kei LALPA hian ka thinur in chungah ka leih a ni tih in hria ang.”

²³ LALPA chuan heti hian mi hrilh a:

²⁴“Mihring fapa, Israel-te hi hrilh rawh. An ram chu ram then fai loh a ni a, thinurna ni avânga ruah dawng lo ram a ni.

²⁵An hotute chu sakeibaknei sa hauh rûm ang an ni; mi an that a, mi sum leh thil hlute an lâksak a, mi tam tak an tihmeithai a ni.

²⁶Puithiamte chuan ka dân an hmusit a, ka thil thianghlimte an tibawrhbâng a, thianghlim leh thianghlim lo an thliar thei lo va, a thiang leh thiang lo mi an zirtîr thei hek lo. Ka sabat ni an hai der a, an zînga tu mahin min zah lo.

²⁷An hotute chu chinghne koham, a hmuh apiang seh zêl ang hi an ni: hlâwkna tûr a awm phawt chuan mi thah an tîm lo.

²⁸Zâwlneite chuan inlârna an hmu der a, dâwt thu hril lâwkin chinai an hnawih mawi bang ang hian an thiltihte chu an sawi mawisak a; ka sawi loh pui, ‘Lalpa PATHIAN chuan heti hian a ti,’ an ti a.

²⁹Thingtlânga awmte pawhin mi dang an nêkchêp a, rawk an chîng a, retheite leh pachhiate an tiduhdah a, ram dang mite dik lo takin an hnehchhiah a.

³⁰Thinura ram chu ka tihchhiat vek loh nân a bang chim rem ṭha tûr, a chhe laia lo ṭang tûr mi, an zîngah ka zawng a, ka hmu zo hauh lo.

³¹Chuvângin, ka thinurna an chungah ka leih ang a, ka thinrimna mei chuan a tihlum ang; an thiltih mawh chu an chungah ka nghat dâwn a ni,” Lalpa PATHIAN thuchhuak chuan a ti.