Read Mizo Lushai Ezekiela 23 Bible Online

Ezekiela 23 - Mizo Lushai bible

Ezekiela 23

²“Mihring fapa, nu pakhatin fanu pahnih a nei a.

³An tleirâwl chhuah aṭangin Aigupta ramah mi hurah an ṭang a, an hnute te an dehsak a, an nulâtna an hloh ta a.

⁴A upa zâwk hming chu Oholai a ni a, Samari entîrna a ni; a naupang zâwk chu Oholabai a ni a, Jerusalem entîrna a ni. Nupuiah ka nei a, fanu fapa min hrinsak a.

⁵Ka nupui ni chungin Oholai chuan min hursan a, a ngaihzâwng, râlhrâtho, Asuria chu a hak hiam a.

⁶Chûng chu kawr sena inthuam, milian leh hotu lal, tlangvâl hmêlṭha thlan, sakawr chungchuang mi an ni.

⁷Chûng Asuria mi chhuante nula chu a ni ta a; an milemte ngaisângin a be ve a, a intibawrhbâng ta a.

⁸Aigupta rama a hurna kha a la sim lo va ni, a tleirâwl chhuah aṭang rêngin mipain an mutpui ṭhîn a, an nula angin an chei ṭhîn.

⁹Chuvângin, a ngaihzâwng, a hak hiam ṭhin Asuria mite kutah ka pe ta a ni.

¹⁰Anni chuan a silhfên an hlihsak vek a, a fanu fapate chu an kawisak a, amah chu khandaihin an that a; a thil tuar chu hmeichheho sawiṭhaihna ber a ni ta a.

¹¹“A nau Oholibai chuan chûng chu a hmuh pawhin a u ai chuan mi dang a hak hiam dân leh a hur dân chu a nasa zâwk ta daih a.

¹²Asuria milian leh hotu lal, râlhrât, kawr senlâr ha, sakawr chungchuang, tlangvâl rual hmêlṭha thlante chu a hak ve ta hiam a.

¹³Ani pawh chu a intibawrhbâng ta tih ka hmu a, a u siar a u siar a ni.

¹⁴A hurna chu a zual tulh tulh a; Kaldai hotu lian thlâ, banga an ziak, senlâr vûta rawng an hnawih,

¹⁵kâwnghrên mawi tak hrênga, diar fêm buk tak khim, han en pawha hotu ni âwm hliah hliah, Babulon mi, Kaldai rama piangte lem chu a han hmu a,

¹⁶a ngaizâwng ta a, Kaldai mite hnênah chuan puarak te a tîr ta a.

¹⁷Babulon mite chu an lo kal a, an rawn mutpui a, an tibawrhbâng ta a. Duh tâwka an chêt hnu chuan a ngei ta hle a.

¹⁸Chutia a lang a pauva a hur a, inhlîm a hreh loh avâng chuan a u ang bawkin ka ngei ve ta a.

¹⁹Aigupta rama a tleirâwl hurna kha a la reh lo, a hur tulh tulh a ni.

²⁰Sabengtung leh sakawr anga lian mi hur pui pui mutpui tûr a melh riai mai.

²¹Aigupta rama i hnute an dehsak che a, i nulâtna i hloh tâk china i tleirâwl hurna chu i la chhunzawm zêl a nih hi.

²²“Chuvângin, Oholiba, Lalpa PATHIAN chuan heti hian a ti: Ngai teh, i ngaihzâwngte chu i chungah ka ṭuantîr dâwn. I ngaihzâwng, i ngei tâkte kha, kil tin aṭangin ka rawn hualtîr dâwn a che.

²³Babulon mi te, Kaldai mi te, Pekod mi te, Shoa leh Koa mite leh Asuria-ho te chu ka rawn hruai ang. Babulon mi, Kaldai tlangvâl hmêlṭha thlan ṭhiau, milian leh hotu lal, râlhrât rual leh sakawr chungchuang hotute chu ka rawn khâwm dâwn.

²⁴Hmâr lam aṭangin an lo kal ang a, sipai tam tak, sakawrtawlailîr hmang leh thil phur tawlailîr nên, phaw keng leh awmphaw ha-in, invenna lukhum nên an rawn hual ang che a, an duh duha an tih tûrin an kutah ka dah tawh che.

²⁵I chungah ka thinur a, anni pawh thinur taka sawisa tûr chein ka ti a ni; i hnâr te, i beng te an hlep ang a, in zînga la dam chu khandaihin an that ang. I fanu fapate chu an man ang a, an man bâng chu an kâng hlum ang.

²⁶I thawmhnawte an hlihsak vek ang chia, i ṭhi mawite chu an lâksak ang che.

²⁷I hurna leh i nawhchi zawrh, Aigupta ram aṭanga i chhawm chu, ka titâwp ang. Aigupta chu thlîr kîrin i ngaihtuah tawh lo vang.”

²⁸Lalpa PATHIAN chuan heti hian a ti: “Ngai teh, i huatzâwng leh i mi ngeite kutah ka hlân dâwn che.

²⁹An huat êm che avângin an sawisa nek ang che; i thawh chhuah zawng zawng an lâksak ang che a, saruakin, a lâwng maiin an lum reng ang che. I hur avâng leh nawhchi i zawrh avângin

³⁰hêng hi i chungah i tithleng a ni, hnam dang dang ûmin i hur bo va, an milemte chuan i intibawrhbâng a,

³¹i u awm dâna i awm ve zêl avângin i tuar tûr no chu ka pe a che.”

³²Lalpa PATHIAN chuan heti hian a ti: “No lian pui, dawng hlâwk tak, i u no chu in rawh, Mi tinin an hmusit ang chia, An nuihzat ang che. A dawng hlâwk êm a nia.

³³I rui ang a, i mangang hle ang, Hlauhna leh chhiatnaa khat no a ni. I u Samaria no chu,

³⁴I in ang a, i tlâk vek tûr a ni, A keh them lam in tel la, I hnute te chu pawt fân rawh.” Lalpa PATHIAN thuchhuak chuan, “Kei hi a siamtu che ka ni,” a ti.

³⁵Chuvângin, LALPA PATHIAN chuan heti hian a ti: “Min theihnghilh a, min hawisan tâk avângin i hurna leh i nawhchi zawrh mawh chu i phur ang.”

³⁶ LALPA chuan heti hian a sawi a: “Mihring fapa, Oholai leh Oholabai te hi chachhuah tûrin i inpeih em? An tenawmzia hrilh teh.

³⁷An uire a, an kutah thisen a kai hnuang mai; milem biain an uire a, fapa min hrinsakte chu an that a, milem hnênah an hlân.

³⁸Ka chungah hei chauh hi an ti nêm! Ka Hmun Thianghlim an tibawrhbâng a, ka sabat ni an bawhchhe bawk.

³⁹An fate, milem hmaa an thah ni la lain, chumi ni ngei chuan, ka Hmun Thianghlimah an lo kal a, ka in chu an rawn tibawrhbâng ṭhîn.

⁴⁰Ram hla taka mi sâwm tûrin puarakte an tîr chhên a, chûng mite chu an lo kal a. Anni chu an lo inbual fai a, an mit an hnawih dûr a, ṭhi man tamte an lo awrh a.

⁴¹Khum nuam takah an ṭhu a, ei tûr tui tui dah khâwmna dawhkân an chhawp a, ka pêk thil rimtui leh hriakte chu an dah bawk a.

⁴²Engthâwl taka nuam chênin an ri bûng bûng a; thlalêr aṭanga sâwm khâwm ṭeuh te chuan ngûn an buntîr a, lukhim mawi tak an khimtîr a.

⁴³Uire chau tawh chu nawhchizuar angin an chei a nih hi,’ ka ti a.

⁴⁴Nawhchizuar, miin an pan ṭhin angin mi hur Oholai leh Oholabai chu an la pan ta chhên a.

⁴⁵Uire leh tualthatah mi dikte chuan an puh ang a, thiam loh an chantîr ngei ang; uire an chîng a, an kutah thisen a kai hnuang si a.”

⁴⁶Lalpa PATHIAN chuan heti hian a ti: “Tihthlabâr tûr leh rawk tûrin mipui khâwm rawh u.

⁴⁷Mipui chuan lungin dêng sela, khandaihin tan sela, an fanu fapate chu that rawh se, an inte pawh hâl rawh se.

⁴⁸Ram pumah an hurna chu ka tibo dâwn, hmeichhe dangte pawhin anni anga hur an chîn ve loh nân.

⁴⁹Nangni unau hian in hur man in tuar ang a, milema in in-tihbawrhbân mawh chu in phur ang. Tichuan, kei hi Lalpa PATHIAN chu ka nih in hria ang.”