Read Mizo Lushai Ezekiela 24 Bible Online

Ezekiela 24 - Mizo Lushai bible

Ezekiela 24

¹Kum kuana thla sâwm, ni sâwm ni chuan LALPAN heti hian mi hrilh a.

²“Mihring fapa, ziakna la la, vawiin tahrik ni hi ziak teh, vawiin hi Babulon lalin Jerusalem a hual ṭan ni a ni.

³Hel hmang chhûng tân he tehkhin thu hi sawi rawh; ‘Lalpa PATHIAN chuan heti hian a ti,’ ti rawh: Chhuang rú, bêl chu chhuang rú, Tui pawh leih khat rawh u.

⁴Sa ti ṭha ṭha, a bawp leh dâr, A irno ruhte nên la khâwm ula, Tikhat rawh u.

⁵Berâm tuihnai hnai talh ula, Thukah thing rawlh ṭeuh ṭeuh rawh u. So bawrh bawrh sela, A ruh filhin hmin teh se.

⁶“Lalpa PATHIAN chuan heti hian a ti: Tualthahna khawpui chu a chung a pik e. Tihfai ngai loh khirkhâwng hlîr a ni. Sa hrang chu thlang chuang lovin thur vek rawh u.

⁷Khaw chhûngah mi an that a, an thisen chu lungpui châr chungah a luang, leiah luang se vaivutin a chhilh tûr.

⁸Chhilh a nih loh nân lungpui châr chungah ka luantîr a ni: mi tihthinrima phuba ka lâk theih nân.

⁹“Tichuan, Lalpa PATHIAN chuan heti hian a ti: Tualthahna khawpui, i chung a pik e! Kei ngei hian thingfâk chu ka rawlh ṭeuh dâwn a ni.

¹⁰Thing fawm belh ula, chhêm hluah hluah rawh u; sa chu hmin kawi sela, chhuang kang rêt ula, a ruhte chu rawh ral rawh u.

¹¹Dâr bêl ruak chu meiling chungah chhuang reng ula, ling vur rawh se.

¹²A khirkhâwng bawlhhlawh chu a kan ral hnuah bêl chu a thianghlim leh ang. A khirkhâwng chuti zozai chu hah hnêp khawpin tihfai tum mah la, i tifai thei lo vang, mei chauhvin a tifai thei a ni.

¹³In hurna chuan a tibawlhhlawh che u a, tihfai ka tum che u a, in fai thei si lo; ka thinur mei in tuar hma chu in fai dâwn lo va nih hi.

¹⁴Kei LALPA hian ka sawi tawh a, ka hun a lo thleng ang a, ka ti ngei ang. Ka ngaizam mai lo vang, ka lainat lo vang a, pawi ka ti hek lo vang. In awm dân leh in thil tih dân ang chiahin in chungah ro ka rêl ang,” Lalpa PATHIAN thuchhuak chuan a ti.

¹⁵ LALPA chuan heti hian mi hrilh a:

¹⁶“Mihring fapa, i duh lai tak ka tina thut ang a, ka lâksak dâwn a che. I ṭap ri tûr a ni lo va, i mittui a tla tûr a ni hek lo.

¹⁷Ngawi rengin inhnîp la, lusûn angin awm suh, diar khim la, pheikhawk bun rawh, i hmai tuam suh la, lusûn ei ang ei hek suh,” tiin.

¹⁸Chumi tûk chuan mipui hnênah thu ka sawi a, tlaiah chuan ka nupui chu a thi ta mai a. Thu min pêk ang khân a tûk zîngah chuan ka ti ta a.

¹⁹Mite chuan, “Engtizia nge hetia i tih, min hrilh teh,” an ti a.

²⁰Anni chu ka bia a; LALPA thu ka hnênah hetiang hian a lo thleng a ni:

²¹“Israel chhûngte hnênah sawi rawh. Lalpa PATHIAN chuan heti hian a ti: Ngai teh u, ka Hmun Thianghlim, rinawm in tih êm êm, in chhuan, hmuh in kham theih loh, in lainat êm êm chu ka tibawrhbâng dâwn a ni. In fanu fapa Jerusalem-a la awmte chu khandaihin an sât hlum ang.

²²Ka tih ang hian in ti ve dâwn a ni: in hmui in khuh lo vang a, lusûn ei ang in ei hek lo vang.

²³Diar in khim tûr a ni, pheikhawk in bun ang a, in ṭap ri tûr a ni lo. In bawhchhiatna avângin in chau vang a, in inrûm chhâwk ang.

²⁴Ezekiela hi in tân chhinchhiahna a ni ang, a tih ang zêl hian in ti dâwn a ni; chumi hnuah chuan kei hi Lalpa PATHIAN chu ka ni tih in hria ang.

²⁵“Nang, Mihring fapa, an hlimpui leh an chhuan, hmun rinawm tak, hmuh an kham theih loh, an lainat êm êm chu ka chhuhsak ang a, an fanu fapate chu ka la bo vang.

²⁶A tlân chhuak awm chhun chu i hnênah a lo kal ang a, i beng ngeiin a thu i ngaithla ang.

²⁷Chumi ni chuan i ṭawng thei leh tawh ang a, lo tlân chhuak chhun chu i be thei ang. Tichuan, an tân chhinchhiahna i ni ang a, LALPA chu ka ni tih an hria ang,” a ti a.