Read Mizo Lushai Ezekiela 25 Bible Online

Ezekiela 25 - Mizo Lushai bible

Ezekiela 25

¹ LALPA chuan heti hian mi hrilh a:

²“Mihring fapa, Amon ram lam hawi la, thû puan khum rawh.

³Amon mite hnênah, ‘Lalpa PATHIAN thu hi ngaithla rawh u,’ ti rawh. Lalpa PATHIAN chuan heti hian a ti: Ka Hmun Thianghlim an tihbawrhbâna, Israel ram an tihchhiata, Judai ram mite sala an hruai khân i lâwm vei hle a.

⁴Chuvângin, ngai teh, khawchhak mite kutah ka pe ang che u. In ramah bûk an rawn tlar ang a, hmun an khuar ang. In thei rahte leh in ran hnutetuite chu an tlân ang.

⁵Raba khawpui chu sanghâwngsei tlatna hmunah ka siam ang a, Amon ram pum chu ran tlatna hmun a ni ang; tichuan, LALPA chu ka ni tih in hria ang.

⁶Lalpa PATHIAN chuan heti hian a ti: “Israel ram chu a chhiat avângin hmusit êm êmin hlim takin kut i bêng a, i ke i per vei a;

⁷chuvângin, ngai teh, i chungah ka kut ka lek dâwn a ni. Hnam dang kutah ka pe ang chia, an rallâk sum i ni ang. Hnama chhiar tlâk lohvah ka siam ang che a, ka tichhe vek ang chia, ram nei lovin ka siam ang che. Tichuan, kei hi LALPA chu ka ni tih i hria ang.”

⁸Lalpa PATHIAN chuan heti hian a ti: “Moab leh Seir chuan Judai ram pawh ram dang ang bawk a lo nih lek hi,’ an ti vei a.

⁹Chuvângin, ngai teh, Moab ramri humtu khawpuite chu ka tudarh dâwn, ram mawi taka khawpui Beth-jesimot te, Baal-meon te, Kiriathaim khua te chu.

¹⁰Khawchhak mite chu Amon chungah nên an che ang a, an neih atân an ram chu ka pe ang. Amon mite chu hnama chhiar an ni tawh lo vang.

¹¹Moab chungthu chu ka rêl ang a; tichuan, LALPA chu ka ni tih an hria ang.”

¹²Lalpa PATHIAN chuan heti hian a ti: “Edom chuan Judai ram chungah phuba a la nghek a, hetia phuba an la mai hi an thiam lo tak zet a ni.

¹³Chuvângin, Lalpa PATHIAN chuan heti hian a ti: Edom chungah ka kut ka lek dâwn; mihring pawh, ran pawh ka tihlum ang. Teman khua aṭanga Dedan khaw thlengin ka tichhia ang a, khandaihin mite chu ka sât hlum ang.

¹⁴Edom chunga ka phuba chu la tûrin ka mi Israel-te chu thu ka pe ta; ka lungnihlohzia leh ka thinurzia an tilang ang. Phuba ka la a ni tih an hria ang,” Lalpa PATHIAN thuchhuak chuan a ti.

¹⁵Lalpa PATHIAN chuan heti hian a ti: “Filistia-ho chuan an kumkhaw hmêlma chungah râwng takin phuba an la a, hmusit takin an tichhe vei a.

¹⁶Chuvângin, Lalpa PATHIAN chuan heti hian a ti: Filistia chungah ka kut ka lek dâwn; Keret mite chu ka tihlum ang a, tuipui kama la awmte pawh chu ka tihlum ang.

¹⁷Thinur takin an chungah phuba ka la ang a; tichuan, kei LALPA hian an chungah phuba ka la a ni tih an hria ang.”