Read Mizo Lushai Ezekiela 26 Bible Online

Ezekiela 26 - Mizo Lushai bible

Ezekiela 26

¹Kum sâwm leh pakhatna, thla ni hmasa berah chuan LALPAN heti hian a sawi a,

²“Mihring fapa, Tura mite chuan Jerusalem chungchângah hlim takin, ‘Chei! Hnam tin kawtchhuah, Jerusalem chu a chhe ta vek mai! A chhiat tâk avângin keini kan changtlung hlauh vang,’ an ti vei a.

³Chuvângin, Lalpa PATHIAN chuan heti hian a ti: ‘Aw Tura, ngai teh, i chungah ka ṭuan dâwn, tuifinriat fâwn angin hnam tam tak rawn bei tûr chein ka rawn tîr dâwn.

⁴Tura kulh bang chu an tichhia ang a, an insângte an tichim ang, a chung lei chu ka phiat fai hliau vang a, lung pialtlêp ngawt a ni ang.

⁵Tuifinriata lên dêngho lên phona a ni ang. Kei hian ka sawi tawh hi,” Lalpa PATHIAN thuchhuak chuan a ti: “Hnam dang tân râllâk sum an ni ang.

⁶An mi, lova awmte chu, khandaiha sah hlum an ni ang; tichuan, kei hi LALPA chu ka ni tih an hria ang.”

⁷Lalpa PATHIAN chuan heti hian a ti: “Ngai teh, Babulon lal, Nebukadnezara, lal ropui ber chu Tura bei tûrin hmâr lam aṭangin sakawr te, tawlailîr te, sakawr chungchuang mi te, sipai te, ṭhuihruai tam tak nên ka rawn hruai dâwn.

⁸I mi, lova awmte chu khandaihin a that ang a, khua chu hual bang a siam hnan ang a, lei a chhûng pâwng ang a, phaw nên a hual ang che.

⁹Bang chhut chhiatna a hmang ang a, i in sângte chu hreiin a chêk chhia ang.

¹⁰An sakawr pal khûk vaivutin a bawh tlat ang che. Sakawr te, tawlailîr te leh sakawr chungchuang mi te thâwmah chuan kulh bangte chu a nghîng dawt dawt ang a, bang chim laiah an lût tup tup ang hian i kulh kawngkaah an lût ang.

¹¹I kawtthlêr chu sakawrin a chîl phut dup ang a, mite chu khandaihin an sât hlum ang; in lungphun nghet tak takte chu an titlu ang.

¹²I rote leh in dâwr sum te chu duh duhin an la ang a, in kulh bang chu an tichim vek ang. In nuam, in chhuan êm êmte chu an tichim bawk ang a, lung te, thing te, thil chim hnawk te chu tuifinriatah an paih ang,

¹³In zai dur dur ṭhîn chu ka titâwp ang a, in ṭingṭang ri pawh a dai dak ang.

¹⁴Lung pialtlêpah ka siam ang chia, lên phona mai i ni ang; an din leh tawh lo vang che. Kei LALPA hian ka sawi tawh hi,” Lalpa PATHIAN thuchhuak chuan a ti.

¹⁵Tura hnênah Lalpa PATHIAN chuan heti hian a ti: “I chhiat hunah, mi an thah chiam, hliam tuarte thâwm avângin tuipui kama awmte chu hlauvin an khûr ve ang.

¹⁶Tuifinriat kama lalte chu an lalṭhutthlêng ata an chhuak ang a, an puante chu an dah ang a, an thawmhnaw mawi tak takte chu an hlîp ang a, an khûr zawih zawih ang. Leiah an ṭhu ang a, i chhiatna chuan a râp êm avângin an khûr tâwp thei lo vang.

¹⁷He hla hian an ṭah ang che: ‘Tuifinriata lêngte chênna khua Khaw hmingthang chu i va han chhe hneh êm! I chhûnga chêngte chu tuifinriata lal an ni a, Khawvêla mite hlauh i nih ṭhin vei nên.

¹⁸I chhiat ni chuan thliarkârte an khûr a, I bo ni chuan tuipuia thliarkârte an va hrilhhai em!’

¹⁹Lalpa PATHIAN chuan heti hian a ti: “Tu ma awm lohna, khaw ram angin ka tiram ang che, tuithûkpuiah ka tipil ang chia, tuifinriat chuan a chîm pil daih ang che.

²⁰Hmânlai mite chhukna khurah ka thlâk ang chia, lei hnuai pûk, kumkhaw chhiatnaah, mitthite chhukna khuaah chuan ka awmtîr ve ang che. Tichuan, tu mah an lo awm thei tawh lo vang a, mi nung ramah i awm ve dâwn tawh si lo.

²¹I boral ang a, boral ve hi mi tinin an hlau vang. Zawng zawng che mah se, an hmu lo vang che,” Lalpa PATHIAN thuchhuak chuan a ti.