Read Mizo Lushai Ezekiela 27 Bible Online

Ezekiela 27 - Mizo Lushai bible

Ezekiela 27

¹ LALPA chuan heti hian mi hrilh a:

²“Nang, Mihring fapa, Tura sûnna hla phuah rawh. Tuifinriat kawtchhuaha awm, tuipui kama awm zawng zawng nêna sumdâwng ṭhîn.

³Tura khaw hnênah chuan heti hian ti rawh. Lalpa PATHIAN chuan heti hian a ti: ‘Aw Tura, ka mawi ber e, i inti a,

⁴Tuipui bula awm i ni a, A dintute chuan an rem mawi kher mai che.

⁵Hermon tlâng fâr thing an zai a, I lawng ngulah Lebanon sidar an hmang.

⁶Lawng kar nân Basan sasua, Chhuatah Kitim tufâr thingphel, Saingho phûm chu an hmang.

⁷Aigupta puan ṭial mawi chu Lawng thli puan zârah i hmang a, Puanzâr dang a ngai lo ve, Elim thliarkâr puan dum leh sen, Chung zârah i hmang.

⁸Sidon leh Arvad mite chu Lawng kartuah i chhawr a, Aw Tura, nangma mi thiamte ngei I lawng khalhtu an ni.

⁹Gebal themthiam mite chu Lawng pawp thawmtu an ni. Tuifinriata kal lawng zawng zawng chu I tân sumdâwngtu vek an ni.’

¹⁰“Persia mi te, Lud mi te leh Put mite chu i sipaiah an ṭang a, phaw leh dâr lukhum an târ tuar a, an tiropui ngei che.

¹¹Arvad leh Melek mite chuan i kulh an vên hual a, Gamad mite chuan i kulh bangah râl an vêng a, an phaw leh dâr lukhum chu bangah an târ tuar a, an tiropui ngei mai che.

¹²“Tarsis nên in indâwr a, tangkarua te, thîr te, ṭîn te, suan tein i bungrua an rawn lei a.

¹³Javan te, Tubal te leh Mesek te nên in indâwr a, sal leh dâr bêltein i dâwr sum an rawn lei.

¹⁴I bungrua chuan Beth-togarma aṭangin sakawr chhawr chi te, sakawr chungchuanna chi te leh sabengtung te i chaw a.

¹⁵Dedan nên in indâwr a, tuipui kama awm thliah thluahte chuan saingho hrawl pui pui leh thing ril dum mi an rawn lâk che a.

¹⁶Edom mite chuan i dâwr sum leh i thil siamte an rawn lei a, i dâwr sum lei nân lungmantam te, puan senduk te, puan cheimawi te, puan zai sîn te, tuikep te, rubi lung te an rawn keng a.

¹⁷Judai leh Israel ram aṭangin Minnit huit te, theipui te, khawizu te, oliv hriak te thinghnai damdawi tein an rawn dâwr che a.

¹⁸Damaska mite chuan i dâwr sum leh i thil siamte chu an rawn la zung zung a, Helbon uain leh Sahar sahmulin an rawn dâwr che.

¹⁹Uzal vêla Vedan leh Javan mite chuan an rawn dâwr che a, thîr hlûm te, mosola te, thakthîng te, thing rimtui te an rawn keng.

²⁰Dedan mite chuan sakawr thawmhnawin i dâwr sum an rawn lei a.

²¹Arab mite leh Kedar lalte chuan berâmno te, a chal te, kêlpatein i dâwr sum an rawn lei.

²²Seba leh Rama sumdâwngtute chuan mosola ṭha ber chi leh lungmawi tinrêng leh rangkachakin i dâwr sum an rawn lei a.

²³Haran te, Kana te leh Eden khaw mite chu, Seba sumdâwngtute leh Asur leh Kilmad khaw mite nên dâwrtu che an ni.

²⁴Puan ropui te, intuam puan te, puan senduk te, puan cheimawi te, chhuat phah ṭial buai te, la phiar mawi tak tak tein an rawn dâwr che.

²⁵Tarsis lawng rualte chuan i dâwr bungrua an phur thûr thûr mai - Tuifinriat lawng ang i ni, bungraw tam tak phur khat thûr chu.

²⁶“Lawng kartuten tuifinriat zau laiah, An kar chhuak che. Khawchhak thliin a lên chhe ta che a, Khawmual hlat takah chuan.

²⁷I hausakna, dâwr sum leh bungrua te, I lawngpu zawng zawng te, Lawng khalhtu leh lawng pût thawm thiam te, Dâwr sum hralhtu leh vêngtu sipai te, Lawnga chuang zawng zawng te chu I chhiatpui a, tuiah an tla.

²⁸Lawng khalhtute mangang au chuan Vaukam a khâwk.

²⁹Lawng kartute an chhuak vek a, Lawngpute leh a khalhtu zawng zawng nên, Vaukamah chuan an ding ta a, Nangmah avângin an chiau vawng vawng.

³⁰Vaivut an inphul a, leiah an tâl.

³¹An chhîp an ziat kawlh a, saiip an fêng, Lungchhe takin an ṭah che a, Lungngai takin an rûm.

³²I tân ṭah hla an chham ang a, ‘Tura ang hi tu nge awm ang? Tui hnuaia pil ta vang vang hi!’ tiin.

³³I sumdâwngte chuan tuifinriatah I sum, dâwr bungruate an tawlh chhuak ṭeuh ṭeuh va, Hnam tin an tilungawi hle ṭhîn. I sum avângin lalte an hausa bawk.

³⁴Tuifinriatah i keh ta a, A thûk laiah i pil ta a, I bungrua leh i mi chhawr te, Tuifinriatah i pilpui ta.

³⁵Tuipui kama chêng zawng zawng te, Nangmah vângin an hrilhhai hle, An lalte pawh an hmulthi a ding a, Zâm hmêl an pu.

³⁶Ram tina sumdâwngte pawh an chek tlawk tlawk mai, Mi tin ṭihkhaiah i lo chang ta, I boral hlen dâwn si a.”