Read Mizo Lushai Ezekiela 28 Bible Online

Ezekiela 28 - Mizo Lushai bible

Ezekiela 28

¹ LALPA chuan a sawi leh a,

²“Mihring fapa, Tura lal hnênah heti hian ti rawh: Lalpa PATHIAN chuan heti hian a ti: “I chapo va, ‘PATHIAN ka ni, tuifinriatah PATHIAN lalṭhutthlêngah ka ṭhut hi,’ i ti vei a, Pathianah inngai mah la, mihring mai i nih hi,

³Daniela aia fing zâwk, a lakah thuhrûk eng mah awm thei lo niin i inngai a.

⁴Sumdâwn i thiam hle a, i fin avângin i hausa a, rangkachak leh tangka i khâwl ṭeuh mai.

⁵I sumdâwnna a hmuingîl a, i hausak tâk êm avângin i rilru a lo chapo ta a ni.

⁶“Chuvângin, Lalpa PATHIAN chuan heti hian a ti: Pathian anga fing i inti vei a;

⁷Ngai teh, i hmêlhriat loh, hnam azawnga hnam hlauhawm ber, nangmah bei tûr, ka rawn hruai dâwn: an khandaih chu an lek ang a, i fin avânga i mawina leh i ropuina chu an rawn tichhe vek ang.

⁸Lei vâwtah an chhuktîr ang chia, tuitla thihin i thi ang.

⁹Nangmah thattu tûr hnênah, ‘Pathian ka ni,’ i ti thei dâwn em ni? Thattu tûr che kutah chuan mihring mai i ni si a, Pathian awzâwng i ni lo ve.

¹⁰Serh tan loh thihin, Pathian hre loho kutah i thi ang. Ka ṭawng tawh hi,” Lalpa PATHIAN thuchhuak chuan a ti.

¹¹ LALPA chuan mi hrilh leh a,

¹²“Mihring fapa, Tura lal sûnna tûr hla phuah rawh: Lalpa PATHIAN chuan heti hian a ti: ‘Finnaa khat leh mawi chungchuang, Khaw ṭha famkim chu i ni.

¹³Pathian huan Eden-ah i chêng a, Lungmantam chi tinrêng i inbel a, Lunghlu te, topaz te, berul te, karnelian te, jasper te, safir te, emeral te leh garnet te chuan. Themthiam kutchhuak, rangkachaka phûm I pian ni aṭang khân i ni.

¹⁴Vêng tûr chein cherub thlan ka dah a, PATHIAN tlâng thianghlimah i awm, Lunghlu tle zîngah i lêng.

¹⁵Thil sual i tih hma kha chuan Sawisêlbo i ni ṭhîn.

¹⁶I sumdâwnna a lo zau va, Sum hrâwm i tina a, thil sual i ti ta a, Pathian tlâng lunghlu tle zînga i lênna aṭangin, Vêngtu cherub ka ûm chhuahtîr ta che.

¹⁷I ropuina chuan a tichapo che a, I mawina chapopuiin i finna i tichhe zo ta, Lalte ennawmah leiah ka paih thal ta dêr che a ni.

¹⁸I suahsualna zozai leh Dik lo taka sum hrâwm i chîn avângin I hmun thianghlim i tibawlhhlawh a, In zîngah mei ka chhuahtîr ang a, A kâng ral ang chia, Thlîrtu hmuhah lei vaivutah ka chantîr ang che.

¹⁹I hmêlhriat zawng zawngte chu Nangmah vângin an thlabâr ang, Mi tân ṭihkhai i lo chang ta, I bo hlen dâwn ta si a.”

²⁰ LALPA chuan,

²¹“Mihring fapa, Sidon lam hawi la, thu sawi khum rawh.

²²Lalpa PATHIAN chuan heti hian a ti: ‘Aw Sidon, i chungah ka ṭuan dâwn. In zîngah chawimawi ka ni ang a, In chungthu ka rêl ang a, Ka thianghlimzia ka tilang ang. Tichuan, kei hi LALPA chu ka ni tih in hria ang.

²³Hripui ka rawn lêntîr ang a, Kawtthlêrah thisen a luang ang, Kil tinah khandaihin an bei ang chia, I mite chu an tihlum ang.’ Tichuan, kei hi LALPA chu ka ni tih in hria ang,” a ti a.

²⁴“Israel-te tân, an vêla awm, anmahni hmusittute chu, hnimhlîngnei leh hlîng anga chhun ṭhîntu an ni tawh lo vang a, kei hi LALPA chu ka ni tih an hria ang.”

²⁵Lalpa PATHIAN chuan heti hian a ti: “Ka thawn darhna mite zîng ata Israel chhûngte chu ka hruai khâwm hunah ka thianghlimzia hnam tin zîngah a lang ang a, ka chhiahhlawh Jakoba hnêna ram ka pêkah chuan an awm tawh ang.

²⁶Thlamuang takin an luah ang a, in te sa-in grep huan te an siam ang. An vêla awm, anmahni hmusittute chu ka hrem hunah him takin an awm ang. Tichuan, kei LALPA hi an Pathian chu ka ni tih an hria ang.”