Read Mizo Lushai Ezekiela 29 Bible Online

Ezekiela 29 - Mizo Lushai bible

Ezekiela 29

¹Kum sâwmna, thla sâwm, tahrik ni sâwm leh pahnihah LALPA chuan ka hnênah,

²“Mihring fapa, Aigupta lal Farawa lam hawi la, amah leh Aigupta ram pum chu thu sawi khum rawh.

³Lalpa PATHIAN chuan heti hian a ti: Ngai teh, Aigupta lal, Awle lian, Nail luia chêng Faraw, i chungah ka ṭuan dâwn. ‘Nail lui hi ka ta a ni a, ka tân ka siam a ni,’ i ti vei maw?

⁴I khabe-ah nghakuai ka riah ang a, i phuhlipah lui sanghate chu ka behtîr ang; Nail lui aṭang chuan lui sangha, i phuhlipa bet zawng zawng nên ka hnûk chhuak ang che.

⁵Thlalêrah ka paih ang chia, nang leh Nail luia sanghate chu leichârah in thal reng ang. Tu man in ruang an hlâwm lo vang a, chunglêng sava leh ramsa tlanah ka pe ang che.

⁶Tichuan, Aigupta mi zawng zawngin kei hi LALPA chu ka ni tih an hria ang. Israel chhûngte tân luang tiang ang lek an ni si a.

⁷An han hawl dâwn a, a tliak a; an dâr an herh phah a; an han rinchhan dâwn a, a bung ta a, an kâwng an herh ta a.”

⁸Chuvângin, Lalpa PATHIAN chuan heti hian a ti: “Ngai teh, i chungah khandaih ka lek ang a, mihring leh ran ka that vek ang.

⁹Aigupta ram chu a chhiain a ram vek ang; ‘lui chu ka ta a ni a, ka tâna ka siam a ni,’ a tih avângin.

¹⁰Aigupta ram leh Nail lui chungah ka ṭuan dâwn a ni: Migdol aṭanga Suene, Ethiopia ram ri thlengin ka tichhe vek ang a, a ruak hlauh vang.

¹¹Kum sawmli chhûng chu ramsa pawh, mihring pawh an kal lo vang a, awm an awm hauh lo vang.

¹²Kum sawmli chhûng chu ram azawnga ram chhe ber leh khua azawnga khaw chhe nasa berah ka siam ang a, Aigupta mite chu hnam dang zîngah ka hnawt darh ang a, ram tinah an darh ang.”

¹³Lalpa PATHIAN chuan heti hian a ti: “Kum sawmli a ral hnu chuan an darhna ram mite zîng ata Aigupta mite chu ka hruai khâwm leh ang.

¹⁴Sala an tâng chu ka hruai kîr ang a, an pianna ram Pathros-ah an kîr ang a, hnam nêm tak an ni ang.

¹⁵Hnam dang zawng zawng aiin an nêp ang a, hnam dang chungah an inlek tawh lo vang a, hnam dang chungah thu an nei tawh lo vang.

¹⁶Israel chhûngte chuan rinchhanah an hmang tawh lo vang a, ṭanpui atân an sâwm kha an tihdik lohzia an hre chhuak ang a, kei hi Lalpa PATHIAN chu ka ni tih an hria ang.”

¹⁷Kum sawmhnih leh pasarihna thla hmasa ber, tahrik ni khatah LALPA chuan ka hnênah:

¹⁸“Mihring fapa, Babulon lal Nebukadnezara chuan Tura bei tûrin sipai a ruai chiam a, an phur a rih êm avângin an chhîp a kawlh râwt a, an koki a pilh phung mai; mahse, Tura aṭang chuan Lal leh sipaite chuan an hah man eng mah an hmu lo.”

¹⁹Chuvângin, Lalpa PATHIAN chuan heti hian a ti: “Ngai teh, Babulon lal Nebukadnezara hnênah Aigupta ram ka pe dâwn. Aigupta ram thil neih tam êm êm chu a rawk ang a, a suam ang a, a sipaite hlawh atân a lâksak ang.

²⁰Ka rawng an bâwl avângin Aigupta ram hi ka pe a ni,” Lalpa PATHIAN thuchhuak chuan a ti.

²¹“Chutih hunah chuan Israel chhûngte chu ka tichak ang a, nang hi an zîngah thu ka sawitîr ang che; tichuan, LALPA chu ka ni tih an hria ang.”