Read Mizo Lushai Ezekiela 3 Bible Online

Ezekiela 3 - Mizo Lushai bible

Ezekiela 3

¹“Mihring fapa, lehkhabu zial i hmuh hi ei la; tichuan, kal la, Israel chhûngkaw hnênah thu va sawi ang che,” mi ti a.

²Ka kâ chu ka âng a, lehkhabu zial chu mi eitîr ta a,

³“Mihring fapa, lehkhabu zial ka pêk che hi lem la, puar takin ei rawh,” mi ti a. Tichuan, ka ei ta a, khawizu ang maiin a thlum a.

⁴“Mihring fapa, Israel chhûngkaw zîngah kal la, ka hrilh apiang che hi va hrilh ang che.

⁵Ṭawng harsa tak leh i hriat loh ṭawng hmang hnam hnênah ka tîr lo che, Israel-te hnênah a ni ka tirh che.

⁶Ṭawng harsa tak leh i hriat loh ṭawng hmang hnam hnênah tîr che ni ila, i thu an lo ngaithla mahna.

⁷Israel-te hi zawngin i thu an ngaithla lo vang, ka thu pawh an ngaithla duh ṭhîn lo va ni. Israel-te hi mi deh khirh tak leh luhlul tak an ni si a.

⁸Ngai teh, nang pawh anni ang bawka mi dehkhirh leh luhlul takah ka siam ang che.

⁹Meilung chang tak aia dehkhirhah ka siam dâwn a che. Hel hmang tak ni mah se, anni chu hlau suh la, an hmaah zâm hek suh ang che,” min ti a.

¹⁰Ka hnênah thu a sawi zêl a, “Mihring fapa, ka hrilh tûr che hi ngun takin ngaithla la, vawng tlat rawh.

¹¹Tho la, i chipui, saltâng-ho hnênah kal la, an ngaithla duh emaw, duh lo emaw, an hnênah, LALPA chuan heti hian a ti va ti ang che,” min ti a.

¹²Tichuan, Thlarauvin mi chawi kâng a, hnung lamah chuan, ‘LALPA, ropui taka chu, a chênna aṭangin fak rawh u,’ tia an au hluah hluah chu ka hria a.

¹³Thilnung pali thla hmâwr inkhawih phaa an thlâwk thâwm leh tawlailîr tlân thâwm ri hum hum chu ka hre bawk a.

¹⁴Chutichuan, Thlarau chuan min chawi kâng a, min hruai ta a. Ka hreh hle a, ka thin pawh a rim ṭeuh va. Mahse, LALPA chuan min hruai lui tlat a ni.

¹⁵Kebar lui kam, Telabib hmuna awm saltângte hnênah chuan min hruai a. An ṭhutnaah chuan ka ṭhu ve a, ni sarih chhûng chu hrilhhai takin ka ṭhu a.

¹⁶Ni sarih a ral hnu chuan LALPA thu chu ka hnênah a lo thleng a.

¹⁷“Mihring fapa, Israel chhûngkaw tân vêngtuah ka ruat a che. Ka thu i hriat hunah Israel-te chu min zilhsak ang che.

¹⁸Mi sual hnênah, ‘I thi ngei tûr a ni,’ ti ila, nangin i zilh lohva a nun theih nân a thil sual tih chu sim tûra i hrilh hmasak si loh chuan, chu mi chu a sual avâng chuan a thi ngei ang; mahse, a thihna mawh chu i chungah ka nghat ang.

¹⁹Chu mi chu i lo hrilh lâwka, a sualna a sim duh lohva a sual luih zêl chuan a sualna avângin a thi ang a; nang erawh chu a thihna mawh lakah i fihlîm ang.

²⁰Mi dik pawh, hawi kîrin thil sual ti sela, a tlûkchhiatna tûra ka tih chin a dai chuan a thi ang; nangin i zilh lo va, a sual avâng chuan a thi dâwn a ni, a thil ṭha tih ṭhinte chuan sâwtna a nei lo vang a, a thihna mawh chu i phur ang.

²¹Nangin mi ṭha chu sual ti lo tûrin i zilha, thil sual a tih loh chuan i zilhna a pawm avângin a nung ngei ang, i zilhna a ngaithla a, nang pawhin i tuar lo vang.”

²² LALPA chuan mi rawn chelh ta tlat a, ka hnênah, “Tho la, lui phaizâwlah sâwn va kal teh; tah chuan thu ka hrilh ang che,” min ti a.

²³Tichuan, ka tho va, lui phaizâwlah chuan ka kal ta a; LALPA ropuina, Kebar lui kama ka hmuh ang kha a lo awm a, bawkkhupin ka tlu ta a.

²⁴Thlarau chu ka chhûngah a lo lût a, min dintîr a, min bia a, “Kal la, inchhûngah inkhârhnan rawh.

²⁵Nang, Mihring fapa, phuar kawm tlat i ni ang a, an zîngah i lêng chhuak thei lo vang.

²⁶I lei chu i dangah ka tibet ang a, i ṭawng thei lo vang a, anni chu i zilh thei lo vang.

²⁷I hnêna thu ka sawi hunah i kâ chu ka hawnsak che ang a, Lalpa PATHIAN-in sawi tûra ka hrilh che chu an hnênah i sawi dâwn nia. A duh chuan an ngaithla ang a, a duh lo chuan an ngaithla lo vang, hel hmang an ni si a.