Read Mizo Lushai Ezekiela 30 Bible Online

Ezekiela 30 - Mizo Lushai bible

Ezekiela 30

¹ LALPA chuan ka hnênah,

²“Mihring fapa, thu puang la, heti hian ti rawh: Lalpa PATHIAN chuan heti hian a ti: Ṭap ula, chiau vawng vawng rawh u, Ni chu a lo thleng dâwn.

³Ni a lo hnai ta, LALPA ni a lo hnai e, Hnam tin tâna chhûm zîn ni chu.

⁴Aigupta ramah indona a chhuak ang a, Kus ramah lungngaih manganna, Aigupta mi tam tak an thi ang a, An hausakna lâk bo a ni ang a, An innghahna tihchhiat vek a ni ang.

⁵Kus mi te, Put mi te, Lud mi te, Arab-ho te, Kub te leh an thurualpuite chu indonaah an thi ang.”

⁶ LALPA chuan heti hian a ti: “Aigupta ram tungdingtute chu an thi ang a, An chhuan, kulh rinawmte pawh, a tlâwm ang. Migdol aṭanga Suene thlengin Indonaah mi an thi ang,” Lalpa PATHIAN thuchhuak chuan a ti.

⁷“Aigupta chu ram chhe hneh ber a ni ang a, a khuate chu khaw ram zînga chhe nasa ber a ni ang.

⁸Aigupta rama mei ka tihchhuaha, ṭanpuitute ka tihboral hunah LALPA chu ka ni tih an hria ang.

⁹Aigupta chhiat ni a lo thlen chuan Ethiopia, ngaihngam taka awm tizâm tûrin lawngin lamkal ka tîr ang a, Aigupta angin an thla a bâr ang. Chumi ni chu a lo thleng ṭêp a ni.”

¹⁰Lalpa PATHIAN chuan heti hian a ti: “Lal Nebukadnezara kut hmangin Aigupta hausakna ka titâwp dâwn.

¹¹Amah leh a hote, hnam râwng pui pui chu, ram tiṭiau tûrin an lo kal ang a, Aigupta mite chungah khandaih an phawi ang a, ram pumah ruang a thal pheng phung ang.

¹²Nail lui chu ka tikang ang a, mi sual pui pui kutah ka pe ang. Hnam dang mite chuan ram chu, a chhûnga awmte nên an tichhe vek ang. Kei LALPA hian ka sawi tawh hi.”

¹³Lalpa PATHIAN chuan heti hian a ti: “Nof khaw milemte chu ka tichhia ang a, thil tlâktlailo an biakte chu ka titâwp bawk ang. Aigupta ramah rorêl tûr tu mah an awm lo vang a, Aigupta mite chu an zâm ang.

¹⁴Pathros khua chu ka tiram ang a, Zoan khua pawh ka hâl ang a, No khua chu ka hrem ang.

¹⁵Sin khua, Aigupta kulh ropui chhûngah chuan ka thinurna ka leih ang a, No khaw mite ka râwt vek ang.

¹⁶Aigupta ramah mei ka chhuah ang a, Sin khua chu an chiai ang a, No khua chu an darh ang a, a kulhte chu a chim ang.

¹⁷Aven leh Pi-beset khaw tlangvâlte chu khandaihin an sât hlum ang a, mi dangte chu salah an hruai ang.

¹⁸Aigupta chakna ka tihchhiata, an kulh chhuan, rinawm chu, ka tihchim hunah chuan Tahfanes khuaah chuan ni a thim ang a, chhûm thimin a khuh ang a, a chhûnga mite chu salah an hruai ang.

¹⁹Aigupta ka hrem hun chuan LALPA chu ka ni tih an hria ang.”

²⁰Kum sâwm leh pakhatna, thla khat, tahrik ni sarih ni-ah LALPAN ka hnênah,

²¹“Mihring fapa, Aigupta lal Farawa bân chu ka tihtliahsak a, a dam theih nân an tuam lo va, khandaih a lek leh theih nân ṭhem an dawhsak hek lo.

²²Chuvângin, Lalpa PATHIAN chuan heti hian a ti: Aigupta lal Farawa bân ṭha lam, a tliak lo zâwk pawh chu ka tihtliahsak ang a, khandaih a chelh thei tawh lo vang.

²³Aigupta mite chu hnam tin zîngah ka tidarh ang a, ram tinah ka thawn darh ang.

²⁴Babulon lal kut chu ka tichak ang a, a kutah ka khandaih ka dah ang a, Farawa bân chu ka tihtliahsak ang; a hmaah chuan a hliam tuar avâng chuan a rûm dur dur ang.

²⁵Babulon lal kut ka tihchaka, Farawa a tlâwm hunah chuan kei LALPA hian Babulon lal kutah ka khandaih ka pe a, Aigupta ramah a lek ta a ni tih an hria ang.

²⁶Aigupta mite chu hnam tin zîngah ka tidarh ang a, ram tinah ka thawn darh ang; tichuan, kei hi LALPA chu ka ni tih an hria ang.”