Read Mizo Lushai Ezekiela 31 Bible Online

Ezekiela 31 - Mizo Lushai bible

Ezekiela 31

¹Kum sâwm leh pakhatna, thla thum, tahrik ni khatah LALPA chuan ka hnênah a sawi a:

²“Mihring fapa, Aigupta lal Farawa leh ka mite hnênah heti hian ti rawh: I ropuizia eng nên nge ka teh ang le?

³Lebanon tlâng Sidar a ni, Ṭawi luai, hlim nuam tak mai, A zîk sângin chhûm han tawng chu.

⁴Tlan tûr tui a tam a, Lei hnuai tui chuan a châwm lian a, A ṭona chu a tihnâwng a, Ngawa thing tinrêng châwm nân a luang.

⁵Tui tlan a ṭhat êm avângin Thing dang aiin a ṭhang chak a, A buk a lianin a zârte pawh a sei.

⁶Chunglêng savate chuan a bukah bu an chhep a, Ramsate chuan a buk hnuaiah no an nei, A hlimah chuan hnam tam tak an chêng bawk.

⁷A buk chu a mawiin a zâr duai a, A zung chuan hnianghnârin tui a hmu.

⁸Pathian huana sidar zîngah a tluk rêng an awm lo, Fârthingte lah a tluka buk an awm lo va, Thingse zârte pawhin a tluk hek lo.

⁹Buk mawi takin ka siam a ni, Pathian huan, Eden-a thing zawng zawngin an awt.”

¹⁰Chuvângin, Lalpa PATHIAN chuan heti hian a ti: “A ṭhang chakin a buk lian a, a zîkte chuan chhûmte a tawng tâk avângin a chapo ta a;

¹¹Chuvângin, ka hnâwl ta a ni; hnam dang lal hnênah ka pe ang a, thil sual a tih ang chu a chungah a rawn ti ve ang.

¹²Hnam râwng tak tak chuan an rawn kit ang a, tlângah leh kawrahte a zâr leh a ṭang tliak chu a awm nêlh nûlh ang. A hlima chêng ṭhîn hnamte chu an darh ang a, an kal bo vang.

¹³A thingluang chungah chuan savate an ṭum ang a, a zârte chu ramsaten an chîl ang.

¹⁴Tichuan, tui ṭhatna hmuna thing rêng rêng, a tluka ṭhang chak leh sâng, chhûm tawnga ding luah, a awm leh tawh ngai lo vang. Mihringte anga thi mai tûr leh leilâwta chhuk vek tûrin ka ti tawh a ni.”

¹⁵Lalpa chuan heti hian a ti: “Seol-a a chhuk ni chuan lei hnuai tui chu amah sûn nân ka chawlhtîr ang a, lui luang chu ka titâwp ang a, tuihna luang chhuak a awm lo vang; Lebanon tlâng chu ka tingui ruai ang a, thingte chu an vuai zo vang.

¹⁶Seol-a ka nam thlâk ni chuan a tla thâwmah hnamte chu an khûr ang a, Eden huan thing zawng zawng leh Lebanon thing ṭha ṭha, tui tamnaa ṭo, leilâwta tla tawhte chu, leilâwta a tlâk ve tâk avângin an lâwm ang.

¹⁷Khandaiha an sah hlumte zînga awm tûrin mitthi khuaah an chhuk dial ang. A hlima awm ṭhînte chu hnam tin zîngah an darh ang.

¹⁸“Eden huanah, nang anga lian leh ropui a awm em ni? Eden huana thingte ang bawkin mitthi khuaah i chhuk ang a, khandaiha sah hlum, serh tan lohho zîngah chuan i awm ve ang. Chûng chu Farawa leh a hote an ni,” Lalpa PATHIAN thuchhuak chuan a ti.