Read Mizo Lushai Ezekiela 32 Bible Online

Ezekiela 32 - Mizo Lushai bible

Ezekiela 32

¹Kum sâwm leh pahnihna, thla sâwm leh pahnih, ni khatah chuan LALPAN mi bia a:

²“Mihring fapa, Aigupta leh Farawa sûnna tûr hla heti hian phuah rawh: Hnam tin zîngah sakeibaknei vânglai ang i ni a, Tuipuia awle, luia chêng chu i ni, I chhek bûrh bûrh a, i tinu zo ta.

³Lalpa PATHIAN chuan heti hian a ti: Hnam tam tak an lo pun khâwm hunah, Ka lên ka zâr ang a, Lêna i âwk chu an hnûk chhuak ang che.

⁴Khawmualah ka dah ang chia, Leichârah ka paih ang che. Chunglêng savate ka tlantîr ang chia, Ramsa zawng zawng ka titlai ang.

⁵I ruang ṭawih tawh chu Tlângah leh ruamah te ka tidarh ang.

⁶Tlângah te i thisen ka leihbua ang a, I chênna lui te chu thisenin a khat ang.

⁷Ka tihboral hun che chuan vân ka khuh ang a, Arsi ka tithim ang. Ni chu chhûmin a hliah ang a, Thla pawh a êng hek lâwng.

⁸Vâna êng awm zawng zawng ka tihthimsak ang chia, I ram chu a thim tlat ang, Lalpa PATHIAN thuchhuak chuan a ti.

⁹I chhiat thu ka hriat hun chuan Hnam tam tak an thlabâr ang a, I hriat loh rama awmte pawh an chiai ang.

¹⁰A ni, mi tam tak an chiai ang a, An lalte pawh hlauvin an khûr ang. An hmaa khandaih ka vilik hunah i chhiat ni a lo thlen hun chuan Mi tin, thih ve hlauvin an khûr ang.”

¹¹Lalpa PATHIAN chuan heti hian a ti: “Babulon lal khandaih chu i tuar dâwn,

¹²I mite chu hnam râwng takte khandaihin ka thahtîr ang. Aigupta thil chhuanvâwrte chu An tichhia ang a, an tiboral vek ang.

¹³Tui tamna hmuna ran tlate chu ka tihlum vek ang. Tu mah an kal tawh lo vang a, Rante pawhin an dai nu tawh lo vang.

¹⁴A tuite chu ka tlin fîmtîr ang a, Luite chu ka luantîr dem dem ang, Lalpa PATHIAN thuchhuak chuan a ti.

¹⁵Aigupta ram chu ka tiram ang a, A chhûnga awm zawng zawng pawh an thah hunah Kei hi LALPA chu ka ni tih an hria ang.

¹⁶Hei hi amah an sûnna hla a la ni ang: Hnam tinrêng hmeichhiate chuan Aigupta leh a mite chu He hla hian an ṭah ang,” Lalpa PATHIAN thuchhuak chuan a ti.

¹⁷Kum sâwm leh pahnihna, thla khatna, ni sâwm leh panga ni chuan LALPAN min bia a:

¹⁸“Mihring fapa, Aigupta mite tân ṭap rawh; hnam dang chak tak tak, mitthi khuaa chhuk tawhte hnênah chhuktîr la, heti hian ti ang che:

¹⁹Tu aiin nge i mawi zâwk le? Serh tan lohho nêna awm tûrin chhuk rawh.

²⁰Aigupta mite chu indonaa thite zîngah an thi ve ang, That vek tûrin khandaih a inpeih ta.

²¹Seol-a kal tawh, an pasalṭhate chuan Farawa an lo lâwm a, ‘Amah ṭanpuitu, serh tan lohho, indonaa thite chu An lo chhuk ve ta a, an thal dêr mai,’ tiin.

²²Tah chuan Asuria pawh, a mite nên an awm ve a, khandaiha thite thlân chuan A thlân an hual tuau mai.

²³An thlânte chu lei hnuai thûkah chuan a awm a, A mite chu khandaiha thi an ni, A thlân vêlah an awm tuau mai, Mi nung ram tiralṭi ṭhîntute an ni.

²⁴Tah chuan Elam pawh a awm a, A mite chuan a thlân an hual tuau mai. An za chuan khandaiha thi an ni. Lei hnuai khurah an chhuk thla ta, serh tan lohhote chu. Mi nung ram tirâlṭi ṭhîntute an ni. Khur thûkah chuan mualpho takin an chhuk.

²⁵Elam chu khandaiha thahte zîngah a zâl ve a, A ni, serh tan loh, khandaiha thite chuan A thlân an hual. Mi nung ram tirâlṭi ṭhîntute an ni, Thi tawh zîngah an awm ve ta.

²⁶Tah chuan Mesek leh Tubal thlân pawh An mite thlânin a hual tuau mai. Serh tan loh vek an ni, thah vek an ni, Mi nung ram tirâlṭi ṭhîntute an ni.

²⁷Hmânlai pasalṭhate angin phûm an hlawh lo, Seol-ah râlthuam nên an chhuak, An khandaih an lukham a, An phaw inkhuh nân an hmang. Hêng mi huaite hi mi nung ram tirâlṭi ṭhîntute an ni.

²⁸Aigupta pawh a chhiat hnu chuan Serh tan lohho zîngah khandaiha thahte zîngah a zâl ve ang.

²⁹“Edom lal pawh, an miliante nên, ropui hle ṭhîn mah se, mitthi khuaah chuan an chhuk a; serh tan loh, khandaiha thahte nên an mu dul mai.

³⁰Hmâr lama mi lian zawng zawng leh Sidon mi zawng zawng pawh tah chuan an awm. An chak avângin miin an hlau ṭhîn chu an inzahpui ang a, serh tan lohho, khandaiha thahte nên, mualpho takin mitthi khuaah an chhuk ve ang.

³¹“Chûng mite chu Farawa leh a sipai, khandaiha thite chuan an lo hmuhin an thin a dam tawh ang,” Lalpa PATHIAN thuchhuak chuan a ti.

³²“Farawa leh a mi, mi nung ram tirâlṭi ṭhîntute chu serh tan lohho, khandaiha thahte zîngah an mu ve ang,” Lalpa PATHIAN thuchhuak chuan a ti.