Read Mizo Lushai Ezekiela 34 Bible Online

Ezekiela 34 - Mizo Lushai bible

Ezekiela 34

¹ LALPA chuan ka hnênah,

²“Mihring fapa, Israel-te vêngtu, berâmpuho demin thu sawi la, thu puang rawh. Berâmpuho hnênah chuan heti hian ti ang che: Lalpa PATHIAN chuan heti hian a ti: ‘Israel berâmpuho, mahni inhrai tlaite tak hi chu aw! Berâmpu chuan a berâmte a châwm tûr a ni lâwm ni?

³In ran thau in ei a, an hmul in sin a, a chum chum in talh a, berâm rual in châwm duh si lo.

⁴A sawngnawi in enkawl lo va, an nate intidam lo va, an hliam in tuam lo va, an tlânchhe darh in hruai khâwm lo va, a bo in zawng hek lo, an chungah râwng takin thil in ti zâwk si.

⁵Pu an neih loh avângin berâmte chu an darh a, ram sakawlh tinrêngin a darhte chu an seh a ni.

⁶Ka berâmte chu tlâng sângah te, mual lian takah te an bo va, tâmlakah te an darh a, tu man an zawng lo va, an lam lo.

⁷“Chuvângin, berâmpute u, LALPA thu hi ngaithla teh u, ‘Mi nung ka nih hi,’ Lalpa PATHIAN thuchhuak chuan a ti.

⁸Vêngtu an neih loh avângin ka berâmte chu seh mai theihin an awm a, ram sakawlh tinrêngin an ei a, berâmpute chuan an berâmte an zawng khâwm duh lo va, berâm châwm lovin anmahni chauh an inchâwm a ni.”

⁹Chuvângin, berâmpute u, LALPA thu hi ngaithla teh u.

¹⁰Lalpa PATHIAN chuan heti hian a ti: “Berâmpute u, ka va haw tak che u êm! Ka berâmte chu ka chhuhsak ang che u a, in enkawl leh tawh lo vang. In kut aṭangin ka berâmte chu ka chhan chhuak ang a, mahni chauh inchâwmin an sa in ei leh tawh lo vang.”

¹¹Lalpa PATHIAN chuan heti hian a ti: “Kei ngei hian ka berâmte chu ka zawng ang a, ka lam khâwm ang.

¹²Berâm darhte berâmpuin a lam khâwm ang hian kei pawhin ka berâmte chu, khaw dur ni leh thim tak an tawh laia an darhna ram tin ata ka lam khâwm ang.

¹³Hnam dang mite ram ata ka la khâwm ang a, ram tin ata ka khâwm ang a, an ramah ka hruai ang; Israel tlângramah te, lui kamah te, hmun nuamah te ka tlattîr ang.

¹⁴Hnim ṭhatna phûlah ka tlattîr ang a, Israel tlângram ṭhaah an awm ang, tah chuan huang an nei ang. Huangah chuan an bawk ang a, tlânga hnim ṭha ṭha chu an tlân ang.

¹⁵Ka berâmte chu keimah ngeiin ka châwm ang a, bawhna tûr ka siamsak ang,” LALPA PATHIAN thuchhuak chuan a ti.

¹⁶“A bo chu ka zawng ang a, a tlânchhe darh chu ka khalh khâwm ang a, an hliamte chu ka tuam ang a, a sawngnawite chu duat takin ka enkawl ang. A thau leh chakte chu ka vêng ang a, a tâwk têin chaw ka pe ang.

¹⁷“Nangni ka berâmte u, LALPA PATHIAN chuan heti hian a ti: “Berâm leh berâm inkâr thu te, berâm leh kêl inkâr thute ka rêl fel dâwn.

¹⁸Hnim ṭha ṭha in pet a, in peh sên loh in chîl chhia hi thil na mai em ni? Tui in in lahin a fîm in in a, in in sên loh in dai nu a.

¹⁹Ka berâm dangte chuan in chîl chhiat hnu an pet a, in dai nut hnu chauh in tûr an hmu.”

²⁰Chuvângin, Lalpa PATHIAN chuan an hnênah heti hian a ti: “Berâm chak leh chak lo inkâr thu ka rêl dâwn.

²¹A chak lo chu in nêk per a, in nawr kiang a, a rual zîng ata in phîn darh ṭhîn.

²²Chuvângin, ka berâmte chu ka chhan dâwn a ni; seh mai theiha an awm ka phal lo vang. Ka berâmte chungthu, a mal malin, ka rêlsak ang a, a ṭha leh ṭha lo ka thliar ang.

²³Vêngtu pakhat ka ruatsak ang a, ka chhiahhlawh Davida ang an lalah ka pe ang a, ani chu an vêngtu a ni ang.

²⁴Kei LALPA hi an Pathian ka ni ang a, ka chhiahhlawh Davida ang chu an hruaitu a ni ang; kei LALPA hian ka sawi tawh hi.

²⁵Thlamuang taka an awm theih nân remna thu ka thlunpui ang a, ram sakawlh zawng zawng ka hnawt bo vang a, ram rehah te thlamuang takin an awm ang a, ngaw hnuaiah pawh an mu chiah chiah thei ang.

²⁶“Mal ka sâwm ang a, ka tlâng vêlah ka awmtîr ang. A hun takah an tân malsâwm ruah ka surtîr bawk ang.

²⁷Thei kûngte chu ka tirah ang a, lovah thlai a ṭha ang a, mahni ram ṭheuhvah thlamuang takin an awm ang. An nghâwngkawl ka tihtliahsaka, chhiahhlawha neitute kut ata ka chhan chhuah hunah kei hi LALPA chu ka ni tih an hria ang.

²⁸Hnam dangte man mai mai tûr an ni tawh lo vang a, ramsate pawhin an seh tawh lo vang. Thlamuang takin an awm ang a, an thlaphâng tawh ngai lo vang.

²⁹An buh leh thlai ka tihhlâwksak ang a, ṭâm an hre tawh lo vang a, hnam dangin an hmusit tawh hek lo vang.

³⁰Israel chhûngte hi ka mite an ni a, kei LALPA hi an Pathian ka ni tih tu pawhin an hria ang.

³¹“Nangni berâm rual, ka berâm châwmte u, ka mite in ni a, kei hi in PATHIAN ka nih hi,” Lalpa PATHIAN thuchhuak chuan a ti.