Read Mizo Lushai Ezekiela 36 Bible Online

Ezekiela 36 - Mizo Lushai bible

Ezekiela 36

¹“Nang, Mihring fapa, Israel tlâng chungthu puang la, heti hian ti rawh: Israel ram tlângte u, LALPA thu hi ngaithla teh u.

²Lalpa PATHIAN chuan heti hian a ti: Hmêlmate chuan, ‘Chei! Hmunsâng, hmun hlunte chu kan ta a ni ta,’ an ti vei a.

³Chuvângin, thu sawi khum rawh: Lalpa PATHIAN chuan heti hian a ti: In vêla hnamte chuan in ram chu an neih theih nân an sawisa che u a, an tiram che u a, an chêksawlh che u a ni.

⁴Chuvângin, Israel tlângte u, Lalpa PATHIAN thu hi ngaithla teh u: tlâng te, mual te, kawr te, hmun ṭiau leh ram te, rauhsan leh rawk tâwk khawpui te, an vêla hnam dangten an chêksawlhte hnênah Lalpa PATHIAN chuan heti hian a ti:

⁵Lalpa PATHIAN chuan, Ka ṭhahnemngai thinrimin an vêla awm hnam dangte demin thu ka sawi a ni. Edom phei chu ka dem zual a ni. Hlim takin ka ram chu an nuihzat a, neih tumin an insem a, ran tlatna chu an nei ta a.

⁶“Chuvângin, Israel ram chungthu puang la, tlâng te, mual te, lui te, kawr hnênah te heti hian sawi ang che: Lalpa PATHIAN chuan heti hian a ti: Hnam dangin an tihmualpho che u avângin ka ṭhahnemngai thinrimin thu ka sawi a ni:

⁷Chuvângin, Lalpa PATHIAN chuan heti hian a ti: In vêla awm hnam dangte chungah ka kut ka lek ta, an mualpho dâwn.

⁸Israel tlângah te erawh chuan thingte chu a duah hluah hluah ang a, ka mi Israel-te tân a rah tiar tuar ang; an lo kîr leh hun chu a hnai tawh a ni.

⁹Ngai teh, in lamṭang ka nih hi, in lam ka hawi ang a, in lote chu in let ang a, thlai in chîng ang.

¹⁰Israel chhûngte chu ka tipung ang a, khaw ram tawhte chu in luah leh ang a, in chei hnûm ang.

¹¹In zîngah mihring leh ran an pung ang a, fa in ngahin in pung chak hle ang. Tûn hmaa in awm dân angin in awm leh ang a, ka tihmuingîl lehzual ang che u; tichuan, LALPA ka ni tih in hria ang.

¹²Ka mi, Israel-te chu ka hruai kîr ang a, ram chu an luah ang a, an nei leh ang, a ram tawh ngai lo vang.

¹³Lalpa PATHIAN chuan heti hian a ti: ‘He ram hi mihring heh ram a ni, an fate an sûn zêl mai,’ an ti ṭhîn.

¹⁴Mahse, ‘Mihring heh ram, fate sûnna ram,’ an ti tawh lo vang, Lalpa PATHIAN thuchhuak chuan a ti.

¹⁵Hnam dang hmuhsitna ri an hre tawh lo vang a, an rawn timualpho hek lo vang,” Lalpa PATHIAN thuchhuak chuan a ti.

¹⁶ LALPA chuan ka hnênah,

¹⁷“Mihring fapa, Israel chhûngte hian an rama an awm chhûngin an khawsak dân leh an thil tih dânin ram chu an tibawrhbâng a, hmeichhe fel loh lai angin ka hmaah an bawlhhlawh a ni.

¹⁸Ram chhûnga thisen an chhuah ṭhin avâng leh milema an intihbawrhbân ṭhin avângin an chungah ka thinur ka leih bua a ni.

¹⁹Hnam dang zîngah ka thawn darh a, ram tinah ka tidarh a, an awm dân leh thiltih dân angin ka hrem a ni.

²⁰Mahse, an kalna ram apiangah ka hming thianghlim an tichhe zêl si a. ‘Hêng mite hi LALPA mite an ni a; mahse, an awmna ram ata hnawh chhuah an ni,’ an lo ti zêl si a.

²¹Israel chhûngte kalna ram apianga ka hming a chhiat zui zêl avângin ka hming thianghlim chu ka lainat ta a.

²²Tichuan, Israel chhûngte chu hrilh rawh: Lalpa PATHIAN chuan heti hian a ti: Ka thil tih tum hi Israel chhûngte ka khawngaih vânga tih tum ka ni lo; ka hming thianghlim vânga tih tum ka ni, an kalna ram apiangah ka hming a chhe zui zêl si a.

²³Ka hming thianghlim ropuizia hi hnam tin zîngah ka tilang dâwn; nangmahni avângin an zîngah ka hming a chhe ta si a; chûng mite chuan kei hi LALPA chu ka ni tih an hre tûr a ni: Lalpa PATHIAN thuchhuak chuan a ti; ka thianghlimzia an hmu ang.

²⁴Hnam dang zîng ata ka la chhuak ang a, ram tin ata ka hruai khâwm ang a, an ram ka thlen ang.

²⁵“Tui thianghlim an chungah ka leih ang a, an bawlhhlawhna ka tifai ang a, an milemte lakah ka tifihlîm ang.

²⁶Thinlung thar leh rilru thar ka pe ang a, an thinlung, lung anga sak chu ka la bo vang a, thinlung nêm, tisa anga nêm chu ka pe ang.

²⁷An kawchhûngah ka Thlarau ka dah ang a, ka dânte an zâwm ang a, ka thupêkte awihin an ti ang.

²⁸An pate ka pêk ramah chuan an chêng ang a, ka mite an ni ang a, kei hi an PATHIAN ka ni ang.

²⁹An bawhchhiatna ata ka chhan chhuak ang a, an buh leh bâl ka tihhlâwksak ang a, ṭâm an tuar tawh lo vang.

³⁰An thei kûngte ka tirah ang a, an lova thlaite ka ti ṭha ang, ṭâm avângin hnam dangten an hmusit tawh hek lo vang.

³¹An awm dân ṭhat lohzia an hre chhuak ang a, an sualna avâng leh thil tenawm an tih ṭhin avângin anmahni an inten ang.

³²Nangmahni avânga hêng hi ti ka ni lo ve, Lalpa PATHIAN thuchhuak chuan a ti. Aw Israel chhûngte u, in awm dân avânga zak leh mualpho in ni tih in hriat ka duh a ni.”

³³Lalpa PATHIAN chuan heti hian a ti: “In bawlhhlawhna ka tihfai hunah in khuaah te ka awmtîr leh ang che u a, a chim chhiate chu in din thar leh dâwn nia.

³⁴A kal apiang hmuha hnim ber bur tawh, in lote chu in let leh ang.

³⁵‘He huan, ram daih tawh hi Eden huan ang zu ni leh ta a! Khaw chhe tawh, chim rem rum, an rauhsan tawh kha kulha inhungin an luah leh tâk hi!’ an ti ang.

³⁶A vêla hnam la awmte chuan kei LALPA hian khaw chhe chim tawhte leh ram tawhte chu ka din thar leh a ni tih an hria ang; kei LALPA hian ka sawi angin ka ti a ni.”

³⁷Lalpa PATHIAN chuan heti hian a ti: “Israel chhûngte tân ka inhawng tawh ang a, berâm rual angin ka tipung ang.

³⁸Kût nikhuaa an berâm hlan tûr Jerusalem khuaa a khat angin khaw chhe tawhahte mihring an khat ang; tichuan, kei hi LALPA chu ka ni tih an hria ang.”