Read Mizo Lushai Ezekiela 37 Bible Online

Ezekiela 37 - Mizo Lushai bible

Ezekiela 37

¹ LALPA chuan a kutin min vuan a, LALPA Thlarau chuan min hruai a, ruamah min dah a. Ruam chu ruhin a khat a.

²Ruamah chuan min hruai kual a, a ruam dâpin ruh chu a awm a, ruh ro tak tak hlîr a ni.

³“Mihring fapa, hêng ruhte hi an lo nung leh thei ang em?” min ti a. Kei chuan, “Lalpa PATHIAN, nangin i hria alâwm,” ka ti a.

⁴Ani chuan, “Hêng ruh chungchâng thu hi puang la, ruh ro hnênah heti hian sawi rawh: ‘LALPA thu ngaithla teh u,

⁵hêng ruh rote hnênah hian Lalpa PATHIAN chuan heti hian a ti: Ngai teh u, ka rawn chhêm ang che u a; tichuan, in nung leh ang.

⁶Thahrui ka pe ang che u a, vunin a khuh ang che u. Ka thâwk khum ang che u a; tichuan, in nung leh ang; kei hi LALPA chu ka ni tih in hria ang,’ ” a ti a.

⁷Thu min pêk ang chuan ka ti a; thu ka puan lai chuan thâwm ri rawk rawk ka hria a, ruhte chu an zawmpuite nên chuan an inchuktuah ta a.

⁸Ka en reng a, thahrui a lo awm a, tisain a tuam a, vunin a khuh ta ṭheuh va, mahse an la thaw thei lo.

⁹Ka hnênah chuan, “Mihring fapa, thli hnênah thu puang la, heti hian thli chu hrilh rawh: kâwlkil li-a thlite u, lo kal ula, hêng mi thah ruangte hi han chhêm ula, lo nung rawh se,” a ti a.

¹⁰Thu min pêk ang chuan ka puang a, thli chuan a rawn chhêm a, an nung a, an ding ta a, sipai rual tam zet an ni.

¹¹Heti hian mi ti a: “Mihring fapa, Israel chhûngte hi hêng ruh ro ang hi an ni, ‘Kan ruhte a ro zo ta, beisei a bo va, tihduhdah kan nih hi,’ an ti.

¹²Chuvângin, an hnênah heti hian puang rawh: Lalpa PATHIAN chuan heti hian a ti: An thlânte chu ka hawng ang a, thlân aṭangin ka mite chu ka la chhuak ang a, Israel ramah ka hruai ang.

¹³An thlân ka hawna, ka lâk chhuah hunah chuan kei hi LALPA chu ka ni tih an hria ang.

¹⁴Anmahniah ka Thlarau ka dah ang a, an nung ang a, an ramah ka hruai ang. Kei LALPA hian ka sawi ang ngeiin ka ti tih an hria ang,” LALPA thuchhuak chuan a ti.

¹⁵ LALPA chuan,

¹⁶“Nang, Mihring fapa, tiang pakhat la la, tah chuan, ‘Juda leh a thurualpui Israel fate,’ tih ziak rawh. Tiang dang pakhat la leh la, tah chuan, ‘Efraim tiang - Josefa leh a thurualpui Israel chhûngte tân,’ tih ziak bawk ang che.

¹⁷Tiang pakhat ni âwm takin a hmâwr pahnih chu hum zawm rawh.

¹⁸I mite chuan, ‘Hei hi eng tihna nge, min hrilh teh,’ an tih che chuan heti hian ti ang che:

¹⁹‘Lalpa PATHIAN chuan heti hian a ti: Ngai teh u, Josefa tiang, Efraim kuta awm, a thurualpui Israel chite chu Juda tiang nên ka hum kawp ang a, tiang pakhatah ka siam ang.

²⁰An hmuh atân tiang i ziak pahnihte chu hum kawp ang che.

²¹An hnênah, Lalpa PATHIAN chuan heti hian a ti, ti rawh: Ngai teh u, kei ngei hian Israel fate chu an kalna ram hnam dang zîng ata ka la khâwm dâwn; kil tin aṭangin ka hruai chhuak ang a, an ramah ka thlen ang.

²²An ram, Israel tlângahte chuan hnam khatah ka siam ang a, rorêl tûr lal pakhat an nei ang a, hnam hnih leh ram hnih ni ṭhîn chu an inṭhen tawh lo vang.

²³Milemte leh thil tenawm an tihte leh an bawhchhiatnate chuan an intibawrhbâng tawh lo vang a, an sual ṭhinna hmun ata chu ka chhan chhuak ang a, ka tifai ang; tichuan, ka mite an ni ang a, kei pawh an tân Pathian ka ni ang.

²⁴Ka chhiahhlawh Davida ang lal an nei ang a, rorêltu pakhat hnuaiah an awm ang. Dik taka rorêlin ka Dân an awihin an zâwm ang a, an ti bawk ang.’

²⁵“Ka chhiahhlawh Jakoba hnêna ka pêk ram, an pate awmna ramah chuan an awm ang. Tah chuan an chêng reng ang, an fa te, an tu te, an tuchhuan te thlengin an awm kumkhua tawh ang.

²⁶Thlamuang taka an awm theih nân kumkhaw remna thu ka thlunpui ang. Ka tinghet ang a, anni chu ka tipung ang a, ka hmun thianghlim chu an zîngah ka awmtîr kumkhua ang.

²⁷An zîngah ka chêng ang a, an tân Pathian ka ni ang a, ka mite an ni ang.

²⁸An zînga kumkhuaa awm tûr, ka hmun thianghlim, an zînga ka dah hunah chuan hnam dangte pawhin kei LALPA hian Israel-te hi ka mi atân ka thlang tih an hria ang.”