Read Mizo Lushai Ezekiela 38 Bible Online

Ezekiela 38 - Mizo Lushai bible

Ezekiela 38

¹ LALPA chuan mi bia a:

²“Mihring fapa, Magog rama Mesek leh Tubal hruaitu lian ber, Goga lam hawi la, thu sawi khum rawh:

³Heti hian ti ang che: Lalpa PATHIAN chuan Mesek leh Tubal hruaitu lian ber Goga hnênah heti hian a ti:

⁴Ka hua che a ni, ka tuai vir ang chia, i khabe-ah nghakuaiin ka kuai ang chia, i sipai rual te, sakawr leh sakawr chungchuang nalh tak taka inchei te, mi tam tak, awmphaw ha leh phaw keng, khandaih keng te nên ka hnûk chhuak ang che.

⁵I hote chu Persia mi te, Kus mi te leh Put mi te an ni; phaw leh dâr lukhum an za-in an nei.

⁶Gomer leh hmâr tâwpa awm Beth-togarma rama indo thiamte chuan an zui che, hnam dang zînga sipai rual tam tak pawh an tel.

⁷In peih la, i hote pawh inrâlring sela, vêng ngun rawh.

⁸“Ni eng emaw zât hnuah ka chhawr dâwn che a ni. Kum tam fe a ral hnuah hnam tam tak zînga darh ka hruai khâwmte thlamuang taka an awm tawhna, khandaih laka chhan ram, Israel tlângram chhe tawh leh ram tawh, thlamuang taka an awm leh tawhna ram chu, i rûn tûr a ni.

⁹Thlipui thawk buan buan angin sipai leh i ṭhuihruaite nên in bei ang a, ram chu chhûm ang maiin in tuam dâwn nia.

¹⁰“Lalpa PATHIAN chuan heti hian a ti: Chumi hnuah chuan thil ṭha lo tak tih i rilrûk ang a,

¹¹‘Kulh pawh nei hlei lo ramah chuan ka kal teh ang, kulh nei lo, a khârna leh kalhna pawh awm lo khuaahte thlamuang takin an chêng der der a, ka rûn dâwn a ni.

¹²Khaw chhe tawha chêngte chu ka rawk ang a, ka suam ang,’ i ti vei a. Chûng mite chu hnam tin zînga darh tawh hruai khâwm leh an ni a, ran leh sum an nei leh ta a ni.

¹³Seba leh Dedan mite leh Tarsis sumdâwngtute chuan, ‘Rawk tûr leh suam tûrin i sipaite i khâwm em ni? An tangka leh rangkachak te, an ran te leh sum te chhuhsakin hawn ṭeuh i tum em ni?’ an ti ang.

¹⁴“Chuvângin, Mihring fapa, thu puang la, Goga chu hrilh rawh: Ka mi Israel-te chu thlamuang taka an awm laiin i bei ang a,

¹⁵hmâr tâwp, i awmna ram aṭang chuan mi tam tak, sakawr chungchuang rual leh sipai rual nên i thawk chhuak ang.

¹⁶Chhûmin ram a tuam angin ka mi Israel-te chu i tuam ang a, a hun ka tihah chuan. Aw Goga, ka ram chu ka rûntîr ang che, hnam tinin tu nge ka nih an hmuha ka thianghlimzia a lan theih nân.

¹⁷Lalpa PATHIAN chuan heti hian a ti: Israel zâwlneite hmanga ka lo sawi daih tawh, ‘Israel-te bei tûrin mi tu emaw ka rawn hruai dâwn’ ka tih kha i ni.

¹⁸“Goga chu Israel ram bei tûra a lo kal hunah ka thinur hle ang, Lalpa PATHIAN thuchhuak chuan a ti.

¹⁹Ka thinur chuan, ‘Israel ramah, chumi ni chuan, lîr nasa takin ka tinghîng ang,’ ka ti a.

²⁰Tlângte a min ang a, khâmte a chim ang a, kulh bang te a chim ang; thih hlauvin tuipui sangha te, chunglêng sava te, ramsa te, bawkvâka kal te leh rama mihring awmte chu, ka hmaah chuan an khûr ang.

²¹Amah bei tûrin khandaih ka ruai ang,” Lalpa PATHIAN thuchhuak chuan a ti. “A mite chu khandaihin an inbei tawn ang.

²²Ruahpuivânâwn leh rial ka chhuttîr ang a, a kalpui sipaite leh a ṭhuihruai tam takte chungah kâta kâng mei ka sûrtîr ang.

²³Tichuan, hnam tin hmuhah ka ropuizia leh thianghlimzia ka tilang ang a, kei hi LALPA chu ka ni tih an hria ang.”