Read Mizo Lushai Ezekiela 39 Bible Online

Ezekiela 39 - Mizo Lushai bible

Ezekiela 39

¹“Nang, Mihring fapa, Goga chu thu sawi khum rawh. Lalpa PATHIAN chuan heti hian a ti: Mesek leh Tubal hotu lian ber, Goga, ka hua che a ni.

²Ka tuai vir ang chia, ka hnûk ang che. Hmâr tâwp aṭangin ka la chhuak ang che a, Israel tlângah ka hruai ang che.

³I kut vei lama thalngul chu ka titliak ang a, i ding lama thal chu ka tibung ang.

⁴Goga leh a sipaite, a ṭhuihruaite nên chuan Israel tlângah an thi ang a, an ruang chu ramsa leh chunglêng sava ka tlantîr ang.

⁵A ram dâpin an tlu pheng phung ang,” Lalpa PATHIAN thuchhuak chuan a ti.

⁶“Magog ramah leh tuipui kam, thlamuang taka an awmna ramah chuan, mei ka tichhuak ang a, mi tinin LALPA chu ka ni tih an hria ang.

⁷Ka mi, Israel-te chu, ka hming thianghlim ka hriattîr ang a, ka hming thianghlim chu anmahni avângin a chhe tawh lo vang. Hnam dangte chuan Israel Mi Thianghlima ka ni tih an hria ang.”

⁸Lalpa PATHIAN thuchhuak chuan heti hian a ti: “Ngai teh, ka hun sawi chu a lo hnai e, a thleng mai dâwn.

⁹Israel khuaa awmte chuan râlthuam tinrêng, phaw te, awmphaw te, thalngul te, thal te, talhtum te leh fei te chu thingah an fawm ang a, tuahah an hmang ang, kum sarih tla a ni ang.

¹⁰Thingtuah phur tûrin an ramah emaw, ngawa thing kit tûrin emaw an thawk chhuak ngai lo vang. Râlthuam tlâwmsan chu thingtuahah an hmang dâwn a ni. Anmahni rawktu chu an rawk ang a, suamtu chu an suam ve thung dâwn a ni,” Lalpa PATHIAN thuchhuak chuan a ti.

¹¹“Chumi hnuah chuan, Tuipui Thi chhak lama awm Abarim ruam an tih, Israel ramah chuan, Goga thlân hmun ka pe ang, chutah chuan Goga leh a ṭhuihruaite chu an phûm ang. Chu chuan khualzinte a dang ang a, ‘Hamon Gog ruam’ an vuah ang.

¹²Ram a thian theih nân thla sarih chhûngin Israel-te chuan an phûm zo hrâm ang.

¹³Phûmnaah chuan rama awm zawng zawng an thawk ang a, ka ropuina ni a thlen hunah chawimawi an ni ang,” Lalpa PATHIAN thuchhuak chuan a ti.

¹⁴“Thla sarih a ral hnu chuan, ram pum fang chhuak tûr, ruang phûm loh a awm emaw tih zawnga hnaa neih tûr mi an ruat ang. Chutiang chuan ram chu an thian fai dâwn a ni.

¹⁵Chûng mite chuan an kal velnaah mihring ruh an hmuh phawt chuan a bulah chhinchhiahna an târ ang a, thlân laitute chuan an phûm tûr a ni.

¹⁶Chumi bulah chuan khaw pakhat, Hamona tih a awm. Tichuan, ram chu a lo thiang ang.

¹⁷“Nang, Mihring fapa, Lalpa PATHIAN chuan heti hian a ti: chunglêng sava te leh ramsa te chu hrilh rawh: lo kal sela, kil tin aṭangin lo kal khâwmin inthawina ruai ropui ka buatsaihah hian sa han ei sela, thisen han in rawh se.

¹⁸Mi huaisen sa te in ei ang a, ram hruaitute thisen in in dâwn nia; berâm te, berâmno te, kêl te, bâwngchal te leh Basan ran chum te inthawi nân ka talh a ni.

¹⁹“Ka ruai buatsaiha sa thaute chu êleuhvin in ei ang a, thisente chu rui khawpin in in ang.

²⁰Ka dawhkâna sakawr leh a chungchuang, mi huaite leh indo thiamte sa chu duh tâwkin in ei ang,” Lalpa PATHIAN thuchhuak chuan a ti.

²¹“Hnam tin hnênah ka ropuizia ka tilang ang a, ka rorêl tâk dân chu an hmu ang.

²²Chumi ni aṭang chuan Israel chhûngte chuan kei hi LALPA, an Pathian chu ka ni tih an hre tawh ang.

²³Ka chunga thil an tihsual avângin Israel-te chu salah ka tântîr a nih hnam dangte chuan an hria ang; ka chungah an rinawm lo va, ka hawisan ta a, khandaihah an thi a ni.

²⁴An bawlhhlawhna leh an bawhchhiatna avângin ka hrem a, ka hawisan a ni.”

²⁵Chuvangin, Lalpa PATHIAN chuan heti hian a ti: “Jakoba saltâng chu ka hruai chhuak ang a, Israel chhûngte chu ka khawngaih ang; ka hming thianghlim chu ka humhalh ang.

²⁶Tu man rawn tibuai lova anmahni ram ngeia thlamuang taka an awm hunah chuan min hawisan avânga an mualphona chu an theihnghilh thei tawh ang.

²⁷Ka thianghlimzia tilang tûrin an hmêlmate awmna ram ata ka hruai khâwm ang a,

²⁸hnam tin zîngah sala thawn darha, an ramah ngei hruai kîr leha, tu mah hruai hmaih nei lotu an Pathian LALPA chu ka ni tih an hria ang.

²⁹Ka hawisan tawh lo vang a, Israel chhûngte chungah ka Thlarau ka leih ang,” Lalpa PATHIAN thuchhuak chuan a ti.