Read Mizo Lushai Ezekiela 4 Bible Online

Ezekiela 4 - Mizo Lushai bible

Ezekiela 4

¹“Nang, mihring fapa, leirawhchan phêk la la, i hmaah phah rawh; tah chuan Jerusalem khawpui lem ziak la,

²khaw hual angin cheibâwl la, phen tûr te siam la, lei te chhûng pâwng la, bûk sa la, bang chhut chhiatna te bun rawh.

³Thîr phêk la la, khaw lem nêna in inkârah chuan chhawng ang che; khaw lem chu hawi la, i hual dâwn nia, Israel-te tân entîrna i ni ang.

⁴“Tin, i vei lam delhin mu la, Israel-te sual mawh ka phurhtîr dâwn che a ni. I mut chhûngin Israel-te sual hremna i tuar ang.

⁵An kum khat sual aiah ni khat ka tuartîr ang che; ni zathum leh sawmkaw chhûng Israel-te sual chu i tuar dâwn a ni.

⁶Chumi zawhah chuan i ding lam delhin mu leh ang che, ni sawmli chhûng Juda-te sual i tuar leh ang, an kum khat sual aiah ni khat i tuar tûr a ni.

⁷Jerusalem chu hmachhawnin i hual ang a, i kuttum vilik la, a chhiat tûr thu hrilh mawlh mawlh ang che.

⁸Hual tûra ka tih chhûng che i tlingtlâk hma chu che sawn thei lovin ka phuar tlat dâwn che a ni.

⁹Huit leh barli te, be leh dailuah te, chhangphut te la la, bêlah dah khâwm ang che; ni zathum leh sawmkaw chhûng, i vei lam delha i mut chhûng zawng chuan chu chu chhangah siam la, i ring tûr a ni.

¹⁰I duh hun hunah ni khat chhûngin gram zahnih leh sawmthum bûk chiah i ei thei ang.

¹¹Tui pawh, i duh hun hunah ni khat chhûngin no hnih chin chiah i in thei ang.

¹²Chhangpêr i siam ang a, mihring êk ro mûtin i hem hmin ang a, an zaa hmuhah i ei dâwn nia,” a ti a.

¹³ LALPA chuan, “Ka thawn darhna tûr rama mite zîngah Israel fate pawhin chutiang chuan chaw bawlhhlawh an ei ang,” a ti a.

¹⁴Kei chuan, “Khai a, Lalpa PATHIAN, thil bawlhhlawh ka la ei ngai lo asin. Ka tleirâwl chhuah aṭangin a thisâwn leh a tlaw, sa rêng rêng ka la ei ngai lo, sa thianglo sa chu a tem pawh ka la tem ngai hlei nêm,” ka ti a.

¹⁵Tichuan, ka hnênah, “En teh, mihring êk aiah bâwng êk ka pe ang che, chu chuan chhang chu i hem hmin dâwn nia,” a ti a.

¹⁶Ka hnênah chuan a sawi zêl a, “Mihring fapa, ngai teh, Jerusalem khaw mite ei tûr, an chaw hmuhna hnâr chu ka chhu chat dâwn, an neih chhun chu bûk ker ker chauhvin thlaphâng takin an ei ang; tui pawh, hrilhhai takin a teh ker kerin an in ang.

¹⁷Ei tûr leh in tûr an tlachham ang a, hrilhhai takin an inen ang a, an sual avângin an râwp ral dâwn a ni,” a ti a.