Read Mizo Lushai Ezekiela 40 Bible Online

Ezekiela 40 - Mizo Lushai bible

Ezekiela 40

¹Sala kan tân kum sawmhnih leh pangana, Jerusalem an lâk aṭanga kum sâwm leh pali, kum thar, ni sâwm ni chuan LALPA chuan a kutin min chelh a, min hruai ta a.

²Inlârnaah chuan Pathianin Israel ramah min hruai a, tlâng sâng takah min dah a, ka hmaah chuan khawpui din thar ni âwm tak ka hmu a.

³Chutah chuan min hruai a, dâr tle anga lang mi pakhat ka hmu a, hrui leh tehna tiang a keng a, kawngka bulah a ding a.

⁴Chu mi chuan ka hnênah, “Mihring fapa, ngun takin en la, ngaithla rawh; ka entîr tûr zawng zawng che hi chhinchhiah tlat rawh: chumi atân chuan hetah hian ka hruai che a ni. I hmuh zawng zawng hi Israel chhûngte i hrilh tûr a ni,” a ti a.

⁵Ka hmuh chu Tempul a lo ni a; a vêlin bang a awm a. Tehna tiang a ken chu metar thuma sei a ni: bang chhah lam leh sân lam chu a han teh a, tiang tlûk khat ve ve a ni.

⁶Khawchhak lam aṭanga luhna rahkaah chuan a chho va, rahka tâwpah chuan zâwl, tehna tiang tlûk khata zau a lo awm a.

⁷Luh zêlna sîr tuakah chuan vênbûk pathum ve ve a awm a, vênbûk dung leh vâng chu a inchen a, tiang tlûk khat a ni. Vênbûk inkâr bang chu tawng ruka chhah a ni.

⁸Vênbûk chhûng ber aṭangin luh zêlna chu tiang tlûk khata thui a ni.

⁹Chumi dawtah chuan veranda, a chhûng thlâk tawng riat a awm a, ban tawng hnih biala lian a awm leh a.

¹⁰Khawchhak lam han thlîr lêt chuan luhna sîr tuaka vênbûk awm chu a intiat vek a, an inkâr bang chhah lam pawh a inang.

¹¹Luhna zau lam chu a han teh a, tawng sâwm leh pathuma zau a ni a, ban awmna laiah erawh chuan tawng sâwma zau a ni.

¹²Vênbûk luhna bang bulṭhut chu, tawng khata chhah, tawng khata sângin an tipâwng a, bang bul chu luhna sîr tuakah tawng ruk zêl a awm a ni.

¹³Vênbûk in ep, châr bang ve ve inkâr chu tawng sawmhnih leh panga a ni.

¹⁴Luhna leh chhuahna ban chu tawng sawmruk vêla sângah a ngai a.

¹⁵Luhna tawntirh aṭanga hung chhûng lama chhuahna inkâr chu tawng sawmngaa thui a ni.

¹⁶Vênbûk chhûng châr lam bangah chuan tukverh tê a awm a, a sîr bangah pawh a awm ve ve a, kalna hrûl pindan bangah chuan tûm kûng lem an ziak a.

¹⁷Hung chhûng tualah chuan mi hruai a, pâwn lam pang bang ringin pindan sawmthum a awm a.

¹⁸Chûng pindan tual chhuat chu lung rem vek a ni, chuanhnuai tual zawng zawng nên.

¹⁹Chuanchunga luhna leh chuanhnuaia chhuahna inkâr chu a teh a, tawng za a ni.

²⁰Hmâr lam aṭanga luhnaah chuan mi hruai leh a, luhna thui zâwng leh a zau lam chu a teh a.

²¹Luhna sîr tuaka vênbûk pathum awm ve ve te, an inkâr bang leh a bang ṭhut pâwng bîk te, a ban leh a ban inkâr te chu khawchhak lam aṭanga luhna ang chiah kha a ni; tawng sawmngaa thui, a zau lam tawng sawmhnih leh panga a ni.

²²Tukverh tê te, luhna tawntirh ban te, tûm kûng lem te pawh khawchhak lam aṭanga luhnaa mi ang kha a ni. A luh tirhnaah ban a awm a, rahka pasarih a nei.

²³Chuanhnuai tual luhna zâwnah chuanchung luhna a awm bawk a, an inkâr chu a teh a, tawng za a ni.

²⁴Chhim lamah min hruai leh a, chutah pawh chuan luhna a awm a, a dang ang bawkin bante chu a the a.

²⁵Tukverh tê te, bang bul pâwng bîk te a awm ve vek a; luhna thui zâwng pawh tawng sawmnga a ni a, a zau zâwng pawh tawng sawmhnih leh panga a ni.

²⁶Luh chhohnaah rahka pasarih a awm a, ban te a awm a, banga tûm kûng lem ziak te, luhna sîr tuaka awmte pawh chu a inang a.

²⁷Chuanhnuai luhna leh chuanchung luhna inkâr pawh a teh a, tawng za bawk a ni.

²⁸Chhim lam aṭanga luhna kal tlangin chuanchung luhnaah chuan min hruai a, chuanhnuai luhna ang bawk kha a ni.

²⁹Vênbûk te, bang te, luhna bul ban te, banga tukverh tê te a awm ve vek a, tawng sawmngaa thui, sawmhnih leh pangaa zau bawk a ni.

³⁰Veranda dung chu tawng sawmhnih leh panga a ni a, a vâng lam chu tawng nga a ni.

³¹Banahte leh bangahte chuan tûm kûng lem ziak a ni a, a hnuai aṭanga chuanchung lâwn chhohna rahka chu pariat a ni.

³²Khawchhak lam aṭanga luhna kal tlangin chuanchung luhnaah min hruai leh a, a han teh a, a dang ang bawk a ni.

³³Vênbûk te, veranda te, chhûng lam pindan bang te pawh a dang tiat vek a ni. Tukverh tê te, ban te, hulhliap te a awm vek a, a thui lam pawh tawng sawmnga, a zau lam tawng sawmhnih leh panga bawk a ni.

³⁴Chuanhnuai lamah ban a awm bawk a, tûm kûng pawh banah chuan ziak a ni, chhohna rahka chu pariat a ni.

³⁵Hmâr lam aṭanga chuanchung luhnaah chuan min hruai leh a, a teh a, a dang ang bawk a ni.

³⁶Vênbûk te, a ban te, hulhliap te, tukverh tête a awm ve vek a, a thui lam tawng sawmnga, a zau lam tawng sawmhnih leh panga bawk a ni.

³⁷Chuanhnuai lamah ban a awm bawk a, banahte chuan tûm kûng lem ziak a ni a, a chhohna rahka chu pariat a ni.

³⁸Hmâr lam aṭanga chuanchung luhna sîrah chuan in pakhat a awm a, luhna aṭanga kal luh nghâl mai theih a ni, hetah hian hâlral thil hlan tûr an sil ṭhîn.

³⁹He inah hian dawhkân pali a awm a, bang bulah pahnih ve ve a awm a. Inthawinaa hlan tûr, hâl ral tûr emaw, sual thawina tûr emaw, thiam loh inthawina tûr emaw hêng dawhkânah hian an talh ṭhîn a ni.

⁴⁰Pindan pâwn, hmâr lam aṭanga luhna sîrah chuan dawhkân pahnih a awm ve ve bawk a,

⁴¹ran talhna tûr dawhkân chu a vaiin pariat a ni, tualah pali, in chhûngah pali.

⁴²Hâlral tûr an dahna dawhkân, lungchher kil li nei, tawng khat leh a chanvea inbial, tawng khat leh a chanvea sâng pali in chhûngah chuan a awm a. Ran talhna hmanrua zawng zawng chu hêng lung dawhkânah hian an dah ṭhîn.

⁴³Lung dawhkân tlâng kawmna, kutphah bênga chhah, a tlângah chuan a awm chhuak a, hetah hian maichâma hlan tûr sa an dah ṭhîn a ni.

⁴⁴Chuanchung zâwlah chuan mi hruai chhuak a, hmâr lam aṭanga luhna lamah leh chhim lam aṭanga luhna lamah in a awm ve ve a; pakhat chuan chhim lam a hawi a, pakhat chuan hmâr lam.

⁴⁵Hmâr lama awm, chhim lam hawi chu, Tempula thawktute awmna a ni.

⁴⁶Chhim lama awm, hmâr lam hawi chu maichâma rawngbâwltute awmna a ni, chûng mite chu Zadoka thlahte an ni, Levia thlahte zîngah anni chauh hi a ni LALPA hmaa kala, rawngbâwl theite chu.

⁴⁷Chuanchung zâwl chu a teh a, tawng zaa sei, tawng zaa zau a ni a, a inbial a ni; Tempul kawtah chuan maichâm a awm bawk.

⁴⁸Tempul pindan hmasaah min hruai leh a, rahka tâwp, chhuah chhohnaah zâwl, tawng ngaa zau a lo awm a, chu chu lehlam lehlamah a kal zêl a. Pindan hmasa luhna bang chu tawng thuma chhah a ni a, bang leh bang inkâr chu tawng sâwm leh pali a ni.

⁴⁹Pindan hmasa chhûng vâng lam chu tawng sâwm leh pahmin a ni a, a dung lam chu tawng sawmhnih a ni. Pindan hmasa tualzâwl chhohna chu rahka sâwm a ni, rahka chhuahah ban a awm ve ve bawk.