Read Mizo Lushai Ezekiela 41 Bible Online

Ezekiela 41 - Mizo Lushai bible

Ezekiela 41

¹Hmun Thianghlim luhna sîr bang chu tawng ruka chhah ve ve a ni, puan in zau lam tiat a nih chu.

²Luhna bang leh bang inkâr chu tawng sâwma zau a ni a, pindana luhin luhna sîr lam chu tawng nga ve ve a la ni a. Hmun Thianghlim chu a han teh a, tawng sawmli-a sei a ni a, a vâng lam chu tawng sawmhnih a ni.

³Pindan chhûngril luh zêlna kawng sîr bang chu tawng hniha chhah a ni a, bang leh bang inkâr chu tawng ruk a ni; luhna bang sîr tuaka pindan bang la awm chu tawng sarih ve ve a nih chu.

⁴Pindan chhûngril chu a han teh a, a dung leh vâng a inchen a, tawng sawmhnih ve ve a ni. ‘Hei hi Hmun Thianghlim Ber chu a ni,’ tiin min hrilh a.

⁵Tempul bang chhah lam chu a han teh a, tawng ruka chhah a ni. Bang ring chuan pâwn lamah pindan, tawng li-a zau a awm tluanchhuak a.

⁶Chûng pindan chu chhâwng thuma sânga sak a ni, chhâwng khatah pindan sawmthum zêl a awm a. Tempul bang chu chhâwng tinah a pan hret hret zêl a, in chhâwng chhuat chu Tempul banga va lût lovin a chhawrah chuan a innghat mai a,

⁷Pindan sâng apiang a zau hret hret zêl a ni. Pâwn lam aṭanga en chuan Tempul bang chu a lang zuih chuang lo. Chhâwng hnihnaa lâwn chhohna a awm a, chuta ṭang chuan chhâwng thumnaa lâwn chhohna a awm leh a.

⁸In chhuat chu a pâwng hret a, leia bang innghahna chu tawng ruk a ni.

⁹Hêng pindan hual hian kawng tawng ngaa zau a awm chhuak a, bang tawng ngaa chhahin a hual chhuak bawk a ni.

¹⁰He bang pâwn lamah hian hmun âwl, tawng sawmhniha zau Tempul hual chuan a awm bawk a.

¹¹He hmun âwl aṭang hian chhûng lam luhna tûr kawngka, chhim lam leh hmâr lamah pakhat ve ve a awm.

¹²Khawthlang lam, Tempul châr lamah chuan, in a awm a, tawng sawmsariha zau, tawng sawmkuaa seia hung a ni, a hungna bang chu tawng ngaa chhah a ni tluanchhuak a.

¹³Tempul chu a han teh a, tawng zaa sei a ni a, a hnung hmun zâwl leh in awm chu tawng za bawk a ni.

¹⁴Tempul hma lam tual chu a teh a, tawng za a ni. Khawthlang lama hung bâk zâwla in awmte chu a teh a, tawng za bawk a ni.

¹⁵Tempul pindan hmasa te, Hmun Thianghlim te leh Hmun Thianghlim Berte chu

¹⁶a bang thingphela thuah vek a ni; bangah chuan tukverh lem a khât tâwkin a awm chhuak vek a, luh tirh aṭanga in chhûng chu chhuat aṭanga tukverh lem thleng chuan thingphela thuah chhuah vek a ni. Tukverh tête chu hawn tlang a ni lo.

¹⁷Kawngka chung lam pawh a chhûng lam leh pâwn lam thuah vek a ni. Pindan chhûng lam thuahna tluan chuan thil lem ker chhuah vek a ni.

¹⁸Cherub leh tûm kûng lem, inkârthlâk chiata ker chhuah vek a ni. Cherub-te chuan hmai pahnih an nei a,

¹⁹mihring hmêl ang chuan tûm kûng lam a hawi a, sakeibaknei hmêl ang chuan lehlama tûm kûng lam a hawi a. Chutiang chuan Tempul chhûng thuahna thingphel chu ker chhuah vek a ni.

²⁰Chhuat aṭanga kawngka lu chung thlengin Cherub lem leh tûm kûng lem chu a awm a ni.

²¹Hmun Thianghlim Ber luhna kawngkhâr ban chu kil li nei a ni a, Luhna bulah chuan

²²maichâm ang thing dawhkân, tawng thuma sâng, tawng hniha zau, tawng hniha sei a awm a; a bang te, a chung te leh a kil ban killi te chu thing vek a ni.

²³Hmun Thianghlim Ber luhna leh hmun thianghlim luhna kawngkhâr chu

²⁴khâr hnih nei ve ve a ni.

²⁵Hmun thianghlim Ber kawngkhârah chuan, in chhûng banga ker ang bawk khân cherub lem leh tûm kûng lem a awm a, kawngka lu chung aṭang chuan thingphel zâr a awm a.

²⁶Luhna bang sîrah chuan tukverh tê a awm bawk a, chumi sîrah chuan tûm kûng lem a awm bawk.