Read Mizo Lushai Ezekiela 42 Bible Online

Ezekiela 42 - Mizo Lushai bible

Ezekiela 42

¹Hmâr lam tualah min hruai chhuak a, Tempul huala hmun âwl dung zuia in awmah chuan min hruai a.

²A dung chu tawng za a ni a, a vâng chu tawng sawmnga a ni.

³Tempul hual hmun âwl tawng sawmhniha zau aṭanga teh ṭan a ni a, in chuan chuanhnuai zâwk tual thlengin a awh a ni. Chhâwng thum a ni a, a chhawr a awm zêl a.

⁴Hmâr lam hawi pindan kawngkhâr hmaah chuan kalna, tawng sâwma zau a awm a, a thui lam chu tawng za a ni.

⁵Pindan hnuai zâwk chu a chhawr a awm avângin a chung zâwk ai chuan a zîm, a chhawr chuan a la hêk a ni.

⁶Chhâwng thum ni mah se in dangte anga ban a neih loh avângin a bulṭhut pindan ai chuan a chhâwng bangte chu a pan hret hret a ni.

⁷Pindan hrûlah, bang tawng sawmngaa sei, tual zau lam depah chuan a awm a.

⁸Tual zau lam hawi pindante chu tawng sawmnga a ni a, Tempul lam hawi erawh chu tawng za a ni.

⁹Chuanhnuai tual aṭang chuan khawchhak lam aṭanga pindana luh chhohna kailâwn a awm.

¹⁰Chhim lamah pawh, Tempul huala hmun âwl dung zui bawkin in a awm a.

¹¹Hmâr lam ina awm ang bawk kha kalnate a awm a, pindante pawh a intiat a, kawngkhâr te, a rem hmang te, luh chhohna te a inang vek a ni.

¹²Chhim lam hawi kawngka hmaa kal ṭannaah chuan khawchhak lam aṭanga lo luhna kawngka a awm.

¹³Mi chuan mi bia a, “Hmun zâwl dung zui, chhim leh hmâr lama pindan awmte hi pindan thianghlim an ni: LALPA hmaa inlan ṭhîn puithiamte chuan inthawina sa thianghlim chu hetah hian an ei tûr a ni. Inthawina thil thianghlim, chhangphut hlan te, sual thawina te, thiam loh thawina te dah khâwmna tûr a ni, Hmun Thianghlim a nih hi.

¹⁴Puithiamte chu Hmun Thianghlima an luhin chuanhnuai tualah an chhuak tûr a ni lo, an thawmhnaw chu hlîpin hetah hian an dah zet tûr a ni, an thawmhnawte pawh chu thil thianghlim a ni si a. Mipui awmnaa an chhuah dâwn chuan thawmhnaw dang an inbel tûr a ni,” a ti a.

¹⁵Tempul leh a tual vêl a teh zawh chuan khawchhak aṭanga luhnaah chuan min hruai chhuak a, Tempul ram zauzâwng chu a teh kual ta a.

¹⁶Khawchhak lam bang chu a han teh a, tawng zangaa sei a ni.

¹⁷Hmâr lam bang a han teh leh a, tawng zangaa sei a ni.

¹⁸Khawthlang lam bang a teh a, tawng zangaa sei a ni.

¹⁹Chhim lam bang a han teh leh a, tawng zangaa sei bawk a ni.

²⁰A bang kil li chu a teh chhuak a, a bang dung lam te, a vâng lam te tawng zanga ṭheuh a ni; bang chu thianghlim leh thianghlim lo daidangtu a ni.