Read Mizo Lushai Ezekiela 43 Bible Online

Ezekiela 43 - Mizo Lushai bible

Ezekiela 43

¹Khawchhak lam aṭanga luhnaah chuan mi hruai leh a.

²Khawchhak lam aṭangin LALPA ropuina a lo kal a, a aw chu tuifinriat thâwm ang a ni; a ropuina avâng chuan lei chu a êng pum a.

³Inlârna ka hmuh lan dân chu Jerusalem tichhe tûra PATHIAN inlârna ka hmuh ang leh Kebar lui kama ka hmuh ang kha a ni a, bawkkhupin ka tlu ta a.

⁴LALPA ropuina chu khawchhak lam aṭanga luhna kal tlangin Tempul chhûngah chuan a lût ta a.

⁵Thlarau chuan min chawi a, chuanchung tualah chuan min hruai a. Ngai teh, Tempul chu LALPA ropuinain a khat vek a.

⁶Ka bulah chuan mi pakhat a ding a, Tempul aṭanga lo chhuak aw ka hria a, heti hian mi rawn hrilh a:

⁷“Mihring fapa, hei hi ka lalṭhutthlêng ka hûnna leh ka ke nghahchhan awmna chu a ni; ka mi Israel-te zîngah hetah hian ka chêng kumkhua tawh dâwn a ni. Israel chhûngte leh an lalte chuan ka laka uirein ka hmun thianghlim an tibawrhbâng tawh ngai lo vang; pathian dangte hmunsâng angin an lalte ruang phûm nân an hmang a,

⁸ka tual ânin in an sa a, ka bang bul rêtah ban an phun ṭhîn, an thil tenawm tihte chuan ka hming thianghlim an tibawrhbâng a, ka thin a ur a, ka hrem ta a ni.

⁹Tûnah, an uirena chu bânsan sela, an lal ruangte chu la sawn rawh se; tichuan, an zîngah ka awm kumkhua ang.

¹⁰“Nang, Mihring fapa, Israel chhûngte hnênah ka Tempul sak dân tûr hi sawi la, a len lam leh a rem dân hmang hi hrilh rawh. An thil sual tihte avângin tizak rawh.

¹¹An sualte avânga zah nachâng an hriat chuan Tempul din dân tûr hi an hnênah hrilh fiah la, a luhna leh a chhuahna te, a len lam te, a zau lam te hrilh rawh; a hman dân tûr te, a chhawr dân tûr te an hmuh atân ziak rawh; tichuan, a awm dân hi an zuia, a hman dân tûr angin an hman theih nân.

¹²“Hei hi Tempul hman dân tûr chu a ni, a tlâng hualin hmun serh a ni a, hman thianghlim a ni tûr a ni.

¹³“Tawng khat leh kutphah bêng, tawng khata ngaiin maichâm chu hetiang tûr hi a ni. A lei ṭhut chu tawng khata chhah lung rem tûr a ni; a kotlangah khuaptu a awm chhuak tûr a ni.

¹⁴Tawng khat chhawrin tawng hniha sâng lung rem chhoh tûr a ni a, heta ṭang hian tawng khat chhawra tawng li-a sâng lung rem chhoh leh tûr a ni a.

¹⁵Tawng khat chhawr lehin tap chu tawng li-a sâng rem chhoh leh tûr a ni; tap chu kil li neia rem tûr a ni, kil tinah ki, tawng khata sâng dah tûr a ni.

¹⁶Tap chu kil li nei tawng sâwm leh pahnih bial tûr a ni.

¹⁷A chhawr hnuai chu kil li nei, tawng sawm leh pali bial a ni ang a, a tlângah khuaptu, khâp khat a awm chhuak tûr a ni; tapa lâwn chhohna tûr khawchhak lamah kailâwn a awm tûr a ni.

¹⁸Heti hian min hrilh a: “Mihring fapa, Lalpa PATHIAN-in heti hian a ti: Maichâm in siam hunah heti hian in tuih tûr a ni: Hâlral thilhlan in hlân ang a, thisen chu maichâmah in theh tûr a ni.

¹⁹Puithiam, Levia chi, Zadoka thlahte chauh ka hmaah an lo kal thei ang,” Lalpa PATHIAN thuchhuak chuan a ti. “Sual thawi nâna hlan tûr bâwngtuai pe ang che.

²⁰A thisen chu maichâm tap kil ki pali-ah chuan i tât ang a; a chhawr hual kil tinah leh a tlâng khuaptuah i tât bawk tûr a ni.

²¹Sual thawina tûr bâwngchal i la bawk ang a, pâwnah, Tempul tuala hmun ruatah chuan hâl tûr a ni.

²²Ni hnih ni chuan sual thawina, kêlpa, hmêlhem lo i hlân tûr a ni. A ni lehah chuan kêlpa, hmêlhem lo i la ang a, sual thawi nân i hlân tûr a ni. Bâwng thisena i tih ang bawk khân kêl thisen chuan maichâm chu i tithianghlim tûr a ni.

²³“Chutia maichâm i then zawh chuan bâwngtuai leh ranrual zînga berâmpa i hlân tûr a ni.

²⁴LALPA hmaah chûng chu i rawn la ang a, puithiamte chuan chi an al ang a, LALPA tân an hâl ral ang.

²⁵Ni sarih chhûng chu ni tin sual thawi nân kêl in hlân ang a, bâwngtuai leh ran rual zînga berâm hmêlhem lo in hlân bawk tûr a ni.

²⁶Maichâm tuih nân chutiangin ni sarih tih tûr a ni a, chumi zawhah sil fai tûr a ni a; tichuan, maichâm chu a thiang tawh ang.

²⁷Chûng hnuah chuan, a ni riat ni aṭangin, puithiamte chuan hâlral leh remna thilhlan te maichâmah chuan an hlân ṭhîn tawh ang; tichuan, kei ka lo lâwm ang,” Lalpa PATHIAN thuchhuak chuan a ti.