Read Mizo Lushai Ezekiela 45 Bible Online

Ezekiela 45 - Mizo Lushai bible

Ezekiela 45

¹Ro atân ram in sem dâwnin LALPA tân Hmun Thianghlim tûr, tawng sînghnih leh sângnga a sei, tawng sînghniha zau ram in serh hrang tûr a ni, chu ram chu ram serh a ni ang.

²He ram chhûngah hian hmun serh bîk, kil li nei, tawng zanga bial zuah tûr a ni.

³Hmun serh pum pui aṭang hian tawng sînghnih leh sângngaa sei, a vâng lam tawng sîngkhat teh chhuak ula, chu chu hmun thianghlim bîk, serh hran tûr chu a ni.

⁴Hmun thianghlim bîk a ni a, Hmun Thianghlima LALPA rawngbâwltu puithiamte tân a ni, an insakna tûr leh biakbûk sakna tûr a ni.

⁵A la bâng, ram tawng sînghnih leh sângngaa sei, tawng sîngkhata zau chu Tempula thawktu Levia chite tân a ni, an nei ang a, hemi chhûngah hian khua an nei ang.

⁶Hmun serh bulah chuan khawpui tûr ram, tawng sînghnih leh sângngaa sei, a zau lam tawng sângngaa zau teh chhuak ula, chu chu Israel mi zawng zawng tân a ni ang.

⁷Lal tân pawh ram zuah tûr a ni. Hmun Thianghlim aṭangin khaw thlang lamah tuifinriat thleng a ni ang a, khawchhak lamah ram ripui thleng a ni ang a, Israel hnam pakhat tâna ram zuah tiat a ni tûr a ni.

⁸Israel ramah lal chanvo tûr chu he ram hi a ni ang, mi dang a nêk tûr a ni lo, hemi bâk hi chu Israel miten an nei tûr a ni.

⁹Lalpa PATHIAN chuan heti hian a ti: “Israel hotute u, pâwngnêkna leh innêkchêpna hi bân ngang tawh teh u, dik takin rorêl ula, thil dik ti rawh u, ka mite hi an ram ata nêk chhuak tawh lul suh u,” Lalpa PATHIAN thuchhuak chuan a ti.

¹⁰“In thil tehna chu a dik tûr a ni. Efa dik leh bath dik in hmang tûr a ni.

¹¹Efa leh bath hi a intluk chiah tûr a ni, a lêt sâwm chu Homer khat a ni ang, Homer hi tehna chhûtna ber tûr a ni ang a.

¹²In bûklung pawh hetiang tûr hi a ni: Gera sawmhnih chu sekel a ni ang a, sekel sawmruk chu mina khat a ni ang.

¹³In thil hlan dân pawh hetiang tûr hi a ni: Huit chu in thar zât phur sawmruka phur khat, barli pawh phur sawmruka phur khat, hriak chu ṭin zaa ṭin khat in hlân tûr a ni.

¹⁴In hriak tehna tûr chu bath a ni a, bath sâwm chu Kor khat a ni ang. Kor leh Homer hi a intiat a ni.

¹⁵Israel rama berâm vulh zahnih zêlah berâm pakhat hlan bawk tûr a ni. Buh te, hâl ral tûr te, remna thilhlan te in hlân tûr a ni; tichuan, in sualte ngaihdam a ni ang,” Lalpa PATHIAN thuchhuak chuan a ti.

¹⁶Ram chhûnga mi zawng zawngin Israel rama rorêltu hnênah hêng thil hi an rawn pe tûr a ni.

¹⁷“Thla thar kûtah te, sabat ni-ah te leh kût dangah te rorêltu chuan Israel hnam pum aiawhin hâlrala hman tûr ran te, buh hlan tûr te, uain hlan tûr te a tum ang. Israel mipui sual thawi nân, sual thawina te, buh hlan te, hâlral tûr te, inremna inthawinate a hlân tûr a ni.”

¹⁸Lalpa PATHIAN chuan heti hian a ti: “Thla thar ni hmasa berah berâmpa hmêlhem lo talhin Tempul in thian tûr a ni.

¹⁹Puithiamin he sual thawina thisen hi a la ang a, Tempul kawngka biangah te, maichâm tap hnuai kil li-ah te, chuanchung veranda kawngka biangah te a tât tûr a ni.

²⁰Thla thar ni sarih niin thil sual tih palh leh hriat loh vânga thil sual tih palh tân chutiang bawkin in ti leh tûr a ni; chutiang chuan Tempul chu in tithianghlim tûr a ni.

²¹Thla thar ni sâwm leh pali ni chuan kalhlên kût in hmang ṭan tûr a ni, ni sarih chhûng chhang dawidim telh loh in ei tûr a ni.

²²Kût ṭan tirh niin lal chuan ama sual leh mipui sual thawi nân bâwngla a hlân tûr a ni.

²³Ni sarih chhûng chu ni tin bâwngpa pasarih leh berâmchal pasarih, hmêlhem lo LALPA hnênah hâl ral atân a hlân tûr a ni a, kêlpa pakhat pawh ni tin sual thawi nân a hlân tûr a ni.

²⁴Bâwngpa pakhat leh berâm pakhat rual chuan chhangphut efa khat ve ve zêl hlan tel tûr a ni; chhangphut efa khatah hriak hin khat a tel zêl bawk tûr a ni.

²⁵“Thla sarihna, ni sâwm leh pali ni kûtah pawh ni sarih chhûng chutiang bawk chuan a ti tûr a ni; sual thawina te, hâlral thilhlan te, chhangphut te a hlân tûr a ni.