Read Mizo Lushai Ezekiela 46 Bible Online

Ezekiela 46 - Mizo Lushai bible

Ezekiela 46

¹Lalpa PATHIAN chuan heti hian a ti: “Hna thawh hun ni ruk chhûng chu khawchhak lam aṭanga chuanchunga luhna chu khâr tûr a ni; a ni sarih ni, sabat ni leh thla thar ni hmasa berah chuan hawn tûr a ni.

²Chuanchunga luh tlangnaah lal chu a lût ang a, veranda ban bulah a ding tûr a ni. Hâlral thilhlan leh remna thilhlan a rawn ken chu puithiamhovin an buatsaihsak ang a, veranda aṭang chuan Pathian chibai a bûk tûr a ni; tin, a hawn hnuah pawh tlai thlengin khâr tûr a ni lo.

³Ram mipuite pawh sabat leh thla thar ni chuan veranda bulah LALPA hmaah an kûn tûr a ni.

⁴Sabat nia lalin hâlral thilhlan a rawn lâk chu berâmno hmêlhem lo paruk leh berâmchal hmêlhem lo pakhat a ni ang.

⁵Berâmchal hlan rualin chhangphut efa khat a hlân tel tûr a ni, berâmno hlan rual erawh chuan a phal zât zât chhangphut a hlân tûr a ni; chhangphut efa khatah hriak hin khat a telh zêl tûr a ni.

⁶Thla thar ni erawh chuan bâwngtuai pakhat hmêlhem lo, berâm paruk leh berâmchal pakhat, hmêlhem lo hlîr a hlân tûr a ni.

⁷Bâwngtuai hlan rual chuan chhangphut efa khat, berâmchal hlan rualin chhangphut efa khat, berâmno hlan rualin chhangphut a neih theih zât zât a hlân ang a, chhangphut efa khat zêlah hriak hin khat a telh tûr a ni.

⁸Veranda-a lal a kal chu a lo kalna vêkah a kîr leh tûr a ni.

⁹“Rama mipuiten, hun ruatah, LALPA hmaa an lo kalin hmâr lam aṭanga luhnaa lo lût chu chhim lamah an chhuak ang a, chhim lam luhnaa lo lût chu hmâr lamah an chhuak tûr a ni, an luhnaah an chhuak leh tûr a ni lo, an kal ngîl mai tûr a ni.

¹⁰Lal erawh chu mipui rualin a lo lût ve ang a, a lo luhnaah a kîr leh tûr a ni.

¹¹Kût ni leh puipun hunahte chuan bâwngtuai hlan rualin chhangphut efa khat, berâmchal hlan rualin chhangphut efa khat, berâmno hlan rualin chhangphut an duh zât zât, chhangphut efa khatah hriak hin khat zêl nên an rawn hlân tûr a ni.

¹²Lalin mahni duh thu-a hâlral thilhlan emaw, remna thilhlan emaw LALPA hnêna a hlan duh chuan khawchhak lam aṭanga luhna chu an hawng ang a, sabat nia tih angin hâlral leh remna thilhlan chu an hlansak ang a; tin, a chhuak ang a, a chhuah hnuah kawng chu an khâr leh tûr a ni.

¹³“Zîngah, tûk tin, berâmno hmêlhem lo, kum khat tling, LALPA hnêna hâl ral atân hlan ziah tûr a ni.

¹⁴Chhangphut efa hmun ruka ṭhena hmun khat leh a hmehna tûr hriak hin hmun thuma ṭhena hmun khat tûk tin hlan tel zêl bawk tûr a ni, thupêk angin hei hi tih reng tûr a ni.

¹⁵Berâmno te, chhangphut te leh hriak te hi tûk tin hâl ral atân hlan kumkhua tûr a ni.”

¹⁶Lalpa PATHIAN chuan heti hian a ti: “Lalin ama ram ro aṭangin a fapa hnênah ram a pêk chuan a fa ta chu a ni ang a, a rochan a ni ang.

¹⁷A ṭhuihruai zînga mi pakhat hnênah a ram ro aṭangin ram a pêk chuan pêk kîr kumah lal ta a ni leh ang, lal leh a fate chauhvin an nei kumkhua thei ang.

¹⁸Lal hian mipui ram ro a lâksak tûr a ni lo, an ram ro aṭangin a hnawt chhuak tûr a ni hek lo. A fate hnêna ram a pêk pawhin ama ram ro aṭangin a pe tûr a ni; tichuan, ka mite hi an ram ro ata an darh tûr a ni lo.”

¹⁹Chhim lam aṭanga luhna bula puithiamho awmna pindan thianghlim, hmâr lam hawiah chuan min hruai leh a; chumi bul, khawthlang lama hmun awm chu min entîr a.

²⁰He hmun hi puithiamhoten sual thawina leh thiam loh thawina sa thianghlim an chhumna tûr hmun a ni; chhangphut hlante pawh hetah hian an kang tûr a ni. Thil thianghlim rêng rêng chuanhnuai zâwla lâk chhuk tûr a ni lo, mipui a tipawi hlauh dah ang e.

²¹Chuanhnuai tualzâwlah min hruai kual a, kil tinah tual hung a awm zêl a.

²²Tawng sawmli-a sei, tawng sawmthuma zau, kil tinah chuan hung a awm ṭheuh va,

²³hungna bang bulah chuan lung an rem chhuak bawk a, thuk atâna rem a ni.

²⁴“Tempul enkawltuten hei hi mipui inthawina sa an chhumsakna tûr hmun a ni,” a ti a.