Read Mizo Lushai Ezekiela 47 Bible Online

Ezekiela 47 - Mizo Lushai bible

Ezekiela 47

¹Tempul luhnaah min hruai kîr a; ngai teh, a pindan hmasa hnuai aṭang chuan, Tempul hawi zâwng, khawchhak hawi zâwngin tui a lo luang chhuak a. Tui chu Tempul luhna hnuaiah a luang zêl a; chhim lam, maichâm awmna ding lamah a luang zêl a.

²Hmâr lam aṭanga luhnaah mi hruai chhuak a, khawchhak lam aṭanga luhna bulah mi hruai zêl a; ding lam kovah chuan tui chu a lo far a.

³Khawchhak hawiin mi chu a kal a, a hrui ken chuan a han teh a. Tawng sâng a tlin chuan tui chu min daitîr a, kerêk thleng a ni.

⁴Tawng sâng a han teh leh a, mi daitîr a, khûp thleng a ni; tawng sâng a han teh leh a, kâwng thlengin mi daikaitîr a.

⁵Tawng sâng a han teh leh chuan lui lian tak, dai kai rual loh, hleuh kai ngai a lo ni ta a.

⁶Chu mi chuan, “Mihring fapa, hei hi i hmu em?” a ti a. Tichuan, min hruai a, lui kamah chuan min kîrtîr ta a.

⁷Vaukama ka chhuah chuan vaukam tawnah thing a lo awm khup mai a, ka hnênah, “He lui hi khawchhak lamah a luang a, Jordan phaiah a luang thla a, Tuipui Thi a zu fin a ni.

⁸Tuipui Thia a luan luh chuan a tui al chu a titui ta a.

⁹He lui hi a luanna a piangah rannung chi tinrêng a pung ang a, sangha te a tam êm êm ang. Tuipui Thi tui chu a tithianghlim ang a, thil nung tinrêng an pung ang.

¹⁰Engedi tui hmun aṭanga Eneglaim tui hmun thlengin tuipui kamah chuan sangha mantute an awm ang a, an lênte an pho vang. Mediteranean tuipuia sangha chi hrang anga tam sangha a awm ang.

¹¹Vaukam chirhdûp hmunte leh dîlte erawh chu chia ten atân a la al tho vang.

¹²Lui kam tawna thing chi tinrêng chu ei atân a rah ṭhiah ṭhuah ang a, a hnahte chu a vuai ngai lo vang. Thla tin an rah ang a. Tempul aṭanga tui lo chhuak chuan a châwm a, a rahte chu ei atân a ni ang a, a hnahte pawh damna a ni ang.

¹³Lalpa PATHIAN chuan heti hian a ti: “Israel hnam sâwm leh pahnihte ram insem dân chu hetiang hi a ni ang: Josefa thlahte chuan chan hnih an chang ang.

¹⁴In pate hnênah bân phar meuhvin he ram hi in ram rovah pêk ka tiam a, in ro atân insem rawh u le.

¹⁵“Hmâr lam ramripui chu Mediteranean Tuipui aṭanga khawchhak lamah Hethlon khaw panin Zedad khaw thlengin a kal ang a,

¹⁶Hamat leh Berotha-ah a kal zêl ang a, Hamat khân leh Damaska inrina Sibraim kal tlangin Hauran ramria Hazer-hatikon thlengin a kal ang a.

¹⁷Tichuan, hmâr lam ramri chu Mediteranean Tuipui aṭangin Hazar-enon thlengin a kal a ni; a hmâr lamah Damaska leh Hamat ram a awm a, hei hi hmâr lam ramripui chu a ni.

¹⁸Khawchhak lam ramri chu Damaska leh Hauran inrina aṭanga chhim lam panin a kal a, Jordan lui a zui a. Khawthlang lam chu Israel ram a ni a, khawchhak lam chu Gilead ram a ni; ri chu Tuipui Thiah Tamar thlengin a kal a.

¹⁹Chhim lam ramri chu Tamar aṭangin chhimthlang hawiin a kal a, Kades tui hmun thlengin. Chuta ṭangin hmârthlang lamah Aigupta ramri zuiin Mediteranean a thleng a.

²⁰Khawthlang lam ri chu Mediteranean Tuipui a ni a, hmâr lamah Hamat khua a thleng a.

²¹“He ram hi a chi chiin insem rawh u.

²²Ṭhum in vâwr ang a, in chan chu kumkhua a in ram tûr a ni. In zînga saphun awm, he rama fa neite pawhin in insem hunah chan an nei ve tûr a ni, mi dang ang bawkin ṭhum vâwrnaah pawh an pawt thei ang.

²³Chutiang saphun awm vete chuan an awmna hnam ram chan an insem hunah an zîngah an tel ve ang,” Lalpa PATHIAN thuchhuak chuan a ti.