Read Mizo Lushai Ezekiela 48 Bible Online

Ezekiela 48 - Mizo Lushai bible

Ezekiela 48

¹Hmâr lam ramri chu khawthlang Mediteranean Tuipui aṭangin khawchhak lamah Hethlon khaw panin Hamat khuaah a kal a, Enon khua a thleng a, Damaska leh Hamat inrina thlengin a kal a, hmâr lam ramripui aṭang hian a indawtin khawthlang lamah Tuipui aṭanga khawchhak ramripui thlengin an insem tûr a ni.

²A hmâr berah Dan a awm ang a, Aser-in a dawt ang a,

³Nafthali-in a dawt leh ang a.

⁴Chutah Manase-in a dawt leh ang a,

⁵Efraim-in a dawt leh ang.

⁶Reuben-in a dawt leh ang a,

⁷Juda a hnuhnûng ber ang.

⁸Juda dep chhim lamah, mi dang chan zât, ram serh, Tuipui aṭangin khawchhak ramripui thlengin, a zau lam tawng sînghnih leh sângnga zuah tûr a ni, hemi chhûngah hian Tempul a awm ang.

⁹Hemi chhûngah hian LALPA tân bîk, ram tawng sînghnih leh sangngaa sei, tawng sînghniha zau in zuah tûr a ni. Hemi chhûngah hian Tempul a awm tûr a ni.

¹⁰Puithiamhovin he hmun serh aṭang hian khawchhak lam aṭanga khawthlang lamah tawng sînghnih leh sângngaa sei, chhim lam leh hmâr zâwnga tawng sîngkhata zau an chang ang. Hemi chhûngah hian Tempul a awm tûr a ni.

¹¹He hmun thianghlim hi Zadoka thlahte awmna tûr a ni. Levia thlah dangte chuan Israel-te an sual bo lai khân an zui ve a, anni erawh hi chuan an zui ve lo va ni.

¹²Levia thlahte awmna depah, hmun thianghlim berah an awm tûr a ni.

¹³Puithiamho ram chhim lamah Levia thlahte pawhin ram bîk an nei tûr a ni, a dung tawng sînghnih leh sângnga, a vâng tawng sîngkhat.

¹⁴Hêng ram hi an hralh thei lo vang, ram dang nên an thleng thei lo vang a, mi dang an pe thei hek lo vang, LALPA tâna serh hran a ni si a.

¹⁵He hmun bîk chhûnga ram la âwl, tawng sînghnih leh sângnga a sei, a zau lam tawng sângnga hi erawh chu serh hran a ni ve lo, a duh duh awmna tûr a ni, ram an nei ang a, an chhawm thei bawk ang.

¹⁶A laiah khawpui a awm ang a, kulh kil li nei a ni ang a, tawng sângli leh zanga a ni ang.

¹⁷Khawpui hual chhuak hian ram ruak, tawng zahnih leh sawmngaa zau zuah tûr a ni.

¹⁸Khawpui ram zuah hnua ram la chuang, khawchhak zâwnga tawng sîngkhat, khawthlang zâwnga tawng sîngkhat hi khawpui chhûnga awmten huanah an nei thei ang.

¹⁹Tu hnam pawh, khawpui chhûnga awm tawh phawt chuan huan hi an nei thei ang.

²⁰Ram lai taka hmun zuah bîk chu kil li bial, tawng sînghnih leh sângnga a ni ang, hemi huam chhûngah hian khawpui chu a awm a ni.

²¹Tempul awmna te, puithiam awmna te, Levia chite awmna te leh khawpui awmna khawchhak leh khawthlanga ram la awm chu lal ta tûr a ni.

²²Khawthlang lamah Tuipui, khawchhak lamah khawchhak ramripui thlengin a ta a ni a, hmâr lamah Judai ram a ri a, chhim lamah Benjamin ramri a thleng a ni.

²³He ram ruat bîk chhim lam hi, Tuipui aṭanga khawchhak ramri thlengin hnam la awmten indawtin an insem ang.

²⁴Ben jamin hnamin hmun serh chhim lam an chang ang a.

²⁵Chumi chhim chu Simeon thlahten an chang ang a,

²⁶Isakar-in a dawt ang a,

²⁷Zebulun-in a dawt leh ang a, chhim berah Gad-ho an awm ang.

²⁸Gada thlahte chan chhim lam ri hi ram pum chhim lam ripui a ni nghâl a, Tamar aṭanga chhimthlang hawiin Kades tui hmun thlengin a kal a, chuta ṭangin hmârthlang zâwngin Aigupta ramri a zui zêl a, Mediteranean Tuipui a thleng a ni.

²⁹Israel hnam zînga an ram ro tûr sem dân tûr chu khitiang khi a ni, Lalpa PATHIAN thuchhuak chuan a ti.

³⁰Jerusalem khuaah luhna kawngka sâwm leh pahnih a awm, khawpui hi kil li nei a ni a, kil khat chu tawng sângli leh zanga zêl a ni. Israel thlahte hnam hming chawiin kawngka hming an phuah a. Hmâr lama kawngka pathum chu Reuben, Juda, Levi an vuah a, khawchhak lama mi chu Josefa, Benjamin, Dan; chhim lama mi chu Simon, Isakar, Zebulun an vuah a, khawthlang lama mi chu Gad Aser, Naftali an vuah.

³⁵Kulh bang pum pui sei lam chu tawng sîngkhat leh sângriat a ni. Tûn aṭang chuan he khawpui hmingah, ‘LALPA awmna’ tih a ni tawh ang.