Read Mizo Lushai Ezekiela 5 Bible Online

Ezekiela 5 - Mizo Lushai bible

Ezekiela 5

¹“Mihring fapa, lumêt mi bakmeh chem anga hriam khandaih la la, i lu leh i khabehmul ziat kâwng rawh. I ziah thlâk chu bûknaa bûkin sem rual rawh.

²Jerusalem khua i hual hun chhûng a ral hun chuan hmun thuma ṭhena hmun khat chu khuaah chuan meiah rawh ang che; hmun thuma ṭhena hmun khat chu khaw pâwnah khandaihin sât sawm la, thli len darhtîr la, keiin khandaihin ka ûmzui ang.

³A dang chu i puan hmâwrah fûn la,

⁴a ṭhen chu la la, meiah vawm lût ang che; a kâng ang a, chuta ṭang chuan Israel hnam pum puiah mei a chhuak ang,” a ti a.

⁵Lalpa PATHIAN chuan heti hian a ti: “Aw nang, Jerusalem, khawvêla hmun laili takah ka dah che a, i vêlah hnam dangte chu ka awmtîr a.

⁶Ka thuruat i helsan a, ka Dânte i hnâwl a, i vêla hnam dang awmte aia nasa zâwkin ka thuruatte leh ka Dânte chu thil sual i tihsan a.”

⁷Chuvângin, Lalpa PATHIAN chuan “Ka Dânte zâwm duh lovin i vêla hnam dang awmte aia nasa zâwkin thil sual i ti a; ka thununnate zâwm lovin i vêla awm hnam dangte dân i la zâwk a.”

⁸Chuvângin, Lalpa PATHIAN chuan heti hian a ti: “Ngai teh, kei ngei pawh hian ka do dâwn che a ni. Hnam dangte hmuhah ka hrem ngei dâwn che a ni.

⁹I thil tih tenawm tak takte avângin ka la tih ngai loh, tih leh pawh ka tum ngai loh i chungah ka ti dâwn.

¹⁰In zînga pate chuan an fate sa an ei ang a, fate chuan an pate sa an ei bawk ang. Ka hrem dâwn che u a ni, a thi bâng pawh thli ka len darhtîr ang che u.

¹¹Mi nunga ka nih hi,” Lalpa PATHIAN thuchhuak chuan a ti. “In thil tih tenawm, ngeiawm tak tak avângin ka hmun thianghlim in tibawrhbâng a, kei ngei hian ka suat dâwn che u a ni; ka khawngaih lo vang che u a, ka dîm hek lo vang che u.

¹²In zînga mi, hmun thuma ṭhena hmun khat chuan hripui leh ṭâm in thihpui ang a, hmun thuma ṭhena hmun khat daipâwnah khandaiha sah hlum in ni ang. Hmun thuma ṭhena hmun khat chu thli ka len darhtîr ang che u a, khandaihin ka ûmzui ang.

¹³Chutiang chuan ka thinur ka hrithla ang a, a dai tawh ang. Chumi hnu chuan Lalpa PATHIAN-in ka ṭhahnemngaihna avângin chûng chu ka tih a ni tih in hria ang.

¹⁴“In vêla awmte leh veivâkte hmuhsit leh mak tihah ka siam bawk ang che u.

¹⁵Thinur leh thinrim takin, lungawi lo zetin in chunga ro ka rêl zawh hnu chuan; mi hmuhsit, nuihzatbûr, mak tihah leh enthlâk in la ni ang; Kei LALPA hian ka sawi tawh hi.

¹⁶In chhiat nân ṭâmpui mitthi ka tithleng ang a, in chaw hmuhna hnâr ka chhu chat ang a, rilṭâmin in thi ang.

¹⁷Ṭâm bâkah ram sakawlhte ka rawn tîr ang a, an seh ang che u a, lusûn in awm thliah thluah ang. Hripui leh thisen chhuahna, khandaih nên ka lêntîr bawk ang, in thi pheng phung ang: Kei LALPA hian ka sawi hi.”