Read Mizo Lushai Ezekiela 6 Bible Online

Ezekiela 6 - Mizo Lushai bible

Ezekiela 6

¹ LALPA thu chu ka hnênah a lo thleng a:

²“Mihring fapa, Israel rama tlângte chu thlîr la, an chungthu sawi rawh.

³‘Israel rama tlângte u, Lalpa PATHIAN thu hi ngaithla teh u: Tlâng te, mual te, ruam te leh luikawr te chungchâng thu-ah Lalpa PATHIAN chuan heti hian a sawi e: Ngai teh u, keimah ngei hian in chungah khandaih ka rawn lek dâwn; in hmunsângte chu ka tichhe vek ang a,

⁴in maichâmte ka tichim ang a, in milim dinte chu a keh sawm ang; in zînga thite ruang chu in milem hmaah ka vawm khâwm ang.

⁵Israel-ho fanaute ruang chu an biak milem bulah ka dah khâwm ang a, anmahni ruhte pawh an maichâm bulah ka theh darh ang.

⁶In chênna khua apiang chu ka tichim ang a, in hmunsângte chu a ṭhing reng ang; in maichâmte pawh a chim ang a, a ram dêr ang; in milemte chu a kehsawm zo vang a, in milim dinte chu ka chêk chhia ang a, in thiltihte chu nuai bo vek a ni ang.

⁷In zîngah mitthi ruang a let pheng phung ang a, a la damte chuan LALPA ka nih an hria ang.

⁸‘Ṭhenkhat chuan thih an pumpelh ang a, hnam dang zîngah, ram tinah ka tidarh ang.

⁹In zînga chutianga thih pumpelhte chu salah an man ang a, ram tinah an hruai darh ang. Hnam dang zînga an darh hnu chuan min hre chhuak ang a, uirea min hawisana, thil sual an tih pawi ka tih ṭhinzia te an hre chhuak ang a, milem lam an hawia, thil tenawm tak tak an lo tih ṭhin avâng chuan an inten ang.

¹⁰Kei hi LALPA chu ka lo ni ngei tih an hria ang a, ‘hêng thil hi ka ti ang’ ka tih kha ka ti mai mai lo tih pawh an hria ang,’ ” a ti a.

¹¹Lalpa PATHIAN chuan heti hian a ti bawk: “I kutphah chûm la, i ke per rawh, Israel-ten thil sual tenawm an ti ṭhîn hi a va pawi êm! khandaiha sah hlum an ni ang a, hripui leh ṭâm tuarin an thi ang.

¹²Ram hla taka awmte chu hripuiin an thi ang a, hnaivaia awmte chu khandaihin thah an ni ang. Heta la awm chhun, hual chhûnga awmte hi, rilṭâmin an thi ang, chutiang chuan ka thinur ka hrithla dâwn a ni.

¹³Milem hnêna rimtui an hâl ṭhinna, an hmunsângah te, tlâng chhîpah te, thingbuk hnuaiah te, sasaw buk hlimah te, an maichâm milem bulah te mitthi ruang a awm pheng phung hunah LALPA chu ka ni tih an hria ang.

¹⁴An chungah kut ka lek ang a, an chênna hmun tin mai chu Diblah thlalêr aia ram ro leh chhiaah ka siam ang a; tichuan; LALPA chu ka ni tih an hria ang,” a ti a.