Read Mizo Lushai Ezekiela 7 Bible Online

Ezekiela 7 - Mizo Lushai bible

Ezekiela 7

¹ LALPA thu chu ka hnênah a lo thleng leh a. Lalpa PATHIAN chuan Israel ram chungchâng thu a sawi a:

²“Nang, Mihring fapa, hun tâwp a lo thleng dâwn, ram chu a pumin a chhe vek ang.

³Tâwpna chuan a rawn nang ta che, ka thinur i chungah ka leihbua ang a, i thiltih ang zêlin i chungah ro ka rêl dâwn; thil tenawm tak tâk i tih avângin ka hrem dâwn a che.

⁴Ka khawngaih lo vang chia, ka dim hek lo vang che. I tih ṭhin ang khân i chungah ka ti ang a, thil tenawm i tihte avângin ka hrem ang che; tichuan, LALPA chu ka ni tih i hria ang,” a ti a.

⁵Lalpa PATHIAN chuan heti hian a ti: “Chhiatna hlîr, chhiatna hlîr a lo thleng dâwn.

⁶Hun tâwp, tâwpna ngei chu a lo hnai e, a lo kal a, a lo hnaih tâk saw.

⁷Ram luahtute u, in chungah zângkhua a bungbu dâwn, tlânga hlim taka in zai ṭhîn ang kha ni lovin in râlkhêl dâwn a ni.

⁸Ka thinurna chu in chungah ka sah dâwn a, ka thinrimna chu in tuar ang. In thil tih ang zêlin in chungah ro ka rêl ang a, in thil tenawm tih chu in chungah ka thungrûl ang.

⁹Ka khawngaih lo vang che u a, ka dim hek lo vang che u. In thil tih ang zêlin ka hrem ang che u a, thil tenawm in tihte chu in chungah ka thungrûl ang; tichuan, LALPA chuan ka hrem che u a ni tih in hria ang.

¹⁰“Ngai teh, ni chu a lo thleng e, a lo thleng e, a lo inher chhuak ta, tuarna a punlun a, pawisak nei lo pawh an pung.

¹¹Inpâwngnêkna chuan thil ṭha lo a tipung a, an neih eng mah bâng awm lo lêkin, an sum leh pai te, an thawhrim rah te, an nawmsakna te a ral vek ang.

¹²A hun chu a lo thleng ta, thinurna chu mi tin chungah a tla dâwn si a.

¹³Sumdâwngtu chu a hlâwkna hmu hmanin a dam lo vang; he inlârna thu hian tu mah a hmaih lo vang, a kîr hek lo vang; an sual avângin tu mah dam khawchhuak an awm lo vang.

¹⁴Tawtawrâwt an rawn hâm a, an inpeih ta vek a; mahse, lo do tûra thawk chhuak tûr tu mah an awm loh avangin an zaa chungah ka thinurna a tla ta a ni.

¹⁵Pâwnah khandaihin a lo châng a, kulh chhûngah ṭâm leh hripui a lêng a, lova awm chu khandaihin an sât hlum ang. Khawpui chhûnga awmte chu hripui leh ṭâmin an thi ang.

¹⁶Chûng pumpelh hrâmte chu tlângah, chul ram ṭhuro angin an rûm an rûm ang a, an sualna avângin an rûm chuah chuah ang.

¹⁷An bân tha a ṭhum vek ang a, an khûpte a zâwi vek ang.

¹⁸Saiip puan an veng ang a, hlauhnain an thâuvah a man ang; an zak êm êm ang a, an samte a tla kawlh vek ang.

¹⁹An tangkate chu khawlaiah an paih ang a, an rangkachakte pawh thil bawlhhlawh ang a ni ang. LALPA thinurna ni an chunga a lo thlen chuan an tangka leh rangkachak chuan a chhan thei lo vang a, anmahni titlutu a nih avângin ei tûr lei nân pawh an hmang thei lo vang.

²⁰An incheina mawi tak tak, an chhuan êm êm te chu an milem tenawm leh ngeiawm tak tak thuam nân an hmang a; chuvângin a ni thil bawlhhlawha ka chantîr tâk ni.

²¹Hnam dang ka mantîr ang a, khawvêla mi sualte tân râllâk sumah ka pe ang a, an tibawrhbâng ang.

²²Ka hawisan ang a, ka hmun thianghlim chu ka tibawrhbâng ang. Rûkru an lût ang a, an suam ang.

²³“Khaidiat buatsaih rawh u. Ram pumah thisen an chhuah a, khaw chhûngah pawh tharum an thawh e.

²⁴Chuvângin, hnam azawnga hnam râwng ber ka rawn hruai ang a, in inte chu an rawn neihsak ang che u a, mi chapote chu ka titlâwm ang; in Hmun Thianghlimte chu an rawn tibawrhbâng ang.

²⁵Thil râpthlâk lo thleng lakah chuan himna an zawng ang a, an hmu lo vang.

²⁶Chhiatna tâwp ka thlen ang a, thu hlauhawm tinrêng ka tithang bawk ang; zâwlnei hnênah thil awmzia an zâwt ang a, puithiamte chuan zirtîr tûr an hre lo vang a, upate pawhin thurâwn tûr an nei lo vang.

²⁷Lal chu a lungngai ang a, miliante chu an hrilhhai ang a, ram chhûng mite chu an chau vek ang. An thiltih ang zêlin ka thungrûl ang a, an phû tâwk ang zêlin ka hrem ang; tichuan, LALPA chu ka ni tih an hria ang,” a ti a.