Read Mizo Lushai Ezekiela 8 Bible Online

Ezekiela 8 - Mizo Lushai bible

Ezekiela 8

¹Saltân kum ruk kum, thla rukna, tahrik ni nga ni chuan ka in chhûngah ka ṭhu a, Juda upaho ka hmaah an ṭhu a; tah chuan Lalpa PATHIAN kut chu ka chungah a fu a.

²Ka han en chuan mi, mei ang hi ka hmu a, a kâwng hnuai lam chu mei anga êng a ni a, a kâwng chung lam chu dâr tle anga tle a ni.

³Kut ni awm tak hian ka chhîpsamah mi rawn ṭhâm a, lei leh vân inkârah Thlarau chuan min chawi chho va. Pathian inlârnaah chuan Jerusalem-ah min hruai a, tualzâwl chhûng zâwk hmâr lam kawngkhârah chuan min dah a; tah chuan Pathian tithinurtu milem chu a awm a.

⁴Israel-te Pathian ropuina, lui phaizâwla ka hmuh ang kha, a lo awm a.

⁵Ka hnênah chuan, “Mihring fapa, hmâr lam saw en teh,” mi ti a. Hmâr lam chu ka han en a, maichâm awmna hmâr lam kawngkhâr bulah chuan Pathian tithinurtu milem chu ka hmu a.

⁶Ka hnênah chuan, “Mihring fapa, an thil tih hi i hmu maw? Israel chhûngten thil tenawm pui pui heta an tih hi i hmu em? Ka Tempul aṭangin mi dah pâwn tial tial a ni. Hei aia tenawm zâwk hi i hmu zêl ang,” a ti a.

⁷Hmun chhûng zâwk luhna kawngka bulah chuan min hruai a, bang pawp ka hmu a.

⁸Ka hnênah chuan, “Mihring fapa, bang pawp hi tizau rawh,” mi ti a. Ka han tihzau chuan kawngkhâr hi a lo awm a.

⁹Ka hnênah, “Lût la, heta thil sual tenawm an tih hi va en rawh,” min ti a.

¹⁰Tichuan, ka va lût a, thil tenawm pui pui, rûl lem te, ran lem te, Israel-te biak milem tinrêng, bangah chuan a lo chuang buai mai a.

¹¹Safana fapa, Jazania hovin Israel upa rual sawmsarih an lo awm a, rimtui hâlna an keng ṭheuh va, an thil hâl khu chu a lo khat mup a.

¹²“Mihring fapa, Israel chhûngkaw upaten a rûka thil an tih hi i hmu em? Mahni pual ṭheuh milem an biak hi. ‘LALPA chuan mi hmu hlei nem, LALPA chuan ram hi a chhuahsan tawh alâwm,’ an ti,” tiin min hrilh a.

¹³A sawi zêl a, “Thil tenawm lehzual an tih i hmu zêl dâwn,” min ti a.

¹⁴Hmâr lama LALPA in kawngkaah chuan min hruai leh a, tah chuan nuho an lo ṭap a, pathiannu Tamuz an lo ṭah a.

¹⁵Ka hnênah chuan, “Mihring fapa, hei hi i hmu maw? Hei aia tenawm zâwk an tih i la hmu ang” a ti a.

¹⁶LALPA in hung chhûngnung zâwkah chuan mi hruai a, LALPA Tempul kawngka bul, hulhliap leh maichâm inkârah chuan mi sawmhnih leh panga dâwn lai hi an lo awm a. LALPA Tempul hnungchhawnin khawchhak lam an hawi a, khawchhak lama ni lo chhuak chu chibai lo zu bûk a!

¹⁷Ka hnênah chuan, “Mihring fapa, hei hi i hmu maw? Israel-te thiltih hi a tenau em ni? Ram chu pâwngnêknain an tikhat a, ka thin tiur zual tûrin hetah leh zêl hêng thil tenawmte hi an ti a ni. En teh, chhâwla an hnâr an huh vei saw!

¹⁸Chuvângin, kei pawh an chungah thinur takin ka ṭuan dâwn a ni, ka khawngaih lo vang a, ka dîm hek lo vang. Ring takin min au mah se ka hre duh bîk lo vang,” a ti a.