Read Mizo Lushai Daniela 10 Bible Online

Daniela 10 - Mizo Lushai bible

Daniela 10

¹Persia rama Kura lal a nih kum thumnaah chuan Daniela, Beltesazara an tih bawk hnênah thu a lo thleng a. Thu chu a rinawm a; mahse, hriat fuh har tak a ni; amaherawhchu, inlârnaah hrilh fiahsak a ni.

²Chutih lai chuan kei Daniela hi, lusûn angin chawlhkâr thum chhûng ka awm a.

³Chaw tuihnai leh sa pawh ka ei lo va, uain pawh ka in hek lo. Kâr thum chhûng chu sahriak pawh ka thih lo.

⁴Thla hmasa ber, ni sawmhnih leh pali ni chuan Tigris luipui kamah chuan ka ding a.

⁵Ka han dâk a, ka han en chuan puan zai sîna inthuam mi pakhat ka hmu a, Upaz rangkachaka siam kâwnghrên a hrêng a.

⁶A taksa chu berûl lung tle ang a ni a, a hmêl chu kâwlphe ang a ni. A mit chu meichher êng tak ang hi a ni, a bân te leh a ke te chu dâr nawh tlêt ang a ni, a aw chu mipui nasa tak thâwm ang a ni.

⁷Kei, Daniela, keimah chauh hian a ni, chu inlârna hmu chu; ka bula awmte chuan eng mah an hmu ve lo; mahse, an hlau êm êm a, an khûr zawih zawih a, an biru bo ta a.

⁸Keimah chauhvin ka awm ta a, inlârna ropui tak chu ka han hmuh chuan ka chau ta hnêp a, ka hmêlte pawh tu ma hriat theih loh khawpin a danglam ta a.

⁹A aw ka han hriat chuan eng mah hre lovin leiah ka tlu a, ka bawkkhup reng a.

¹⁰Kutin min rawn chelh a, bawkvâk tûr angin min dah a, ka la khûr zawih zawih zêl a.

¹¹Ka hnênah, “Daniel, Pathian mi ngainat i ni, ka thu hrilh che hi ngun takin ngaithla rawh; ding char la, i hnêna thu sawi tûra tirh ka nih hi,” a ti a. Mi biak hnu chuan ka ding thei ta a, ka la khûr ta fo va.

¹²Ka hnênah, “Daniel, hlau suh, thil hriatthiamna i neih theih nân inngaitlâwm taka i awm ṭan ni aṭang tawh khân i ṭawngṭaina chu Pathianin a ngaithla a. I ṭawngṭaina chhâng tûrin ka lo kal a ni.

¹³“Persia ram hotupa chuan ni sawmhnih leh pakhat chhûng chu min dodâl a; mahse, vântirhkoh hotu Mikaela chu mi pui tûrin a lo kal a, keimah chauhva Persia ram hotupa bei ka ni si a.

¹⁴Nakina i mite chunga thil lo thleng tûr ka rawn hrilh dâwn che a ni, i inlârna hmuh kha hun rei tak hnua thil lo awm tûr chauh a ni si a,” a ti a.

¹⁵Chutia a ṭawng hnu chuan ṭawng thei lovin lei chu ka bih ta reng a.

¹⁶Mihring ang hi a lo kal a, ka hmui a rawn dek a, chutah ka âng a, ka ṭawng thei ta a. Ka hmaa ding hnênah chuan, “Ka pu, inlârna avângin ka chau hnêp a, ka khûr reh thei lo va ni.

¹⁷Engtin nge i chhiahhlawh hi a pu hmaah hian ka ṭawng theih ang? Tha rêng ka nei ta lo va, thâwk pawh ka thaw hlei thei lo,” ka ti a.

¹⁸Mihring ang khân mi khawih leh a, tha thar min pe ta a, “Nang, Pathian ngainat mihring, hlau suh, thlamuang takin awm rawh, insangmar la, intihuai rawh,” a ti a.

¹⁹Chutia min biak hnu chuan ka lo chak leh ta a, “Mi tichak ta si a, ka pu, thu chu sawi ta che,” ka ti a.

²⁰“I chunga thil ka tih kha i hrethiam em? Tûnah hian Persia ram hotupa bei tûrin ka kal rih dâwn a ni. Ka tihtlâwm hunah Grik ram lal a lo thawk ang. Thutak Lehkhabua ziak chu ka la hrilh fiahsak ang che.

²¹Hêng mite ka beihnaa ka lama ṭang chu in hotupa, Mikaela chauh kha a ni.