Read Mizo Lushai Daniela 11 Bible Online

Daniela 11 - Mizo Lushai bible

Daniela 11

¹“Media mi Daria a lal kum khat kum khân kei hi ka inrawlh ve a, ka tichak ta a ni,” a ti a.

²“Tûnah thu dik ka hrilh dâwn che hi. Persia ramah mi pathum indawtin an lo lal ang a, a palina chu a hausa fâl bîk ang; a hausak avânga a chak viau tâk hnu chuan Grik ram chu a cho vang.

³Chu ramah chuan lal huai tak a lo lal ang a, ram zau tak a nei ang, a duh duhin a che vêl ang.

⁴A lal vânglai tak chuan a ram chu a darh ang a, hmun li-a ṭhen a ni ang. Ama thlah ni lo, lal dang, a aiah an lal ang a; mahse, ani tluka chak tu mah an awm lo vang.

⁵“Chhim lam ram, Aigupta lal chu a chak hle ang a; mahse, lal pakhat dang kha a chak zâwk ang, a ram pawh a zau zâwk ang.

⁶Kum eng emaw zât hnu chuan Aigupta lal chuan hmâr lam ram, Suria lal chu ṭhianah a siam ang a, nupuiah a fanu a neihtîr ang. Mahse, an inṭhian rei lo vang, a fanu chu a pasal nên, a fa leh a chhiahhlawh chhawmte nên an that vek ang.

⁷Chûng hnu chuan chu nu unau pakhat chu a lo kal ang a, Suria lal sipaite chu a bei ang. An kulhah a luhkhung ang a, a titlâwm ang.

⁸An milim pathiante leh rangkachak leh tangkaruaa siam bungbêl, an pathian tâna an siamte chu a ram Aigupta ramah chuan a hâwnpui ang. Rei fe chhûng chu Suria ram chu a bei leh lo vang.

⁹Suria lal chuan Aigupta ram chu rûn a tum ang a; mahse, an lo hnawt kîr ang.

¹⁰“Suria lal fapa chuan Aigupta chu rûn tûrin sipai a la ṭeuh vang a; tui lian ang maiin an lian ang a, an kulh pakhat chu an hualsak ang.

¹¹Aigupta lal thin chu a rim ang a, Suria ram lal chu a bei lêt ang a, a sipaite chu a mansak ṭeuh vang.

¹²A chak zâwk avâng leh sipai tam tak a thahsak avângin a inchhuang ta hle a; mahse, a chak zâwk reng dâwn lo.

¹³“Suria lal chuan a hma aia tam sipai a la leh ṭeuh vang a, hun remchângah sipai tam tak leh râlthuam tam deuh nên a thawk leh ang.

¹⁴Aigupta ram lal lakah mi tam tak an hel ang, inlârna an hmuh tihhlawhtlin tumin i mite zînga mi kawlhsen ṭhenkhat pawh an hel ang a; mahse, an tlâwm mai ang.

¹⁵Suria lal chu a lo lian ang a, an kulh chu a rawn hual ang a, a man ang; Aigupta sipaite chu an chechâng ngam lo vang, an zînga huai berte pawh chu an dawl vek dâwn a ni.

¹⁶Suria ram aṭanga rawn rûntu chuan a duh duhin a sawisa ang, khak ngam rêng an awm lo vang. Ram ropui berah pawh chuan a ding ang a, a thuhnuaiah a awmtîr ang.

¹⁷“Suria lal chuan a sipai rualte nên ram dang rûn a tum rilru leh a. A hmêlmapa ram a tihchhiatsak theih nân ṭhiana siam a tum ang a, nupui atân a fanu pêk a tum ang a; mahse, a hlawhtling lo vang.

¹⁸Chumi hnu chuan tuifinriat kama awmte chu a bei ang a, tam tak chu a hneh ang; mahse, lal pakhatin a lo hneh ang a, chapo hle mah se a titlâwm ang a, a chapona chu a chungah a lêt dâwn a ni.

¹⁹Ama ramah, a kulhah ngei hâwn leh a tum ang a; mahse, an that ang; chu chu a tâwpna tûr chu a ni.

²⁰“Chu lal aiah chuan mi pakhat a lo lal ang a, chu mi chuan a ram a lo hausak theih nân chhiah chawi luihtîr tûrin hotute a tîr chhuak ang a. Rei lo têah chu lal chu indonaah ni lovin arte thihin a thi ang.

²¹“A aiah mi sual deuh pakhat a lo lal dâwn, dân anga lallukhum khumtîr pawh a ni lo vang; fin vervêk thawhin a lo lal thut mai dâwn a ni.

²²Amah kalhtu tawh phawt chu, thuthlung hotupa meuh pawh ni se a hrût nek ang a, a lên bo vang.

²³Inṭhianna thu thlunpuiin hnam dangte chu a bum ang a, ram zîm têa lal ni mah se a chak tial tial ang.

²⁴Ram bung hausa lai laite chu an inrin loh laiin a rûn thut thut ang a, a pi leh pute tih duh ngai loh chu a ti ṭhîn ang. A râllâk te, a rawk sum te chu amah zuitute a sem bawk ṭhîn ang. Kulh nei khaw dangte pawh beih a tum zêl ang a; mahse, a hun a ral thuai ang.

²⁵“Aigupta ram lal bei tûrin a insiam chak a, huai takin sipai tam tak a hruai a; mahse, ani chuan sipai tam zet chak tak nên a lo bei lêt ang; amaherawhchu, an phiarrûkna avângin Aigupta lal chuan a ngam lo vang.

²⁶Ama mi, a chawhlui kîlpui ṭhinte ngei chu amah tichhetu an ni ang; a sipai tam tak chu an thi bawk ang a, an darh zo vang.

²⁷Lal pahnihte chuan chawhlui an kîl dûn ang a; mahse, intihchhiat tum rilru pu rânin dâwt an inhrilh tawn ang. A tu a mah an hlawhtling lo vang, hun ruat chu a lo la thleng si lo va.

²⁸Suria lal chu a râllâk sum zawng zawng nên a hâwng ang a, thuthlung thianghlim chu ṭhiatsak a tum ang a. A duh ang chuan a ti ang a, an ramah a kîr leh ang.

²⁹“Chumi hnu deuhvah Aigupta ram a rûn leh ang a; mahse, tûn hma ang kha a ni tawh lo vang.

³⁰Amah bei tûrin Kitim-ho lawng rual a lo kal ang a, a hlau hle ang. A kîr lam chuan thinur takin thuthlung thianghlim chu ṭhiat vek a tum ang a, chu thuthlung bawhchhetute thurâwn chu a pawm dâwn a ni.

³¹A sipaite chuan kulh leh hnam thianghlim chu an tibawrhbâng ang, hâlral thilhlan an hlan reng ṭhin chu an tihtâwpsak ang a, tenawm râpthlâk chu an dah ang.

³²Thuthlung thianghlim bânsantute chu fak derin lamṭangah a siam ang a; mahse, Pathian thu zâwmtute chu an ṭang tlat ang a, an bei lêt ang.

³³An zînga hruaitu fingte chuan mi dang pawh an hrilh fing ang a, hun eng emaw ti chhûng chu a ṭhen salah an man ang a, an rawk bawk ang.

³⁴Anmahni ṭanpui tûra inpete chuan ti tak tak ṭhîn lo mah se, chûng mi thahte chuan ṭanpuina a tâwk a fang chu an dawng tho vang.

³⁵An hruaitu fing ṭhenkhat chu an thahsak ang a, chumi avâng chuan mite chu then faia tihthianghlim an ni ang. Pathian hun ruat, tâwpna hun chu a lo thlen hun chuan chutiang chuan thil a awm ang.

³⁶“Chu lal chu a duh duhin a che ang a, pathiante aia ropuiah a inngai ang a, pathiante Pathian meuh ai pawhin a indah sâng ang. Pathian thinurna, a tâna ruat chu a thlen hma chuan chutiang chuan a che ang.

³⁷Chu lal chuan a pi leh pute pathian chu a ngaihthah ang a, hmeichhiaten an ngainat êm êm pathiante pawh a ngaihsak lo vang a, pathian dangte pawh pawisak rêng a nei lo vang, ropui zâwkah a inngai dâwn si a.

³⁸Kulh humtu pathiante erawh chu a tlawn ang. A pi leh puten an biak ngai loh pathian hnênah rangkachak te, tangka te, lungmantam te leh thil hlu tak te a hlân ang.

³⁹A kulh vêng tûrin ram dang pathian be mite a ruai ang a; amah lala pawmtute chu a chawimawi ang, hna ṭha tak tak a pe ang a, lâwmmanah ramte pawh a pe ang.

⁴⁰“A hun tâwp dâwn hnaiah chuan Aigupta lal chuan a rawn bei ang a; mahse, Suria lal chuan tawlailîr te, sakawr chungchuang mi te leh lawng tam tak te nên theihtâwp chhuahin ṭhâwngaleivîr angin a lo bei lêt dâwn a ni.

⁴¹Ram ropui ber pawh a rawn bei tel dâwn a, mi a sînga sîng tam a that bawk ang. Edom te, Moab te leh Amon ram la bâng te erawh chu a zuah ang.

⁴²Hêng ramte hi a rawn rûn chuan Aigupta pawh a zuah lo vang. Tuilian angin ram tam takah a lian zêl ang a, a hrût zêl ang.

⁴³Rangkachak te, tangkarua te leh an ro hlu, Aiguptahovin an dah ṭhatte chu a la ang. Libua leh Sudan pawh a thuhnuaiah a dah ang.

⁴⁴Khawchhak leh hmâr lam aṭanga thu thang lo thleng chuan a tithlaphâng ang a, chu thil chu beia titâwp ṭhak tûrin a thawk ang.

⁴⁵Tuifinriat leh tlâng thianghlim mawi ber inkârah a lal bûk a khuar ang a; mahse, a thi dâwn, tu man an ṭanpui lo vang.