Read Mizo Lushai Daniela 12 Bible Online

Daniela 12 - Mizo Lushai bible

Daniela 12

¹“Chumi hunah chuan i mite enkawltu, hotu lian Mikaela chu, a lo thawk ang. Hnam lo din tirh aṭanga tûn thlengin chutiang hrehawm chu a awm tawh ngai lo vang; i mite erawh chu chhan chhuah an ni ang, lehkhabua an hming chuang apiangte chu.

²Lei vaivuta mu tawhte pawh an lo tho vang, ṭhenkhat chu chatuan nun chang tûrin an lo tho leh ang a, ṭhenkhat erawh chu an zak êm êm ang a, kumkhaw hmuhsit an ni ang.

³Hruaitu fingte chu vâna êng angin an êng ang a, thil dik ti tûra mi dang hruaitute pawh chu arsi angin an êng kumkhua ang.

⁴“Amaherawhchu, Daniel, tâwpna a lo thlen hma chu, thu chu thup la, lehkhabu chu châr tlat rawh, hriat duhin mi tam tak an phi ruai dâwn a ni,” a ti a.

⁵Kei, Daniela hian ka han en a, lui kam tuakah mi pahnih ding ka hmu a.

⁶Lui hnâr zâwka ding, puan zai sîna inthuam hnênah chuan, “Hêng thil mak tak tak hi engtikah nge a tâwp ang?” ka ti a.

⁷Lui hnâr zâwka ding, puan zai sîna inthuam chuan, a kut khing hnih a phar a, chatuan Pathian hming chhâl meuhvin a sawi a: “Hun khat, hun hnih, hun chanve chhûng tûr a ni. Pathian mite tihduhdah a tâwp hun chuan hêng thilte hi a thleng kim vek ang,” a ti a.

⁸A sawi chu ka hre nâ a, a ngaihna erawh chu ka hre lo, “Ka pu, hêng zawhah hian engtin nge ni ang?” ka ti a.

⁹“Daniel, kal mai rawh, tâwpna a lo thlen hma chu thu hi thupa châr hnan tlat a ni tawh.

¹⁰Mi tam tak an inthian fai ang a, an insu vâr ang a, tihthianghlim an ni ang; mi sualte erawh chuan an hrethiam lo vang a, an sual lui zêl ang, mi fingte chauhvin an hrethiam ang.

¹¹“Ni tin thil hlan ṭhin an tihtâwp a, tenawm râpthlâk an dah ni aṭangin ni sângkhat leh zahnih leh sawmkua a ral ang.

¹²Ni sângkhat leh zathum leh sawmthum leh panga chhûng rinawm taka awm chhuak chu a nihlawh e.

¹³“Daniel, nang chu kal ta la, i hun tâwp a thlen hma chu rinawm takin awm rawh. I hahchâwl ang a, tâwpna a lo thlen hunah i awmna tûr hmun ruatah chuan i awm dâwn nia,” a ti a.